ສກຂ ວິລະບູລີ ສະຫຼຸບວຽກງານ 6 ເດືອນຕົ້ນປີ ພ້ອມປະກາດແຕ່ງຕັ້ງຜູ້ບໍລິຫານໂຮງຮຽນ 52 ທ່ານ
ໃນເຊົ້າວັນທີ 4 ສິງຫາ 2026 ຢູ່ທີ່ສະໂມສອນເມືອງວິລະບູລີ, ຫ້ອງການສຶກສາທິການ ແລະ ກິລາ ເມືອງວິລະບູລີ ແຂວງສະຫວັນນະເຂດ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານການສຶກສາ ປະຈຳ 6 ເດືອນຕົ້ນປີ ແລະ ກຳນົດທິດທາງແຜນການ 6 ເດືອນທ້າຍປີ 2026 ຂຶ້ນຢ່າງເປັນທາງການ, ໂດຍການເປັນປະທານຮ່ວມຂອງ ທ່ານ ໄພມະນີ ວົງໄຊຄຳ ຄະນະປະຈຳພັກເມືອງ, ຮອງປະທານຄະນະກຳມະການປົກຄອງເມືອງວິລະບູລີ ແລະ ທ່ານ ສີພະຈັນ ກອງທອງມາ ກຳມະການພັກເມືອງ, ຫົວໜ້າຫ້ອງການສຶກສາທິການ ແລະ ກິລາເມືອງ, ມີບັນດາຄະນະຫ້ອງການ, ວິຊາການ, ຜູ້ບໍລິຫານໂຮງຮຽນ ແລະ ຄູ-ອາຈານ ຈາກໂຮງຮຽນປະຖົມ, ມັດທະຍົມຕົ້ນ ແລະ ມັດທະຍົມປາຍທົ່ວເມືອງວິລະບູລີ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ທ່ານ ແກ້ວອຸດອນ ວົງສັກດາ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານໃນໄລຍະ 6 ເດືອນຜ່ານມາ ເຊິ່ງສາມາດຍາດໄດ້ຜົນສຳເລັດຫຼາຍດ້ານ ເປັນຕົ້ນແມ່ນ ຄຸນນະພາບການຮຽນ-ການສອນໄດ້ຮັບການຍົກສູງຂຶ້ນ; ອັດຕານັກຮຽນຂຶ້ນຫ້ອງ ແລະ ຈົບຊັ້ນ ບັນລຸຕາມຄາດໝາຍ; ໄດ້ເອົາໃຈໃສ່ບຳລຸງ, ກໍ່ສ້າງ ແລະ ຍົກລະດັບຄູ-ອາຈານຢ່າງຕໍ່ເນື່ອງ; ສຸມໃສ່ສ້ອມແປງອາຄານ, ສິ່ງອຳນວຍຄວາມສະດວກໃນໂຮງຮຽນ; ຊຸກຍູ້ຂະບວນການກິລາຮາກຖານຢ່າງຟົດຟື້ນ.
ຄຽງຄູ່ກັບຜົນສຳເລັດ, ກອງປະຊຸມຍັງໄດ້ຊີ້ໃຫ້ເຫັນຂໍ້ຄົງຄ້າງທີ່ຕ້ອງໄດ້ສຸມໃສ່ແກ້ໄຂໃນ 6 ເດືອນທ້າຍປີ ເປັນຕົ້ນແມ່ນ ບັນຫາການຂາດແຄນອຸປະກອນການຮຽນ-ການສອນ ແລະ ອັດຕານັກຮຽນປະລະການຮຽນຢູ່ເຂດຫ່າງໄກສອກຫຼີກ.
ໃນໂອກາດດຽວກັນ, ຄະນະຈັດຕັ້ງເມືອງ ໄດ້ປະກາດຂໍ້ຕົກລົງຂອງປະທານຄະນະກຳມະການປົກຄອງເມືອງວິລະບູລີ ວ່າດ້ວຍການແຕ່ງຕັ້ງບຸກຄະລາກອນຜູ້ບໍລິຫານການສຶກສາຂັ້ນໂຮງຮຽນປະຖົມ ແລະ ມັດທະຍົມ ລວມທັງໝົດ 52 ທ່ານ ໃນຕຳແໜ່ງຜູ້ອຳນວຍການ, ຮອງຜູ້ອຳນວຍການ, ຫົວໜ້າ-ຮອງຫົວໜ້າໜ່ວຍງານ ແລະ ຫົວໜ້າ-ຮອງຫົວໜ້າຈຸງານ ເພື່ອປະຈຳຢູ່ບັນດາໂຮງຮຽນທົ່ວເມືອງ.
ພ້ອມນີ້, ຍັງໄດ້ປະກາດລາຍຊື່ຄູ-ອາຈານ 6 ທ່ານ ທີ່ໄດ້ຮັບທຶນໝູນວຽນເພື່ອພັດທະນາຄູດີ, ຄູເດັ່ນ ໄດ້ແກ່ ທ່ານ ລຳພອນ ພົນຊາວນາ ມສ ພູຄຳ, ທ່ານ ຟອງສະໝຸດ ແກ້ວວົງສາ ມສ ພູຄຳ, ທ່ານ ນາງ ກົງຕາ ເທບມິນທາ ມສ ພູຄຳ, ທ່ານ ບັນຄົງ ວົງອາເຢິດ ມສ ໂພນສະຫວາງ, ທ່ານ ບຸນເກີດ ແກ້ວວົງສາ ມສ ນ້ຳມະຮີ ແລະ ທ່ານ ນາງ ຟອງສະໝຸດ ຄຸນທະວີ ມສ ດົງຍາງ.
ໃນຕອນທ້າຍ, ທ່ານ ໄພມະນີ ວົງໄຊຄຳ ໄດ້ມີຄຳເຫັນໂອ້ລົມ ແລະ ຊີ້ນຳໃຫ້ຄະນະຫ້ອງການສຶກສາເມືອງ, ຜູ້ບໍລິຫານໂຮງຮຽນ ແລະ ຄູ-ອາຈານທຸກຄົນ ຈົ່ງເພີ່ມທະວີຄວາມຮັບຜິດຊອບ, ສືບຕໍ່ປະຕິບັດແຜນການ 6 ເດືອນທ້າຍປີ ໃຫ້ສຳເລັດຕາມຄາດໝາຍ, ເອົາໃຈໃສ່ແກ້ໄຂຂໍ້ຄົງຄ້າງ, ສຸມໃສ່ຍົກສູງຄຸນນະພາບການສຶກສາ, ແກ້ໄຂບັນຫານັກຮຽນປະລະການຮຽນ ແລະ ຫັນການສຶກສາຂອງເມືອງວິລະບູລີ ໃຫ້ມີບາດກ້າວຂະຫຍາຍຕົວໃໝ່ຢ່າງແຂງແຮງ.