ທັບນັກກິລາບານເຕະ ເຈົ້າພາບ ຂໍພອນສິ່ງສັກສິດສ້າງຂວັນກຳລັງໃຈກຽມລ່າຫຼຽນຄຳ “ນະຄອນຫຼວງວຽງຈັນ ເກມ 2025”

ທັບນັກກິລາບານເຕະ ເຈົ້າພາບ ນະຄອນຫຼວງວຽງຈັນ (ນວ) ນຳໂດຍ ທ່ານ ບຸນມີ ຫຼ່ຽມໄຊຍະຈັກ ຮອງປະທານສະຫະພັນບານເຕະ ນະຄອນຫຼວງວຽງຈັນ ແລະ ທ່ານ ບຸນລັບ ເຄນກິຕິສັກ ຫົວໜ້າຄູຝຶກໃຫຍ່ ທັບບານເຕະ ນວ ພ້ອມດ້ວຍຄະນະ ແລະ ນັກກິລາ ໄດ້ໄປກາບໄຫວ້ຂໍພອນສິ່ງສັກສິດຈາກເຈົ້າແມ່ສີເມືອງ ທີ່ວັດສີເມືອງ ແລະ ພຣະທາດຫຼວງວຽງຈັນ ໃນຕອນເຊົ້າວັນທີ 10 ພະຈິກ 2025 ເພື່ອຄວາມເປັນສີຣິມຸງຄຸນສ້າງຂວັນກຳລັງໃຈໃຫ້ທັບນັກກິລາ ກຽມຮ່ວມສ້າງຜົນງານໄລ່ລ່າຫຼຽນຄຳ ງານມະຫະກຳກິລາແຫ່ງຊາດ ຄັ້ງທີ 12 ທີ່ນະຄອນຫຼວງວຽງຈັນ ຮັບກຽດເປັນເຈົ້າພາບ ລະຫວ່າງວັນທີ 15-25 ພະຈິກ 2025.

ສຳລັບໂປຣແກຣມການແຂ່ງຂັນຂອງທັບນັກກິລາບານ ນວ ຖືກຈັດຢູ່ກຸ່ມ ຄ ຮ່ວມກັບ ແຂວງບໍ່ແກ້ວ, ແຂວງຫົວພັນ ແລະ ແຂວງອັດຕະປື ຊຶ່ງໃນຮອບຄັດເລືອກໃນນັດທຳອິດຈະລົງສະໜາມພົບກັບ ແຂວງອັດຕະປື ໃນວັນທີ 12 ພະຈິກ 2025 ເວລາ 15:00 ໂມງ, ນັດທີ 2 ເຈົ້າພາບ ນວ ຈະລົງສະໜາມພົບກັບ ແຂວງຫົວພັນ ໃນວັນທີ 14 ພະຈິກ 2025 ເວລາ 15:00 ໂມງ ແລະ ນັດສຸດທ້າຍ ເຈົ້າພາບ ນວ ຈະລົງສະໜາມ ພົບກັບ ແຂວງບໍ່ແກ້ວ ໃນວັນທີ 17 ພະຈິກ 2025 ເວລາ 15:00 ໂມງ ທັງ 3 ນັດ ຈະແຂ່ງຂັນທີ່ສະໜາມບານເຕະຫຍ້າທຽມ ລ້ານຊ້າງ ສະເຕດ້ຽມ ເຂດບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ.

ພາບ-ຂ່າວ ໂດຍ: ສົງການ ພັນແພງດີ