ຄຳມ່ວນ ຖະຫຼົ່ມແຊ໋ມເກົ່າ ວຽງຈັນ ເຄິ່ງໂຫຼ ສ່ວນເຊກອງ ມີໄຊເໜືອ ບໍລິຄຳໄຊ 3-1 ບານເຕະຊາຍ ນະຄອນຫຼວງວຽງຈັນ ເກມ 2025

ການແຂ່ງຂັນເຕະບານຊາຍ ຮອບຄັດເລືອກ ງານມະຫະກຳກິລາແຫ່ງຊາດ ຄັ້ງທີ 12 ຫຼື ນະຄອນຫຼວງວຽງຈັນ ເກມ 2025 ແຂວງຄຳມ່ວນ ຖະຫຼົ່ມແຊ໋ມເກົ່າ ແຂວງວຽງຈັນ ໄປແບບຂາດຮອຍເຄິ່ງໂຫຼ ສ່ວນແຂວງເຊກອງ ປະເດີມສະໜາມນັດທຳອິດ ມີໄຊເໜືອ ແຂວງບໍລິຄຳໄຊ 3-1 ປະຕູ

ການແຂ່ງຂັນບານເຕະຊາຍ ນະຄອນຫຼວງວຽງຈັນ ເກມ 2025 ຈັດຂຶ້ນໃນຕອນແລງວັນທີ 11 ພະຈິກ 2025 ຊຶ່ງມີການແຂ່ງຂັນ 4 ຄູ່ ຈາກ 4 ສະໜາມ ໂດຍສະເພາະຢູ່ທີ່ສະໜາມກິລາບານເຕະຫຍ້າທຽມ ລ້ານຊ້າງ, ແຂວງຄຳມ່ວນ ປະເດີມສະໜາມນັດທຳອິດ ສົມຄາລາແຊ໋ມເກົ່າຫຼຽນຄຳ ປີ 2014 ໄລ່ຖະຫຼົ່ມ ແຂວງວຽງຈັນ ແຊ໋ມເກົ່າຫຼຽນຄຳຫຼ້າສຸດ ປີ 2022 ໄປແບບຂາດຮອຍ 6-0 ປະຕູ ຫຍັບຂຶ້ນເປັນທີ 1 ຂອງກຸ່ມ ຂ.

ຂະນະທີ່ ຜົນອີກຄູ່ໃນກຸ່ມ ຂ ຄືກັນແຂ່ງຂັນທີ່ສະໜາມກິລາແຫ່ງຊາດ ຫຼັກ16 (ສະໜາມນອກ) ພິກລ໋ອກແຂວງສາລະວັນ ຖືກ ແຂວງຫຼວງນໍ້າທາ ສອຍທ້າຍເກມ 1-0  ປະຕູ ສ່ວນຢູ່ທີ່ສະໜາມກິລາກາງ ມຊ ແຂວງເຊກອງ ໄລ່ຕ້ອນ ແຂວງບໍລິຄຳໄຊ 3-1 ປະຕູ ແລະ ທີ່ສະໜາມກິລາກອງທັບ (ຫຼັກ5) ແຂວງສະຫວັນນະເຂດ ສະເໝີ ແຂວງໄຊຍະບູລີ 1-1 ປະຕູ.

ຂ່າວໂດຍ: ສົງການ ພັນແພງດີ