ສອງພາກສ່ວນ ມອບເງິນໃຫ້ແຂວງບໍລິຄຳໄຊ ນໍາໃຊ້ສົ່ງນັກກິລາເຂົ້າຮ່ວມ ງານກິລາແຫ່ງຊາດ ຄັ້ງທີ XII

ໃນຕອນເຊົ້າວັນທີ 10 ພະຈິກ 2025 ຢູ່ທີ່ຫ້ອງຮັບແຂກຫ້ອງວ່າການແຂວງ, ບັນດາບໍລິສັດ-ວິສາຫະກິດ ພາຍໃນແຂວງບໍລິຄໍາໄຊ ໄດ້ສືບຕໍ່ມອບທຶນຮອນ ໃຫ້ກັບອົງການປົກຄອງແຂວງບໍລິຄໍາໄຊ ເພື່ອນໍາໃຊ້ເຂົ້າໃນການສົ່ງຄະນະນຳ, ຄູຝຶກ ແລະ ນັກກິລາ ເຂົ້າຮ່ວມແຂ່ງຂັນໃນງານມະຫະກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ເປັນເຈົ້າພາບ ລະຫວ່າງວັນທີ 15-25 ພະຈິກ 2025. ຊຶ່ງປະກອບມີ ບໍລິສັດ ກາວິໂກ ມອບ ເງິນສົດຈໍານວນ 50.000.000 ກີບ ແລະ ບໍລິສັດ ພີເອັດແອວກຣຸບ (PSL) ມອບເງິນສົດ ຈໍານວນ 100.000.000 ກີບ, ຕາງໜ້າຮັບໂດຍ ທ່ານ ສົມໃຈ ຄຸນພະໄຊ ຮອງປະທານຄະນະກໍາມະການປົກຄອງແຂວງ, ມີບັນດາພະແນກການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ໂອກາດດັ່ງກ່າວ, ທ່ານຮອງປະທານຄະນະກໍາມະການປົກຄອງແຂວງ ຕາງໜ້າໃຫ້ກັບການນໍາຂອງແຂວງ ຍັງໄດ້ກ່າວສະແດງຄວາມຂອບອົກຂອບໃຈ ແລະ ສະແດງຄວາມຍ້ອງຍໍຊົມເຊີຍເປັນຢ່າງສູງມາຍັງບໍລິສັດ-ວິສາຫະກິດ ກໍຄືພາກສ່ວນຕ່າງໆພາຍໃນສັງຄົມ ທີ່ເຫັນໄດ້ຄວາມໝາຍຄວາມສໍາຄັນ ແລະ ຄວາມຈໍາເປັນ ຕໍ່ກັບວຽກງານກິລາ-ກາຍຍະກໍາ ນໍາເອົາທຶນຮອນເຈົ້ານວນດັ່ງກ່າວມອບໃຫ້ຕະຫຼອດໄລຍະຜ່ານມາ ເພື່ອເປັນການສັນລະເສີນຕໍ່ກັບຜົນງານ ແລະ ຄຸນງາມຄວາມດີດັ່ງກ່າວ ທ່ານຮອງປະທານຄະນະກໍາມະການປົກຄອງແຂວງ ຍັງໄດ້ໃຫ້ກຽດມອບໃບຍ້ອງຍໍຂອງທ່ານ ເຈົ້າແຂວງບໍລິຄໍາໄຊ ໃຫ້ກັບບໍລິສັດ ທີ່ໃຫ້ການອຸປະຖໍາໃນຄັ້ງນີ້ຕື່ມອີກ.

ພາບ/ຂ່າວ: ຄຳຟອງ (ໜັງສືພິມບໍລິຄຳໄຊ)