ສກຂ ອັດຕະປື ເປີດຂະບວນການແຂ່ງຂັນຮັກຊາດ ແລະ ພັດທະນາ
ພະແນກສຶກສາທິການ ແລະ ກິລາແຂວງ (ສກຂ) ອັດຕະປື ໄດ້ຈັດກອງປະຊຸມເປີດຂະບວນການແຂ່ງຂັນຮັກຊາດ ແລະ ພັດທະນາ ເມື່ອວັນທີ 25 ກັນຍາ 2023 ທີ່ຫ້ອງປະຊຸມພະແນກດັ່ງກ່າວ, ໂດຍການເປັນປະທານຂອງທ່ານ ອຸດົມສິນ ສີຊານົນ ກໍາມະການພັກແຂວງ, ຫົວໜ້າພະແນກສຶກສາທິການ ແລະ ກິລາ ແຂວງອັດຕະປື, ມີຄະນະນຳຫ້ອງການສຶກສາທິການ ແລະ ກິລາ 5 ເມືອງ, ຄະນະອຳນວຍການ ໂຮງຮຽນທີ່ກ່ຽວຂ້ອງ, ແຂກທີ່ຖືກເຊີນ ຕະຫຼອດຮອດພາກສ່ວນທີ່ກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ, ທ່ານ ອຸດົມສິນ ສີຊານົນ ໄດ້ກ່າວເປີດກອງປະຊຸມວ່າ: ການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ແມ່ນຂະບວນການລວມຂອງຊາດ ຊຶ່ງທຸກຂົງເຂດວຽກງານນັບແຕ່ສູນກາງລົງຮອດທ້ອງຖິ່ນຕ້ອງໄດ້ຈັດຕັ້ງປະຕິບັດ ໂດຍສະເພາະແມ່ນການຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ແລະ ການຜັນຂະຫຍາຍເນື້ອໃນຂໍ້ແຂ່ງຂັນຮັກຊາດ ແລະ ພັດທະນາ ທີ່ໄດ້ຮັບຮອງ ເວົ້າລວມ, ເວົ້າສະເພາະ ແມ່ນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຂອງແຂວງອັດຕະປືໃຫ້ປະກົດຜົນເປັນຈິງ.
ສຳລັບຂະແໜງການສຶກສາທິການ ແລະ ກິລາ ແມ່ນສຸມໃສ່ຈັດຕັ້ງປະຕິບັດຍຸດທະສາດ ແຜນພັດທະນາການສຶກສາ ແລະ ກິລາ ຕາມຂະແໜງການຍ່ອຍໃນແຕ່ລະໄລຍະ ໂດຍສະເພາະແມ່ນບັນດາຄາດໝາຍຕ່າງໆທີ່ສະພາຮັບຮອງ. ທັງນີ້, ເພື່ອບັນລຸຄາດໝາຍດັ່ງກ່າວນັ້ນ, ຜູ້ບໍລິຫານການສຶກສາຂັ້ນແຂວງ, ຂັ້ນເມືອງ, ຂັ້ນສະຖານການສຶກສາ ພ້ອມດ້ວຍພະນັກງານລັດຖະກອນ ແລະ ຄູສອນທັງໝົດເປັນເຈົ້າການຈັດຕັ້ງປະຕິບັດແຜນພັດທະນາດັ່ງກ່າວໃຫ້ເກີດເປັນຮູບປະທຳ. ສະນັ້ນ, ການໄດ້ເປີດຂະບວນການແຂ່ງຂັນ ຮັກຊາດ ແລະ ພັດທະນາ ໂດຍຕິດພັນກັບ 3 ຂໍ້ແຂ່ງຂັນຂອງຂະແໜງການສຶກສາທິການ ແລະ ກິລາ ທັງເປັນການປະເມີນຜົນງານໃນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາໃນແຕ່ລະໄລຍະ ແລະ ເພື່ອເປັນການປຸກລະດົມ, ຊຸກຍູ້ຂະບວນການແຂ່ງຂັນ, ຍ້ອງຍໍຕໍ່ຜູ້ທີ່ມີຜົນງານດີເດັ່ນໃນການປະກອບສ່ວນເຂົ້າໃນການພັດທະນາການສຶກສາຕະຫຼອດໄລຍະ 5 ປີ.
ນອກຈາກນັ້ນ, ໃນກອງປະຊຸມຍັງໄດ້ຜ່ານແຜນການແຂ່ງຂັນຂອງພະແນກສຶກສາທິການ ແລະ ກິລາແຂວງ ປະຈຳປີ 2021-2025, ຜ່ານຂໍ້ຕົກລົງເຈົ້າແຂວງ ວ່າດ້ວຍການຮັບຮອງແຜນການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາຂອງຂະແໜງການສຶກສາ ແລະ ກິລາ ແລະ ໄດ້ພ້ອມກັນຂຶ້ນຈັບມືແຂ່ງຂັນຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ຂອງຂະແໜງການສຶກສາ ແລະ ກິລາ ປະຈຳປີ 2021 ຫາ 2025 ຢ່າງເປັນທາງການ.
ໂດຍ: ສິດຕິພອນ ແຂວງອັດຕະປື