ຄະນະນຳກົມກິລາມວນຊົນ ເຂົ້າຢ້ຽມພົບປະກັບ ອັກຄະລັດຖະທູດທີ່ປຶກສາ ປະຈຳຫວຽດນາມ ຢູ່ ຮ່າໂນ້ຍ

ໃນວັນທີ 6 ມັງກອນ 2026 ທີ່ນະຄອນຫຼວງຮ່າໂນ້ຍ ສສ ຫວຽດນາມ, ທ່ານ ນາງ ລັດຕະນາ ສີຫາລາດ ອັກຄະລັດຖະທູດທີ່ປຶກສາ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະ ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ ນາງ ຈັນທາ ຫຼວງອາໄພ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ແຫ່ງ ສປປ ລາວ ພ້ອມດ້ວຍຄະນະ ໃນໂອກາດທີ່ເດີນທາງຢ້ຽມຢາມ ແລະ ເຮັດວຽກຢູ່ ສສ ຫວຽດນາມ.

ໃນໂອກາດນີ້ ທັງສອງຝ່າຍໄດ້ມີການປຶກສາຫາລື ກ່ຽວກັບວຽກງານການຮ່ວມມືທາງດ້ານວິຊາການທີ່ກ່ຽວຂ້ອງກັບ ສສ ຫວຽດນາມ ໂດຍສະເພາະແມ່ນການພົວພັນຮ່ວມມື ລະຫວ່າງ ວິທະຍາໄລສິລະປະສຶກສາຂອງ ສປປ ລາວ ແລະ ມະຫາວິທະຍາໄລສ້າງຄູສິລະປະ ຮ່າໂນ້ຍ ຂອງ ສສ ຫວຽດນາມ ໃນໄລຍະຕໍ່ໜ້າ ຊຶ່ງຈະເປັນການປະກອບສ່ວນທີ່ສຳຄັນເຂົ້າໃນການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃນນັບມື້ເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ.

ຂ່າວ-ພາບ: ສະຖານທູດລາວ ທີ່ຮ່າໂນ້ຍ.