ບອດເຊຍຄົນພິການລາວ ຕັ້ງເປົ້າຈະສ້າງຜົນງານຍາດໃຫ້ໄດ້ຫຼຽນໃດໜຶ່ງ ໃນອາຊຽນ ພາຣາເກມ ຄັ້ງທີ 13

ສະຫະພັນກິລາບອດເຊຍຄົນພິການແຫ່ງຊາດລາວ ຈະສົ່ງທັບນັກກິລາບອດເຊຍຄົນພິການທີມຊາດລາວ ທັງໝົດ 4 ຄົນ, ຍິງ 1 ຄົນ ພ້ອມຕັ້ງເປົ້າໝາຍຈະສູ້ຊົນໃຫ້ໄດ້ຫຼຽນໃດຫຼຽນໜຶ່ງ ຊຶ່ງເປັນຫຼຽນປະຫວັດສາດ ເພາະຜ່ານມາບໍ່ເຄີຍຍາດໄດ້ຈັກຫຼຽນ ໃນການເຂົ້າຮ່ວມງານມະຫະກຳກິລາຄົນພິການອາຊຽນ ຫຼື ອາຊຽນ ພາຣາເກມ ຄັ້ງທີ 13 ທີ່ນະຄອນຣາຊະສີມາ ປະເທດໄທ ຮັບກຽດເປັນເຈົ້າພາບ ຈະຈັດຂຶ້ນ ລະຫວ່າງວັນທີ 15-27 ມັງກອນ 2026.

ທ່ານ ຈາຕຸລົມ ສີລິສັກ ຄູຝຶກທັບນັກກິລາບອດເຊຍຄົນພິການທີມຊາດລາວ ໃຫ້ສຳພາດວ່າ: ໃນການກະກຽມຄວາມພ້ອມທັບນັກກິລາບອດເຊຍຄົນພິການທີມຊາດລາວ ເຂົ້າຮ່ວມງານກິລາອາຊຽນ ພາຣາເກມ ຄັ້ງທີ 13 ຄັ້ງນີ້ ມີທັງໝົດ 4 ຄົນ ຈາກ 4 ຄຼາດ, ໃນນັ້ນ ມີນັກກິລາຍິງ 1 ຄົນ ທັງ 4 ຄົນ ແມ່ນໄດ້ມີການເກັບຕົວຝຶກຊ້ອມມາເດືອນກໍລະກົດ 2025 ໂດຍໄດ້ນຳໃຊ້ງົບປະມານຂອງສະຫະພັນເອງໄປກ່ອນໃນເບື້ອງຕົ້ນ ຊຶ່ງຄາດວ່າໄວໆນີ້ ກໍຈະໄດ້ຮັບການຊ່ວຍເຫຼືອຈາກລັດຖະບານຕື່ມອີກ ແລະ ທັງ 4 ຄົນ ກໍລ້ວນແຕ່ເປັນນັກກິລາທີ່ມີຜົນງານທີ່ພົ້ນເດັ່ນໃນການຍາດໄດ້ຫຼຽນຄຳ ຈາກການແຂ່ງຂັນງານກິລາຄົນພິການແຫ່ງຊາດ ຄັ້ງທີ 4 ທີ່ຫາກໍສຳເລັດເມື່ອບໍ່ດົນມານີ້. ແຕ່ເຖິງຢ່າງໃດກໍດີ, ປັດຈຸບັນພວກເຮົາຍັງຂາດແຂນງົບປະມານຈຳນວນໜຶ່ງ ແລະ ກໍຍັງຂາດແມ່ບ້ານເພື່ອດູແລນັກກິລາໃນເລື່ອງອາຫານການກິນ. ສະນັ້ນ ຂໍຮຽກຮ້ອງມາຍັງສັງຄົມລາວ ກໍຄື ຊາວນະຄອນຫຼວງວຽງຈັນ ໃຫ້ການສະໜັບສະໜູນນັກກິລາບອດເຊຍຄົນພິການລາວ ເພື່ອເປັນກຳລັງໃຈໃຫ້ເຂົາເຈົ້າໄດ້ກຽມຄວາມພ້ອມເພື່ອໄປຕໍ່ສູ້ກັບນັກກິລາໃນຊາດອາຊຽນ ສ້າງຜົນງານເປັນກຽດຊື່ສຽງ ແລະ ສັກສີມາສູ້ປະເທດຊາດ.

ສຳລັບນັກກິລາໃນຊຸດນີ້ ປະກອບມີທັງໝົດ 4 ຄົນ ຄື: ນາງ ວຽງສິງ ຫຼວງລາດ ຈາກນະຄອນຫຼວງວຽງຈັນ, ທ້າວ ຄຳສິງ ຂາວອ່ອນ ຈາກແຂວງສະຫວັນນະເຂດ, ທ້າວ ຄຳເງາະ ພົງພະນາ ຈາກແຂວງຫຼວງພະບາງ ແລະ ທ້າວ ຈາໄກ ລີ ຈາກແຂວງໄຊຍະບູລີ.

ໃນການເຂົ້າຮ່ວມງານແຂ່ງຂັນກິລາອາຊຽນ ພາຣາເກມ ຄັ້ງທີ 12 ທີ່ປະເທດກຳປູເຈຍ ປີ 2023 ທັບນັກກິລາບອດເຊຍຄົນພິການທີມຊາດລາວ ບໍ່ສາມາດຍາດໄດ້ຈັກຫຼຽນ.

ພາບ-ຂ່າວໂດຍ ສົງການ ພັນແພງດີ