ຖວທ-ວິທະຍຸໂທລະພາບສູນກາງຈີນ ແລກປ່ຽນດ້ານສື່ມວນຊົນ “ໜຶ່ງແລວ ໜຶ່ງເສັ້ນທາງ ລາວ-ຈີນ ກ້າວເດີນຮ່ວມກັນ”
ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ແລະ ວິທະຍຸໂທລະພາບສູນກາງຈີນ (CMG) ຈັດກອງປະຊຸມແລກປ່ຽນດ້ານສື່ມວນຊົນ ພາຍໃຕ້ຫົວຂໍ້: “ໜຶ່ງແລວ ໜຶ່ງເສັ້ນທາງ ລາວ-ຈີນ ກ້າວເດີນຮ່ວມກັນ” ເມື່ອວັນທີ 20 ພະຈິກ 2023 ທີ່ໂຮງແຮມແລນມາກ ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມຂອງຂອງທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແລະ ທ່ານ ຫູຈິ້ງຈຸ່ນ ຮອງປະທານວິທະຍຸໂທລະພາບສູນກາງຈີນ, ມີບັນດາຄະນະນໍາທີ່ກ່ຽວຂ້ອງ ແລະ ສື່ມວນຊົນເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ໂພສີ ແກ້ວມະນີວົງ ແລະ ທ່ານ ຫູຈິ້ງຈຸ່ນ ໄດ້ຜັດປ່ຽນກັນມີຄຳເຫັນ ໂດຍໄດ້ຍົກໃຫ້ເຫັນຄວາມໝາຍຄວາມສຳຄັນ ແລະ ຜົນປະໂຫຍດທີ່ໄດ້ຮັບຈາກຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ, ທ່ານ ໂພສີ ແກ້ວມະນີວົງ ກ່າວວ່າ: ການຈັດກອງປະຊຸມໃນຄັ້ງນີ້ ໄດ້ດຳເນີນການແລກປ່ຽນ ແລະ ການຮ່ວມມືກັນຢ່າງເລິກເຊິ່ງ ໂດຍປິ່ນອ້ອມຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ນັ້ນເປັນການຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບກັນລະຫວ່າງຜູ້ນຳສອງປະເທດ ແລະ ສັນຍາລະຫວ່າງສື່ມວນຊົນສອງພາກສ່ວນພວກເຮົາຢ່າງເປັນຮູບປະທຳ. ພວກເຮົາມີຄວາມຫວັງເປັນຢ່າງຍິ່ງວ່າ ບົນພື້ນຖານຈຸດເລີ່ມຕົ້ນທີ່ສູງໃນປັດຈຸບັນຈະໄດ້ລົງເລິກການຮ່ວມມືກັບວິທະຍຸໂທລະພາບສູນກາງຈີນ, ຊົມໃຊ້ຂໍ້ມູນຂ່າວສານຮ່ວມກັນ, ແລກປ່ຽນໃນດ້ານບຸກຄະລາກອນ, ຮັກສາການຕິດຕໍ່ພົວພັນໃນຂົງເຂດຕ່າງໆ ເຊັ່ນ: ວິທະຍຸ, ໂທລະພາບ ແລະ ໜັງສືພິມເປັນຕົ້ນ, ຍົກລະດັບການຮ່ວມມືໃຫ້ສູງຂຶ້ນ.
ທ່ານ ຫູຈິ້ງຈຸ່ນ ໄດ້ກ່າວວ່າ: ຫວ່າງກ່ອນນີ້ບໍ່ດົນ, ໃນກອງປະຊຸມສຸດຍອດເວທີປຶກສາຫາລືການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ຄັ້ງທີ 3, ທ່ານ ສີຈິ້ນຜິງ ແລະ ທ່ານ ທອງລຸນ ສີສຸລິດ ໄດ້ຮ່ວມກັນລົງນາມໃນ “ແຜນການດຳເນີນງານ ວ່າດ້ວຍການສ້າງຄູ່ຮ່ວມຊະຕາກຳຈີນ-ລາວ”, ສ້າງໂອກາດສຳຄັນໃຫ້ແກ່ການລົງເລິກການຮ່ວມມືຂົງເຂດສື່ມວນຊົນ. ໃນຖານະເປັນຜູ້ປະກອບການສື່ມວນຊົນໃນຍຸກໃໝ່, CMG ຍິນດີຮ່ວມກັບບັນດາເພື່ອນຮ່ວມງານ ແລະບັນດາເພື່ອນມິດ, ເພີ່ມແຮງຂັບເຄື່ອນໃໝ່ເຂົ້າໃນການຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ”, ປະກອບສ່ວນຫຼາຍກວ່າເກົ່າເຂົ້າໃນການລົງເລິກສາຍພົວພັນແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນກັບລາວ, ສືບຕໍ່ສ້າງເວທີສົນທະນາ ແລະ ແລກປ່ຽນອະລິຍະທຳແບບຂ້າມພາກພື້ນ ແລະ ເຄົາລົບຄວາມແຕກຕ່າງດ້ານອະລິຍະທຳ, ຊຸກຍູ້ການເຊື່ອມໂຍງຈິດໃຈປະຊາຊົນ, ຮ່ວມແຮງຮ່ວມໃຈກັນ, ປະກອບສ່ວນເຂົ້າໃນການແລກປ່ຽນອະລິຍະທຳລະຫວ່າງຈີນ ແລະ ລາວ.
ໃນກອງປະຊຸມ, ທ່ານ ຄຳເຜີຍ ພິລາພາ ຜູ້ອຳນວຍການໃຫຍ່ສໍານັກຂ່າວສານປະເທດລາວ, ທ່ານ ອຳຄາ ວົງໝື່ນກ້າ ຜູ້ອຳນວຍການໂທລະພາບແຫ່ງຊາດລາວ ໃນນາມຜູ້ຕາງໜ້າສື່ມວນຊົນລາວ ແລະ ຜູ້ຕາງໜ້າຝ່າຍຈີນ ທ່ານ ນາງ ຈ່າງຮຸຍ ຮອງຫົວໜ້າສູນອາຊີອາຝຣິກກາຂອງ CMG ຕ່າງກໍໄດ້ປະກອບຄຳເຫັນກ່ຽວກັບກາລະໂອກາດ ແລະ ສິ່ງທ້າທາຍທີ່ສື່ມວນຊົນກຳລັງປະເຊີນໜ້າໃນຂະບວນການສ້າງສາ “ໜຶ່ງແລວ ໜຶ່ງເສັ້ນທາງ”. ພ້ອມກັນນັ້ນ, ທ່ານ ໂພສີ ແກ້ວມະນີວົງ ແລະ ທ່ານ ຫູຈິ້ງຈຸ່ນ ໄດ້ຮ່ວມກັນເປີດປ້າຍໃຫ້ແກ່ການສ້າງສູນຝຶກອົບຮົມນັກວິເຄາະຂ່າວລາວ ເພື່ອຮ່ວມກັນຝຶກອົບຮົມວິຊາການດ້ານສື່. ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ປປ ລາວ, ຫົວໜ້າບັນນາທິການໃຫຍ່ໜັງສືພິມປະຊາຊົນ, ທ່ານ ຫວາງຊ້າງ ອຸປະທູດຈີນປະຈຳ ສປປ ລາວ ພ້ອມດ້ວຍຜູ້ຮັບຜິດຊອບຈາກກະຊວງ ຖວທ, ກະຊວງການຕ່າງປະເທດ, ສື່ມວນຊົນລາວ ກໍຄື ຜູ້ຮັບຜິດຊອບຂອງ CMG ປະຈຳອາຊີປາຊີຟິກ, ສູນອາຊີອາຝຣິກກາ, ກົມພົວພັນຕ່າງປະເທດ, ສູນລາຍການພາສາຈີນຂອງ CMG ກໍຄື CMG ປະຈຳກວາງຊີຈີນ ໄດ້ເຂົ້າຮ່ວມກອງປະຊຸມແລກປ່ຽນດ້ານສື່ມວນຊົນ ພາຍໃຕ້ຫົວຂໍ້ “ໜຶ່ງແລວໜຶ່ງ ເສັ້ນທາງ ລາວ-ຈີນ ກ້າວເດີນຮ່ວມກັນ” ເຊັ່ນດຽວກັນ.
ໂດຍ ບົວລະພາ