ມສ ນາຊານ ແລະ ມ.ຕົ້ນ ພູຫວດ ປະກາດເປັນໂຮງຮຽນປອດຢາເສບຕິດ 10 ສົກຮຽນຊ້ອນ

ໃນວັນທີ 31 ມີນາ 2026, ຄະນະຮັບຜີດຊອບ ໄດ້ລົງປະກາດ ໂຮງຮຽນ ມສ ນາຊານ ແລະ ໂຮງຮຽນ ມ.ຕົ້ນ ພູຫວດ ເມືອງງາ ແຂວງອຸດົມໄຊ ເປັນໂຮງຮຽນປອດຢາເສບຕິດ 10 ສົກຮຽນຊ້ອນ (ແຕ່ປີ 2013-2023) ຢູ່ທີ ໂຮງຮຽນ ມສ ນາຊານ ພາຍໃຕ້ການເປັນປະທານຮ່ວມໂດຍ ທ່ານ ຄໍາພຸດ ຕາວິລົມ ຄະນະປະຈໍາພັກເມືອງ, ເລຂາຄະນະພັກຮາກຖານ, ຫົວໜ້າກອງບັນຊາການ ປກສ ເມືອງ ແລະ ທ່ານ ສີທອງ ທັນຂັນຕິ ຮອງຫົວໜ້າພະແນກສຶກສາທິການ ແລະ ກິລາແຂວງອຸດົມໄຊ, ມີຄະນະຕາແສງ, ຜູ້ອໍານວຍການໂຮງຮຽນ ຄູ-ອາຈານ, ຄະນະພັດທະນາການສຶກສາຂັ້ນບ້ານ, ເຖົ້າແກ່ແນວໂຮມ, ພໍ່ແມ່ນັກຮຽນ ແລະ ນັກຮຽນທັງໝົດເຂົ້າຮ່ວມ.

ໃນພິທີ, ໄດ້ຜ່ານຂໍ້ຕົກລົງຂອງຫົວໜ້າພະແນກສຶກສາທິການ ແລະ ກິລາແຂວງ ວ່າດ້ວຍການຮັບຮອງເອົາໂຮງຮຽນທັງ 2 ແຫ່ງ ແລະ ຂໍ້ຕົກລົງຂອງທ່ານເຈົ້າເມືອງງາ ທີ່ອະນຸມັດໃຫ້ປະກາດເປັນໂຮງຮຽນປອດຢາເສບຕິດ. ໂອກາດນີ້, ຄະນະປະທານໄດ້ມອບໃບຢັ້ງຢືນ ແລະ ໃບຍ້ອງຍໍຂອງທ່ານເຈົ້າແຂວງ ໃຫ້ແກ່ຄະນະອໍານວຍການໂຮງຮຽນທັງ 2 ແຫ່ງ ເພື່ອເປັນການຍ້ອງຍໍສັນລະເສີນຜົນງານໃນການຕ້ານ ແລະ ສະກັດກັ້ນສິ່ງເສບຕິດໃນສະຖານການສຶກສາ. ຜ່ານການຈັດຕັ້ງປະຕິບັດທີ່ຜ່ານມາ, ໂຮງຮຽນທັງ 2 ແຫ່ງໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ນັກຮຽນຫັນມາຫຼິ້ນກິລາ ແລະ ຫ່າງໄກຈາກຢາເສບຕິດ. ພ້ອມທັງເນັ້ນໜັກການປະຕິບັດຫຼັກການ “10 ບໍ່” ຢ່າງເຂັ້ມງວດ ເປັນຕົ້ນແມ່ນ ບໍ່ເສບ, ບໍ່ຊື້, ບໍ່ຂາຍ ແລະ ບໍ່ໃຫ້ການຮ່ວມມືກັບຂະບວນການຢາເສບຕິດໃນທຸກຮູບແບບ.ໃນຕອນທ້າຍຂອງພິທີ, ບັນດາທ່ານປະທານ ແລະ ແຂກທີ່ເຂົ້າຮ່ວມ ໄດ້ຮ່ວມກັນເປີດປ້າຍໂຮງຮຽນປອດຢາເສບຕິດ 10 ສົກຮຽນຊ້ອນ ເພື່ອເປັນສັນຍະລັກແຫ່ງຄວາມສໍາເລັດ ແລະ ເປັນບ່ອນອີງໃນການສືບຕໍ່ສ້າງໂຮງຮຽນປອດຢາເສບຕິດ 15 ສົກຮຽນຊ້ອນໃນຕໍ່ໜ້າ.