ມະຫາວິທະຍາໄລສະຫວັນນະເຂດ ປະກາດການຈັດຕັ້ງ ແລະ ແຕ່ງຕັ້ງພະນັກງານດຳລົງຕຳແໜ່ງບໍລິຫານ
29/10/2026
ໃນວັນທີ 28 ຕຸລາ 2026 ທີ່ ວິທະຍາເຂດໜອງຜື ມະຫາວິທະຍາໄລສະຫວັນນະເຂດ ໄດ້ຈັດພິທີປະກາດການຈັດຕັ້ງຂອງ ມະຫາວິທະຍາໄລສະຫວັນນະເຂດ ໂດຍໃຫ້ກຽດເຂົ້າຮ່ວມເປັນປະທາຍຂອງ ທ່ານ ປອ ນາງ ດາລາວອນ ກິດຕິພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ປອ ຕຸດາວັນ ໜໍ່ເມືອງເສດ ຫົວໜ້າກົມຈັດຕັ້ງກະຊວງສຶກສາທິການ ແລະ ກິລາ, ຕາງໜ້າກົມການສຶກສາຊັ້ນສູງ, ພະນັກງານການນຳກະຊວງສຶກສາທິການ ແລະ ກິລາ, ພະແນກການອ້ອມຂ້າງແຂວງ, ຜູ້ຕາງໜ້າສະຖາບັນ ແລະ ວິທະຍາໄລພາກລັດ-ເອກະຊົນ ພ້ອມດ້ວຍພະນັກງານຄູ-ອາຈານ ເຂົ້າຮ່ວມ.
ໃນພິທີ, ທ່ານ ປອ ຕຸດາວັນ ໜໍ່ເມືອງເສດ ໄດ້ຜ່ານດຳລັດຂອງນາຍົກລັດຖະມົນຕີ ເລກທີ 311 ແລະ 322 ພ້ອມທັງຂໍ້ຕົກລົງຂອງລັດຖະມົນຕີ ກະຊວງສຶກສາທິການ ແລະ ກິລາ ວ່າດ້ວຍການແຕ່ງຕັ້ງພະນັກງານດຳລົງຕຳແໜ່ງບໍລິຫານ ຈຳນວນ 6 ທ່ານ ປະກອບມີ ທ່ານ ຮສ.ປອ ສິດທິໄຊ ໄຊຍະວົງ ເປັນຜູ້ອຳນວຍການ ມະຫາວິທະຍາໄລສະຫວັນນະເຂດ; ທ່ານ ຮສ.ປອ ຄຳໂກ້ ວົງອະນັດທາ ເປັນຮອງຜູ້ອຳນວຍການ; ທ່ານ ດົງໃຈ ມະນີພອນ ແລະ ທ່ານ ວິກສອນ ວິລັດດາວົງ ເປັນຮອງຫົວໜ້າຫ້ອງການຄຸ້ມຄອງບໍລິຫານ; ສ່ວນທ່ານ ອຈ.ປອ ນາງ ແລັນຕ້າ ເກດອູ່ຄຳ ແລະ ທ່ານ ອຈ.ປອ ລັດສະໝີ ພອນໄຊ ເປັນຮອງຫົວໜ້າຫ້ອງການຄຸ້ມຄອງວິຊາການ.
ໃນໂອກາດດຽວກັນ ທີ່ປະຊຸມຍັງໄດ້ຮັບຟັງການໂອ້ລົມຈາກທ່ານ ປອ ນາງ ດາລາວອນ ກິດຕິພັນ ເຊິ່ງໄດ້ເນັ້ນໜັກເຖິງຄວາມສຳຄັນຂອງການຈັດຕັ້ງບຸກຄະລາກອນ, ການຍົກສູງຄວາມຮັບຜິດຊອບ ແລະ ຄວາມສາມັກຄີຮ່ວມແຮງກັນ ເພື່ອພັດທະນາມະຫາວິທະຍາໄລໃຫ້ມີຄຸນນະພາບ, ມີປະສິດທິຜົນ ແລະ ຕອບສະໜອງຕໍ່ພາລະກິດດ້ານການສຶກສາຂອງຊາດ.
