ຄູອາຈານຂອງໂຮງຮຽນໃນປະເທດຍີ່ປຸ່ນ ລາປ່ວຍເພີ່ມຂຶ້ນສູງ ຈາກອາການດ້ານຈິດໃຈ
ລັດຖະບານຍີ່ປຸ່ນ ເປີດເຜີຍຜົນຂອງການສໍາຫຼວດວ່າ ຈຳນວນຄູອາຈານທີ່ຕ້ອງລາພັກ ຍ້ອນອາການທາງດ້ານຈິດໃຈທີ່ເກີດຂຶ້ນຢູ່ໃນໂຮງຮຽນຂອງພາກລັດນັ້ນ ເພີ່ມຂຶ້ນເປັນສະຖິຕິສູງສຸດ 6.539 ຄົນ ໃນປີງົບປະມານ 2022 ໂດຍອ້າງເຖິງເຫດຜົນທີ່ມີຄວາມເປັນໄປໄດ້. ທັງນີ້, ກໍຍ້ອນວ່າ ຄູມີພາລະໜ້າທີ່ຄວາມຮັບຜິດຊອບເພີ່ມຂຶ້ນ ທ່າມກາງການລະບາດຂອງພະຍາດໂຄວິດ-19.
ກະຊວງສຶກສາຂອງຍີ່ປຸ່ນເປີດເຜີຍວ່າ: ໃນປີງົບປະມານ 2022, ນັບເຖິງເດືອນມີນາ 2023 ຈຳນວນຄູສອນທີ່ເຈັບປ່ວຍທາງຈິດໃຈໄດ້ເພີ່ມຂຶ້ນ 642 ຄົນ ຈາກປີ 2021 ຊຶ່ງເປັນປີທີສອງເພີ່ມຂຶ້ນຕິດຕໍ່ກັນ ຕົວເລກນີ້ກວມເອົາ 0,71% ຂອງຄູທັງໝົດໃນໂຮງຮຽນປະຖົມ, ມັດທະຍົມຕອນຕົ້ນ ແລະ ມັດທະຍົມຕອນປາຍ, ລວມທັງໂຮງຮຽນສຳລັບເດັກພິເສດ ຫຼື ປະມານ 1 ໃນ 140 ຄົນ.
ທັງນີ້, ຈຳນວນຄູອາຈານທີ່ລາອອກວຽກຈາກອາການເຈັບປ່ວຍທາງຈິດໃຈ ມີຢູ່ປະມານ 5.000 ຄົນໃນບໍ່ເທົ່າໃດປີທີ່ຜ່ານມາ ແຕ່ມັນເພີ່ມຂຶ້ນຫຼາຍກວ່າ 1.300 ຄົນ ໃນ 2 ປີ ນັບຕັ້ງແຕ່ປີງົບປະມານ 2020 ຊຶ່ງເປັນຈຸດເລີ່ມຕົ້ນຂອງການແຜ່ລະບາດຂອງໂຄວິດ-19.
ຜູ້ຊ່ຽວຊານດ້ານການສຶກສາກ່າວວ່າ: ຈໍານວນຄູສອນທີ່ເຈັບປ່ວຍທາງຈິດໃຈແມ່ນເພີ່ມຂຶ້ນ ໂດຍສ່ວນໜຶ່ງແມ່ນຍ້ອນຄວາມຮັບຜິດຊອບທີ່ເພີ່ມຂຶ້ນຈາກການລະບາດຂອງພະຍາດໂຄວິດ-19 ເຊັ່ນ: ຄວາມຈຳເປັນໃນການໃຊ້ມາດຕະການປ້ອງກັນການຕິດເຊື້ອ ແຕ່ຍັງໄດ້ລະບຸເຖິງທ່າອ່ຽງໃນຄຳຮ້ອງທີ່ເພີ່ມຂຶ້ນຈາກຜູ້ປົກຄອງຂອງນັກຮຽນດ້ວຍ.
ຜູ້ຊ່ຽວຊານຍັງກ່າວອີກວ່າ: ການຂາດແຄນຄູຢູ່ໃນໂຮງຮຽນແມ່ນເປັນບັນຫາຮ້າຍແຮງໃນປະເທດຍີ່ປຸ່ນ ໂດຍນັກສຶກສາທີ່ຈົບໃໝ່ ແມ່ນຫຼີກລ່ຽງການເຂົ້າສູ່ອາຊີບຄູທີ່ຖືກເບິ່ງວ່າມີພາລະທີ່ໜັກໜ່ວງ. ແຕ່ໃນຂະນະດຽວກັນ, ໄດ້ສັງເກດເຫັນວ່າ ຈຳນວນຄູທີ່ລາວຽກ ແມ່ນເພີ່ມຂຶ້ນ ເນື່ອງຈາກການເຈັບປ່ວຍ ຫຼື ການເກີດລູກ.
https://www.blockdit.com/posts/65bf6bc8fb165a5ab7478e8e
ໂດຍ ມິດລັນດອນ