“ຮາລັນ” ຍິງສອງປະຕູ ພາ ນອກແວ ເອົາຊະນະ ບຣາຊິນ 2-1 ຜ່ານເຂົ້າສູ່ຮອບ 8 ທີມສຸດທ້າຍ ບານໂລກ 2026
ທັບນັກເຕະທີມຊາດບຣາຊິນ ຕ້ອງຢຸດຕິເສັ້ນທາງໄວ້ພຽງແຕ່ຮອບ 16 ທີມສຸດທ້າຍ ຫຼັງເສຍໃຫ້ກັບ ທີມຊາດນອກແວ (ນໍເວ) ໄປ 1-2 ໂດຍເກມນີ້ ບຣາຊິນ ພາດໂອກາດຂຶ້ນນຳກ່ອນຕັ້ງແຕ່ເຄິ່ງເວລາທຳອິດ ທີ່ ບຣູໂນ ກີມາໄຣ ຍິງຈຸດໂທດໄປຕິດເຊັບຂອງ ອໍຢານ ນີລັນ.
ເຄິ່ງເວລາຫຼັງ ບຣາຊິນ ເປີດເກມບຸກໜັກ ແລະ ສົ່ງທັງ ເອນດຣິກ ລວມເຖິງ ເນມາ ລົງມາຫວັງຍິງປະຕູ ແຕ່ກໍຍັງເຈາະບໍ່ເຂົ້າ. ຈົນຮອດນາທີ 79 ກາຍເປັນ ນອກແວ ທີ່ພິກຂຶ້ນນຳຈາກຈັງຫວະທີ່ ອັນເດຣຍ ເຊວເດີຣຸບ ເປີດໃຫ້ ເອີລິງ ຮາລັນ ໂໝ່ງເນັ້ນໆເຂົ້າໄປ. ກ່ອນທີ່ນາທີສຸດທ້າຍ ຮາລັນ ຈະໂຊຄວາມຄົມ ຍິງປະຕູທີສອງນຳຫ່າງເປັນ 2-0 ເຖິງວ່າ ເນມາ ຈະມາຍິງຈຸດໂທດໃນໄລຍະທົດເວລາບາດເຈັບ ແຕ່ກໍໄລ່ບໍ່ທັນ. ຈົບເກມ ນອກແວ ເອົາຊະນະ ບຣາຊິນ 2-1 ຜ່ານເຂົ້າສູ່ຮອບກ່ອນຮອງຊະນະເລີດ (8 ທີມ) ໄດ້ສຳເລັດ.
ທາງດ້ານ ແຊ້ມໂລກ 5 ສະໄໝ ຕ້ອງຢຸດຕິເສັ້ນທາງການແຂ່ງຂັນເຕະບານໂລກ 2026 ໄວ້ພຽງຮອບ 16 ທີມສຸດທ້າຍ ເຊິ່ງຖືເປັນຄັ້ງທຳອິດທີ່ ບຣາຊິນ ຕກຮອບນັອກເອົ້າ (Knockout) ໄວແບບນີ້ ນັບຕັ້ງແຕ່ປີ 1990.
ໄຮໄລ້ເກມ:
ບຣູໂນ ກີມາໄຣ (ພາດຈຸດໂທດ) ນ.14
0-1 ເອີລິງ ຮາລັນ ນ.79
0-2 ເອິລິງ ຮาລັນ ນ.90
1-2 ເນມາ (ຈຸດໂທດ) ນ.90+10
ໂປຣແກຣມນັດຕໍ່ໄປ
ຮອບ 8 ທີມສຸດທ້າຍ
11 ກໍລະກົດ: ນອກແວ ພົບ ເມັກຊິໂກ ຫຼື ອັງກິດ