ສຶກສາ-ກິລາ ນວ ແຂ່ງຂັນກິລາເປຕັງ ສະຫຼອງວັນຄູແຫ່ງຊາດ ຄົບຮອບ 29 ປີ ຢ່າງຟົດຟື້ນ

ພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ສຶກສາ-ກິລາ ນວ) ຮ່ວມກັບຫ້ອງການສຶກສາທິການ ແລະ ກິລາ 9 ເມືອງ, ຂະແໜງການ, ໂຮງຮຽນຂຶ້ນກັບ ແລະ ສະມາຄົມໂຮງຮຽນພາກເອກະຊົນ ຈັດການແຂ່ງຂັນກິລາເປຕັງ ປະສົມຊາຍ 2, ຍິງ 1 ເພື່ອສ້າງຂະບວນການສະເຫຼີມສະຫຼອງວັນຄູແຫ່ງຊາດ ຄົບຮອບ 29 ປີ (7 ຕຸລາ 1994-7 ຕຸລາ 2023) ເມື່ອອາທິດຜ່ານມາ ທີ່ເດີ່ນເປຕັງໃນຮົ່ມ ບຶງຂະຫຍອງ ເມືອງສີສັດຕະນາກ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມ ແລະ ມອບລາງວັນຂອງ ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ມີຄະນະພະແນກ, ຫົວໜ້າຫ້ອງການສຶກສາທິການ ແລະ ກິລາ 9 ເມືອງ, ຂະແໜງການ, ສະມາຄົມໂຮງຮຽນພາກເອກະຊົນ ແລະ ບັນດານັກກິລາທີ່ມາຈາກພາກສ່ວນຕ່າງໆຢ່າງພ້ອມພຽງ.

ການແຂ່ງກິລາເປຕັງໃນຄັ້ງນີ້ ກໍເພື່ອສະເຫຼີມສະຫຼອງຕ້ອນຮັບວັນຄູແຫ່ງຊາດ ຄົບຮອບ 29 ປີ ໃຫ້ມີບັນຍາກາດອັນເບີກບານມ່ວນຊື່ນ ແລະ ເພື່ອສ້າງຄວາມສາມັກຄີລະຫວ່າງພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຫ້ອງການສຶກສາທິການ ແລະ ກິລາ 9 ເມືອງ, ໂຮງຮຽນຂຶ້ນກັບ ແລະ ບັນດາພາກສ່ວນອື່ນໆທີ່ຢູ່ໃນຂະແໜງການສຶກສາເພື່ອປະຕິບັດຕາມແຜນກິດຈະກຳທີ່ວາງໄວໃຫ້ປະສົບຜົນສຳເລັດຮ່ວມກັນ ຊຶ່ງການແຂ່ງຂັນກິລາໃນຄັ້ງນີ້ ມີ 36 ທີມເຂົ້າຮ່ວມການແຂ່ງຂັນແມ່ນແບ່ງອອກເປັນ 2 ສາຍ, ແຕ່ລະສາຍແບ່ງອອກເປັນ 18 ທີມ, ກຳນົດເອົາ 11 ຄະແນນ, ເສຍຄັດອອກໃນຮອບຕໍ່ໄປ.

ຜ່ານການແຂ່ງຂັນຜົນປະກົດວ່າ: ຊະນະເລີດ ສະມາຄົມໂຮງຮຽນພາກເອກະຊົນ ໄດ້ຮັບຂັນ 1 ໜ່ວຍ ພ້ອມເງິນລາງວັນ 6 ແສນກີບ, ອັນດັບທີ 2 ຫ້ອງການສຶກສາທິການ ແລະ ກິລາ ເມືອງນາຊາຍທອງ ໄດ້ຮັບຂັນ 1 ໜ່ວຍ ພ້ອມເງິນລາງວັນ 5 ແສນກີບ, ອັນດັບທີ 3 ຂະແໜງບໍລິຫານ-ການເງິນ ໄດ້ຮັບຂັນ 1 ໜ່ວຍ ພ້ອມເງິນລາງວັນ 3 ແສນກີບ ແລະ ລາງວັນຊົມເຊີຍ 2 ແສນກີບ ໄດ້ແກ່ຫ້ອງການສຶກສາທິການ ແລະ ກິລາ ເມືອງສີສັດຕະນາກ.

ໂດຍ: ສີວອນ (ສຶກສາ-ກິລາ ນວ)