ຫຼວງພະບາງ ຍ້ອງຍໍຜົນງານຄະນະນັກກິລາ ຊຸດຄວ້າ 13 ຫຼຽນຄໍາ, 15 ຫຼຽນເງິນ ແລະ 41 ຫຼຽນທອງ “ນະຄອນຫຼວງວຽງຈັນ ເກມ 2025″

ພິທີສະຫຼຸບຜົນງານການເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ 12 ທີ່ນະຄອນຫຼວງວຽງຈັນ ໄດ້ຈັດຂຶ້ນວັນທີ 28 ພະຈິກ 2025 ທີ່ພັດຕະຄານລ້ານຊ້າງ ນະຄອນ-ຫລວງພະບາງ ໂດຍການເປັນກຽດເຂົ້າຮ່ວມຂອງ ທ່ານ ບຸນເລື່ອມ ມະນີວົງ ເລຂາຄະນະບໍລິຫານງານພັກແຂວງຫລວງພະບາງ ພ້ອມດ້ວຍການນຳຂອງແຂວງ, ຫົວໜ້າ-ຮອງຫົວໜ້າພະແນກການ, ຄະນະນຳ, ຄູຝຶກ, ນັກກິລາ,ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນພິທີ, ທ່ານ ສຸລິເດດ ແກ້ວບົວລະເພັດ ຫົວໜ້າພະແນກສຶກສາທິການ ແລະ ກິລາແຂວງຫລວງພະບາງ ໄດ້ລາຍງານໃຫ້ຮູ້ວ່າ: ງານມະຫະກຳກິລາແຫ່ງຊາດ ແມ່ນເປັນການແຂ່ງຂັນກິລາພາຍໃນປະເທດ ຊຶ່ງຈັດຂຶ້ນທຸກ 3 ປີໂດຍໃນຄັ້ງທີ 12 ທີ່ນະຄອນຫຼວງວຽງຈັນ ເປັນເຈົ້າພາບ, ແຂວງຫລວງພະບາງ ໄດ້ສົ່ງນັກກິລາ ແລະ ຄູຝຶກ ເຂົ້າຮ່ວມທັງໝົດ 387 ຄົນ ແຂ່ງຂັນໃນ 21 ປະເພດກິລາ: ປະກອບມີ: ມວຍສາກົນ, ກະຕໍ້, ບານເຕະຊາຍ, ບານບ້ວງ, ເປຕັງ, ໜ້າເກັກ, ບານສົງ, ດອກປີກໄກ່, ລອຍນ້ຳ, ໜາກເສິກ, ໜາກຂ່າງ, ເທັນນິດ, ປິ່ງປ່ອງ, ວູຊູ, ເທຄວັນໂດ, ຍິງປືນ, ມວຍລາວ, ແລ່ນ-ລານ, ເຮືອຊ່ວງ, ຄາລະເຕໂດ ແລະກັອບ. ຜ່ານການແຂ່ງຂັນຜົນປະກົດວ່າ ທັບນັກກິລາແຂວງຫລວງພະບາງ ສາມາດຍາດໄດ້ 13 ຫຼຽນຄໍາ, 15 ຫຼຽນເງິນແລະ 41 ຫຼຽນທອງ ລວມທັງໝົດ 69 ຫຼຽນ ຈັດຢູ່ອັນດັບທີ 9 ຂອງຕາຕະລາງສະຫຼຸບຫຼຽນ.

ໂອກາດນີ້, ທ່ານ ບຸນເລື່ອມ ມະນີວົງ ໄດ້ມີຄໍາເຫັນຍ້ອງຍໍຊົມເຊີຍຜົນງານທີ່ຄູຝຶກ ແລະນັກກິລາຍາດມາໄດ້ ທັງເນັ້ນໃຫ້ຄະນະຮັບຜິດຊອບ ພ້ອມກັນຖອດຖອນບົດ ຮຽນຈາກການເຂົ້າຮ່ວມແຂ່ງຂັນ ເພື່ອວາງແຜນປັບປຸງບາງບັນຫາຄົງຄ້າງ, ເພື່ອເຮັດໃຫ້ການເຂົ້າຮ່ວມແຂ່ງຂັນໃນງານມະຫາກຳກິລາແຫ່ງຊາດ ທີ່ຈະຈັດຂຶ້ນຢູ່ ແຂວງ ຈໍາປາສັກ ໃນທ້າຍປີ 2028 ໃຫ້ໄດ້ຮັບຜົນດີຫຼາຍກວ່າເກົ່າ, ພ້ອມນັ້ນ ທ່ານໄດ້ຮຽກຮ້ອງໃຫ້ສະຫະພັນກິລາແຕ່ລະປະເພດ ໃຫ້ສືບຕໍ່ຈັດການແຂ່ງຂັນຢ່າງຕໍ່ເນື່ອງ ເພື່ອຄັດເລືອກນັກກິລາໃຫ້ໄດ້ຕາມຄາດໝາຍ, ສ່ວນນັກກິລາເອງ ຕ້ອງສືບຕໍ່ພັດທະນາຕົນເອງຢ່າງຕໍ່ເນື່ອງ ແລະ ອື່ນໆ.

ພາບ+ຂ່າວ: ສອນອາຄົມ ສກຂ ຫຼວງພະບາງ