ຝ່າຍຈັດການແຂ່ງຂັນ ໂອແລມປິກ ເກມ 2028 ກຽມບັນຈຸເພີ່ມ 5 ປະເພດກິລາ
ງານມະຫະກຳກິລາໂອແລມປິກ ແກມ 2028 ຊຶ່ງຈະຈັດຂຶ້ນຢູ່ນະຄອນລອດ ແອນເຈີລິດ ລັດຄາລິຟໍເນຍ ສະຫະລັດອາເມຣິກາ ໂດຍຝ່າຍຈັດການແຂ່ງຂັນຫວັງຈະບັນຈຸ 5 ປະເພດກິລາຄື: ກິລາຄຣິກເກັດ, ແຟກຟຸດບອນ, ລາຄຣອດ, ສະຄວບ, ແລະ ເບັດບອນ-ຊັອບບອນ.
ໃນຈຳນວນ 5 ປະເພດກິລານັ້ນ ມີ 3 ປະເພດທີ່ບໍ່ເຄີຍຖືກຈັດບັນຈຸເຂົ້າແຂ່ງຂັນໃນງານກິລາໂອແລິມປິກມາກ່ອນຄື ແຟກຟຸດບອນ, ລາຄຣອດ ແລະ ສະຄວບ, ໃນຂະນະທີ່ ກິລາ ຄຣິກເກັດ ເຄີຍປະກົດພຽງຄັ້ງດຽວໃນການແຂ່ງຂັນໃນປີ 1900 ຫຼື 123 ປີກ່ອນ. ສ່ວນກິລາ ເບັດບອນ ນັ້ນ ຖືກບັນຈຸເປັນກິລາຊີງຫຼຽນມາແລ້ວ 6 ຄັ້ງ, ເປັນກິລາສາທິດ 4 ຄັ້ງ ແລະ ກິລາ ຊັອບບອນ ຖືກບັນຈຸເປັນກິລາຊີງຫຼຽນ 5 ຄັ້ງ ຊຶ່ງຂໍ້ສະເໜີຂອງຝ່າຍຈັດການແຂ່ງຂັນຍັງລໍຖ້າການອະນຸມັດຈາກຄະນະກຳມະການໂອແລມປິກສາກົນ (IOC) ກ່ອນ ຊຶ່ງ IOC ຈະມີວາລະການປະຊຸມໃນ ເມືອງມຸມໃບ ປະເທດອິນເດຍ ໃນເດືອນນີ້ ໂດຍທີ່ປະເດັນການບັນຈຸ 5 ປະເພດກິລາ ດັ່ງກ່າວຈະຖືກລົງຄະແນນສຽງອີກດ້ວຍ. ທັ້ງນີ້, ສຳນັກຂ່າວ The Los Angeles Times ລາຍງານວ່າມີໂອກາດສູງທີ່ປະເພດກິລາທັງໝົດຈະໄດ້ຈັດແຂ່ງຂັນໃນໂອແລມປິກ ເກມ ດັ່ງກ່າວ.
ທ່ານ ເຄທີ ຄາເຕີ ປະທານບໍລິຫານຂອງກິລາໂອແລມປິກ ເກມ 2028 ໄດ້ກ່າວວ່າ: “ເຮົາມີເຈດຕະນາຈະທ້າທາຍ ແລະ ຄິດຕ່າງກັນໃນການສ້າງໂປຣແກຣມ ກິລາໂອແລມປິກທີ່ລອດແອນເຈີລິດ, ເຮົາໄດ້ຍື່ນສະເໜີທີ່ຊັດເຈນ ແລະ ມີຄວາມສົມດູນເພື່ອຊຸກຍູ້ການແຂ່ງຂັນທີ່ມີຄວາມເປັນໄປໄດ້ບໍ່ຈຳກັດ.”
ຮຽບຮຽງໂດຍ: ບຸນທະວີ ນະວົງສາ