ຄະນະຮັບຜິດຊອບ ຮ່ວມກັບ ເຈົ້າພາບ ນວ ລົງກວດກາຄວາມພ້ອມສະຖານທີ່ພັກເຊົາຂອງຄະນະນັກກິລາແຂວງຫຼວງພະບາງ

ໃນວັນທີ 7 ພະຈິກ 2025 ນີ້, ຄະນະຮັບຜິດຊອບຂອງແຂວງຫຼວງພະບາງ ຮ່ວມກັບ ເຈົ້າພາບ ນະຄອນຫຼວງວຽງຈັນ  (ນວ) ໄດ້ລົງກວດກາການກະກຽມຄວາມພ້ອມຮອບດ້ານສະຖານທີ່ພັກເຊົາຂອງຄະນະນັກກິລາແຂວງຫຼວງພະບາງ ໂດຍມີທ່ານ ຄຳພັນ ບຸນພັກດີ ຫົວໜ້າຂະແໜງກິລາ ແລະ ສິລະປະ ພະແນກສຶກສາທິການ ແລະ ກິລາແຂວງຫຼວງພະບາງ, ມີຕາງໜ້າຈາກເຈົ້າພາບ ນະຄອນຫຼວງວຽງຈັນ ພ້ອມດ້ວຍຄະນະຮັບຜິດຊອບກ່ຽວຂ້ອງເຂົ້າຮ່ວມ.

ການລົງກວດກາຄວາມພ້ອມຂອງສະຖານທີ່ພັກເຊົາຄັ້ງນີ້ ກໍເພື່ອເປັນການປະເມີນເຖິງຄວາມພ້ອມແຕ່ລະສູນສາມາດບັນຈຸຄະນະນັກກິລາໄດ້ຈຳນວນພົນເທົ່າໃດ ແລະ ໄດ້ຈັກປະເພດ, ທັງນີ້ກໍເພື່ອໃຫ້ຄະນະນັກກິລາມີຄວາມສະດວກ ແລະ ມີຄວາມປອດໄພຮອບດ້ານ, ສຳລັບສະຖານທີ່ພັກເຊົາຂອງຄະນະນັກກິລາແຂວງຫຼວງພະບາງ ທາງເຈົ້າພາບ ໄດ້ກຳນົດໃຫ້ມີ 3 ສູນຄື ສູນເຮືອນພັກທອງໃບ 1, ສູນພັດທະນາສີມືແຮງງານລາວ-ເກົາຫຼີ  ເຂດຄຳຮຸ່ງ ແລະ ສູນເຮືອນພັກໃສສະຫວ່າງ ບ້ານສະຫວ່າງ, ໃນນີ້ສູນເຮືອນພັກທອງໃບ 1 ມີທັງໝົດ 27 ຫ້ອງ, ສາມາດບັນຈຸຄະນະນັກກິລາໄດ້ 52 ຄົນ , ສູນພັດທະນາສີມືແຮງງານລາວ-ເກົາຫຼີ ມີທັງໝົດ 3 ຕຶກ ສາມາດບັນຈຸໄດ້ 208 ຄົນ ແລະ ສູນເຮືອນພັກສະຫວ່າງມີທັງໝົດ 31 ຫ້ອງ ສາມາດບັນຈຸໄດ້ 62 ຄົນ, ມາຮອດປັດຈຸບັນທັງ 3 ສູນແມ່ນມີຄວາມພ້ອມ 100 ເປີເຊັນ.

ໂດຍ: ສອນອາຄົມ ແກ້ວຄຳເພັດ ສກຂ ຫຼວງພະບາງ