ສຳເລັດການແຂ່ງຂັນເທັນນິດ AMBASSADOR CUP 2025 ຄັ້ງທີ 2

ສະຫະພັນກິລາເທັນນິດແຫ່ງຊາດລາວ ຮ່ວມກັບ ANOTHAI SPORTTING CLUB ຈັດການແຂ່ງຂັນເທັນນິດລາຍການ AMBASSADOR CUP 2025 ຄັ້ງທີ 2 ໃນສປປ ລາວ ທີ່ສະໜາມເທັນນິດ ANOTHAI SPORTTING CLUB ທີ່ບ້ານດົງນາໂຊກ ນະຄອນຫຼວງວຽງຈັນ ເມື່ອລະຫວ່າງວັນທີ 6-7 ທັນວາ 2025 ໃຫ້ກຽດເຂົ້າຮ່ວມໂດຍທ່ານ ດາວວອນ ພະຈັນທະວົງ ປະທານສະຫະພັນເທັນນິດແຫ່ງຊາດລາວ ແລະ ທ່ານ ອາແຊນ ອາໂນໄທ ເຈົ້າຂອງສະໜາມເທັນນິດ ອາໂນໄທ ສະປອດຕິງ ຄລັບ ຕະຫຼອດບັນດານັກກິລາຈາກ 12 ຊາດເຂົ້າຮ່ວມ

ການແຂ່ງຂັນລາຍການນີ້ມີນັກກິລາເກືອບ 100 ຄົນ ຈາກ 12 ສັນຊາດ ທີ່ມາຈາກສະຖານທູດປະຈໍາ ສປປ ລາວ ແລະ ຈາກປະເທດໄທເຂົ້າຮ່ວມ ຊຶ່ງລາຍການດັ່ງກ່າວ ແຂ່ງຂັນທັງໝົດ 81 ເກມ ພ້ອມທັງກຳນົດນັກກິລາຍິງຕ້ອງມີອາຍຸ 30 ຂຶ້ນໄປ ແລະ ຊາຍອາຍຸ 40 ຂຶ້ນໄປ ກໍເພື່ອເປັນການສ້າງຄວາມສາມັກຄີ ແລະ ແລກປ່ຽນໃຫ້ນັກກິລາສັນຊາດຕ່າງໆ ທີ່ມາເຮັດວຽກສາຍການທູດ ແລະ ດຳເນີນທຸລະກິດຢູ່ໃນ ສປປ ລາວ ຮ່ວມກັນສະເຫຼີມສະຫຼອງສົ່ງທ້າຍປີ 2025 ແລະ ຕ້ອນຮັບປີໃໝ່ 2026 ພ້ອມທັງເປັນການໂຄສະນາສົ່ງເສີມການທ່ອງທ່ຽວ ຢູ່ ສປປ ລາວ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.

ຜ່ານການແຂ່ງຂັນໃນຮອບຮອງຊະນະເລີດ ລາວ ຊະນະ ອັງກິດ 3-2 ເກມ ແລະ ໄທ ຊະນະ ຝຣັ່ງ 3-2 ເກມ ເຮັດໃຫ້ນັກກິລາທັງສອງຊາດ ລາວ-ໄທ ໂຄຈອນມາພົບກັນໃນນັດຊີງຊະນະເລີດ ແລະ ກໍເປັນ ນັກກິລາເທັນນິດຈາກໄທ ສາມາດເອົາຊະນະ ນັກກິລາເທັນນິດ ຈາກລາວ ໄປແບບຫວຸດຫວິດ 3-2 ເກມ ຄວ້າແຊ໋ມລາຍການນີ້ໄປຄອງ.

ພາບ-ຂ່າວໂດຍ ສົງການ ພັນແພງດີ