ປະທານ ຄພລ ລົງຕິດຕາມທັບນັກກິລາຄົນພິການລາວ ກຽມຮ່ວມ ອາຊຽນພາຣາເກມ ທີ່ປະເທດໄທ

ປະທານຄະນະກຳມະການພາຣາແລມປິກແຫ່ງຊາດລາວ ຫຼື ຄພລ ພ້ອມດ້ວຍຄະນະ ໄດ້ລົງຕິດຕາມ ແລະ ໃຫ້ກຳລັງໃຈທັບນັກກິລາ 3 ປະເພດ ປະກອບມີ ກິລາບອດເຊຍ, ກິລາດອກປີກໄກ່ ແລະ ກິລາເທັນນິດ ເພື່ອເປັນກຳລັງໃຈໃຫ້ນັກກິລາໄດ້ກຽມຄວາມພ້ອມເຂົ້າຮ່ວມສ້າງຜົນງານໃນການແຂ່ງຂັນກິລາຄົນພິການອາຊຽນ ຫຼື ອາຊຽນພາຣາເກມ ຈະຈັດຂື້ນທີ່ປະເທດໄທ ໃນຕົ້ນປີ 2026 ນີ້.

ໂອກາດນີ້, ທ່ານ ນາງ ຂັນທະລີ ສີຣິພົງພັນ ປະທານ ຄພລ ໄດ້ກ່າວວ່າ: ການລົງມາຄັ້ງນີ້ ກໍເພື່ອເປັນຫ່ວງເປັນໃບ ແລະ ຢ້ຽມຢາມຖາມຂ່າວ, ຕິດຕາມຊີວິດການເປັນຢູ່ຂອງທັບນັກກິລາຄົນພິການລາວ ໃນໂອກາດດັ່ງກ່າວ ປະທານ ຄພລ ກໍຍັງໄດ້ຮຽກຮ້ອງໃຫ້ຄູຝຶກ ແລະ ນັກກິລາມີຄວາມເອົາໃຈໃສ່ຕໍ່ການຝຶກແອບຝຶກຊ້ອມ ແລະ ເພີ່ມທະວີການເອົາໃຈໃສ່ຈັດຕັ້ງປະຕິບັດຕາມຕາຕະລາງແຜນການຝຶກຊ້ອມໃຫ້ເປັນຢ່າງດີ ເພື່ອພັດທະນາຕົນເອງໃຫ້ດີກວ່າເກົ່າ ກຽມເຂົ້າຮ່ວມຍາດຜົນງານໃນການແຂ່ງຂັນກິລາຄົນພິການອາຊຽນ ຫຼື ອາຊຽນພາຣາເກມ ຈະຈັດຂຶ້ນທີ່ປະເທດໄທ ໃນຕົ້ນປີ 2026 ນີ້ ສ້າງກຽດສັກສີ ແລະ ຊື່ສຽງມາສູ່ປະເທດຊາດ.

ຂ່າວໂດຍ: ສົງການ ພັນແພງດີ