ອອກເດີນທາງແລ້ວ ທັບນັກກິລາລາວ ຮ່ວມງານກິລານັກຮຽນອາຊຽນ ຄັ້ງທີ 14 ທີ່ບຣູໄນ

ໃນຕອນເຊົ້າວັນທີ 18 ພະຈິກ 2025 ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ, ຄະນະນຳ, ຄູຝຶກ ແລະ ນັກກິລາ ນັກຮຽນລາວ ຈຳນວນ 37 ທ່ານ ນຳໂດຍ ທ່ານ ຫຼອດສະຖິດ ສຸກຂະຜົນ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ໄດ້ອອກເດີນທາງເປັນທີ່ຮຽບຮ້ອຍ ເພື່ອເຂົ້າຮ່ວມແຂ່ງຂັນງານກິລານັກຮຽນອາຊຽນ ຄັ້ງທີ 14 ລະຫວ່າງວັນທີ 20-28 ພະຈິກ 2025 ທີ່ປະເທດບຣູໄນ ດາລູຊາລາມ. ແນວໃດກໍຕາມ ຍັງມີຄະນະນຳ ອີກຈຳນວນໜຶ່ງ ແມ່ນຈະອອກເດີນທາງໃນມື້ອື່ນ (19 ພະຈິກ 2025) ເພື່ອເຂົ້າຮ່ວມພິທີເປີດໃນຕອນແລງວັນທີ 20 ພະຈິກ 2025

ສຳລັບ ສປປ ລາວ ແມ່ນສົ່ງ 4 ປະເພດກິລາເຂົ້າຮ່ວມແຂ່ງຂັນ ປະກອບດ້ວຍ ກິລາແລ່ນ-ລານ, ປັນຈັກສີລັດ, ດອກປີກໄກ່ ແລະ ກິລາກະຕໍ້ ຊຶ່ງລວມມີຄະນະນຳ, ກອງເລຂາ, ຄູຝຶກ ແລະ ນັກກິລາ ທັງໝົດ 42 ທ່ານ ໂດຍຕັ້ງເປົ້າຈະສູ້ຊົນຍາດໃຫ້ໄດ້ 1 ຫຼຽນຄຳ, 2 ຫຼຽນເງິນ ແລະ 2 ຫຼຽນທອງ.

ຂ່າວ-ພາບ : ຫຼ້າ ສາຍນ້ຳພຽງ