ເຊເນການ ແຊ໋ມເກົ່າ ຮ່ວມກຸ່ມ ກາເມີຣູນ ເຕະບານ ອາຟຣິກາ ຄັບ ອັອບ ເນຊັນ 2023 ຮອບສຸດທ້າຍ

ການແຂ່ງຂັນເຕະບານຊາຍ ຊີງແຊ໋ມທະວີບອາຟຣິກາ ຫຼື “Africa Cup of Nations 2023” ຮອບສຸດທ້າຍ ທີ່ປະເທດກົດດີວົວ (ໄອໂວຣີໂຄ໊ດ) ເປັນເຈົ້າພາບ ໄດ້ມີພິທີຈັບສະຫຼາກຮອບແບ່ງກຸ່ມເປັນທີ່ຮຽບຮ້ອຍ ໂດຍແຊ໋ມເກົ່າ ທີມຊາດເຊເນການ ຢູ່ກຸ່ມ C ຮ່ວມກັບ ກາເມີຣູນ ແຊ໋ມ 5 ສະໄໝ ອັນດັບສາມຄັ້ງຜ່ານມາ ລວມທັງ ສາທາລະນະລັດກີນີ ແລະ ກຳບີ (ແກມເບຍ).

ຂະນະທີ່ ເຈົ້າພາບ ກົດດີວົວ (ໄອໂວຣີໂຄ໊ດ) ຢູ່ກຸ່ມ A ຮ່ວມກັບ ໄນຈີເຣຍ (ນີເຊຣີ) ແຊ໋ມ 3 ສະໄໝ, ເອກົວໂທຣຽວ ກີນີ ແລະ ກີນີ ບິດເຊົາ. ສ່ວນ ທີມຊາດເອຢິບ ແຊ໋ມສູງສຸດ 7 ສະໄໝ ຮອງແຊ໋ມຄັ້ງຜ່ານມາ ຢູ່ກຸ່ມ B ຮ່ວມກັບ ການາ ແຊ໋ມ 4 ສະໄໝ, ແຄັບເວີດ (ກັບແວ) ແລະ ໂມຊຳບິກ.

ກຸ່ມ D ມີ : ແອວຈີເຣຍ (ອານເຊຣີ), ບູກີນາ ຟາໂຊ, ເມົາຣີຕານີ ແລະ ອັງໂກລາ; ກຸ່ມ E ມີ ຕູນີເຊຍ (ຕູນີຊີ), ມາລີ, ອາຟຣິກາໃຕ້ ແລະ ນາມີບີ; ກຸ່ມ F ໂມຣັອກໂຄ (ມາຣົກ), ສາທາລະນະລັດ ປະຊາທິປະໄຕ ກົງໂກ, ແຊມເບຍ (ຊຳບີ) ແລະ ທານຊາເນຍ (ທານຊານີ).

ຮອບສຸດທ້າຍມີທັງໝົດ 24 ທີມຜ່ານການຄັດເລືອກ ແບ່ງເປັນ 6 ກຸ່ມລະ 4 ທີມ, ແຂ່ງພົບກັນໝົດໃນກຸ່ມ ແລ້ວຄັດເອົາທີ 1, ທີ 2 ຂອງແຕ່ລະກຸ່ມ ບວກກັບ ທີ 3 ດີສຸດ 4 ທີມຈາກ 6 ກຸ່ມ ເຂົ້າຮອບ 16 ທີມສຸດທ້າຍຕໍ່ໄປ ໂດຍຈະແຂ່ງຂັນໃນລະຫວ່າງວັນທີ 13 ມັງກອນ ຫາວັນທີ 11 ກຸມພາ 2024. ການແຂ່ງຂັນຄັ້ງນີ້ ເປັນຄັ້ງທີສອງ ທີ່ກົດດີວົວ ໄດ້ຮັບກຽດເປັນເຈົ້າພາບ ຕໍ່ຈາກປີ 1984 ໂດຍເຈົ້າພາບຈັດ 6 ສະໜາມໃນ 5 ເມືອງ ຮອງຮັບການແຂ່ງຂັນ.

Photo: Lions Indomptables Officiel, TotalEnergies Africa Cup of Nations