ພີເອັມເອັດ ເທຄວັນໂດ ສ້າງປະຫວັດສາດ ຄອງຂັນຊະນະເລີດ ທ່ານເອກອັກຄະລັດຖະທູດ ສ.ເກົາຫຼີ ປະຈຳລາວ ສະໄໝທຳອິດ

ສະໂມສອນ ພີເອັມເອັດ ເທຄວັນໂດ (PMS) ກວາດ 11 ຫຼຽນຄຳ ແລະ 11 ຫຼຽນທອງ ສ້າງຜົນງານປະຫວັດສາດໃນວົງການກິລາເທຄວັນໂດລາວ ຄອງຂັນຊະນະເລີດ ການແຂ່ງຂັນເທຄວັນໂດ ຊີງແຊ້ມທົ່ວປະເທດ ຊີງຂັນທ່ານເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ ຄັ້ງທີ 10 ປະຈຳປີ 2026 ສະໄໝທຳອີດ ຂະນະທີ່ ອັນດັບທີ 2 ຕົກເປັນນັກກິລາເທຄວັນໂດ ແຂວງຈຳປາສັກ ທີ່ສາມາດສ້າງຜົນງານຄວ້າ 9 ຫຼຽນຄຳ, 5 ຫຼຽນເງິນ ແລະ 6 ຫຼຽນທອງ.

ການແຂ່ງຂັນເທຄວັນໂດ ຊີງແຊ້ມທົ່ວປະເທດ ຊີງຂັນທ່ານເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ ຄັ້ງທີ 10 ປະຈຳປີ 2026 ຈັດຂຶ້ນ ລະຫວ່າງວັນທີ 5-6 ກັນຍາ 2026 ທີ່ສູນການຄ້າ ພາກຊັນ ເພື່ອເປັນການສ້າງໂອກາດໃຫ້ເຍົາວະຊົນ-ໄວໜຸ່ມນັກກິລາເທຄວັນໂດລາວ ໄດ້ມີການເຄື່ອນໄຫວພັດທະນາຕົນເອງຢ່າງຕໍ່ເນື່ອງ ເພື່ອກ້າວຂຶ້ນເປັນນັກກິລາທີມຊາດ ແລະ ກ້າວສູ່ລະດັບເວທີສາກົນໃນອະນາຄົດ ໂດຍໃຫ້ກຽດເຂົ້າຮ່ວມມີທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ ທັງເປັນຮອງປະທານຄະນະກຳມະການໂອແລມປິກແຫ່ງຊາດລາວ, ທ່ານ ອີຈອງເຮີບ ເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ, ທ່ານ ປະສາດໄຊ ພິລາພັນເດດ ປະທານສະຫະພັນເທຄວັນໂດແຫ່ງຊາດລາວ ຕາງໜ້າຫົວໜ້າກົມກິລາລະດັບສູງ ພ້ອມດ້ວຍຄະນະບໍລິຫານງານສະຫະພັນ, ສະຫະພັນແຂວງ/ນະຄອນຫຼວງ ແລະ ບັນດາສະໂມສອນ ອ້ອມຂ້າງສູນກາງເຂົ້າຮ່ວມ.

ການແຂ່ງຂັນເທຄວັນໂດ ຊີງແຊ້ມປະເທດລາວ ປີນີ້ ມີນັກກິລາຫຼາຍກວ່າ 450 ຄົນ ຈາກ 20 ກວ່າພາກສ່ວນ ທີ່ມາຈາກໃນຂອບເຂດທົ່ວປະເທດເຂົ້າຮ່ວມຊີງໄຊ ແລະ ມີການຊີງໄຊ 135 ລາຍການ ຈາກປະເພດຕໍ່ສູ້ປ້ອງກັນຕົວ, ປະເພດຟ້ອນປຸ້ມເຊ້ ແລະ ປະເພດປະກອບອຸປະກອນ ຜ່ານການແຂ່ງຂັນ ໃນໄລຍະ 2 ວັນ ຜົນປະກົດວ່າ: ຂັນຊະນະເລີດ ປີນີ້ ຕົກເປັນຂອງສະໂມສອນ ພີເອັມເອັດ (PMS) ສາມາດກວາດ 11 ຫຼຽນຄຳ ແລະ 11 ຫຼຽນທອງ ສ້າງຜົນງານປະຫວັດສາດໃນວົງການກິລາເທຄຄັວນໂດລາວ ສ່ວນອັນດັບທີ 2 ເປັນຂອງແຂວງຈຳປາສັກ ທີ່ສາມາດສ້າງຜົນງານຄວ້າ 9 ຫຼຽນຄຳ, 5 ຫຼຽນເງິນ ແລະ 6 ຫຼຽນທອງ ແລະ ອັນດັບທີ 3 ເປັນຂອງສະໂມສອນ ລ້ານຊ້າງ ຍາດໄດ້ 7 ຫຼຽນຄຳ, 1 ຫຼຽນເງິນ ແລະ 5 ຫຼຽນທອງ.

ພາບ-ຂ່າວ ໂດຍ ສົງການ ພັນແພງດີ