ແຂ່ງຂັນບານເຕະຍິງ-ຊາຍ ຊົມເຊີຍຜົນສຳເລັດກອງປະຊຸມໃຫຍ່ ຄັ້ງທີ X ອົງຄະນະພັກ ສສກ ຢ່າງຄຶກຄື້ນ

ກົມຄຸ້ມຄອງວິທະຍາສາດ ຮ່ວມກັບ ກົມອາຊີວະສຶກສາ, ສະຖາບັນຄົ້ນຄວ້າວິທະຍາສາດການສຶກສາ (ສວສ) ແລະ ຫ້ອງການກະຊວງສຶກສາທິການ ແລະ ກິລາ ຫຼື ສສກ ຈັດກິດຈະກຳແຂ່ງຂັນກິລາບານເຕະຍິງ-ຊາຍ ເພື່ອຊົມເຊີຍຜົນສຳເລັດກອງປະຊຸມໃຫຍ່ ຄັ້ງທີ X ຂອງຄະນະພັກກະຊວງ ສສກ ແລະ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ Xll ຂອງພັກປະຊາຊົນ ປະຕິວັດລາວ ພ້ອມທັງເປັນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນແມ່ຍິງສາກົນ ຄົບຮອບ 116 ປີ (8 ມີນາ 1910-8 ມີນາ 2026) ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນຍິ່ງຂຶ້ນ.

ການແຂ່ງຂັນກິລາບານເຕະຍິງ-ຊາຍ ຄັ້ງນີ້ ຈັດຂຶ້ນ ໃນວັນທີ 27 ກຸມພາ ຜ່ານມາ ທີ່ສະໜາມບານເຕະຫຍ້າທຽມ ເບ ສະຫວັນ ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມ ແລະ ມອບລາງວັນໂດຍ ສະຫາຍ ຮສ.ປອ ຫຼ້າວັນ ວົງຄຳສານ ຄະນະປະຈຳພັກກະຊວງ, ຫົວໜ້າຫ້ອງການກະຊວງ ສສກ, ສະຫາຍ ວິໄລພອນ ພົມມະຫາໄຊ ຄະນະປະຈຳພັກກະຊວງ, ຫົວໜ້າກົມອາຊີວະສຶກສາ, ສະຫາຍ ສຸກສະຫວາດ ສີຫາປັນຍາ ຄະນະພັກກະຊວງ, ຫົວໜ້າກົມຄຸ້ມຄອງວິທະຍາສາດ ແລະ ສະຫາຍ ປອ ວົງເພັດ ອຸດົມລິດ ຄະນະພັກກະຊວງ, ຮອງຜູ້ອຳນວຍການສະຖາບັນຄົ້ນຄວ້າວິທະຍາສາດການສຶກສາ ພ້ອມດ້ວຍຕາງໜ້າ 3 ອົງການຈັດຕັ້ງມະຫາຊົນ ຈາກບັນດາພາກສ່ວນຕ່າງໆ ແລະ ພະນັກງານເຂົ້າຮ່ວມຢ່າງເປັນຂະບວນຟົດຟື້ນ.

ການແຂ່ງຂັນຄັ້ງນີ້ ສະເພາະບານເຕະຊາຍ ມີ 4 ພາກສ່ວນ ກຳນົດໃຫ້ມີການຈັບສະຫຼາກປະກົບຄູ່ແຂ່ງຂັນ ເພື່ອຄັດເລືອກເອົາທີມຊະນະ ຜ່ານເຂົ້າຮອບຊີງຊະນະເລີດ ແລະ ທີມເສຍ ໄປຊີງອັນດັບ 3 ສ່ວນບານເຕະຍິງ ກຳນົດໃຫ້ບັນດາພາກສ່ວນ ໂຮມກັນ ໂດຍແບ່ງອອກເປັນ 2 ທີມ ແຂ່ງຂັນ ສຳລັບກົມຄຸ້ມຄອງວິທະຍາສາດ ຮ່ວມກັບ ສະຖາບັນຄົ້ນຄວ້າວິທະຍາສາດການສຶກສາ ແລະ ບໍລິສັດ ລັດວິສາຫະກິດ ໂຮງພິມສຶກສາ ສ່ວນກົມອາຊີວະສຶກສາ ຮ່ວມກັບ ຫ້ອງການກະຊວງ ສສກ.

ຜ່ານການແຂ່ງຂັນຜົນປະກົດ: ທີມຊາຍ ແຊ໋ມຕົກເປັນຂອງ ທີມກົມອາຊີວະສຶກສາ ທີ່ໄລ່ເອົາຊະນະ ສະຖາບັນຄົ້ນຄວ້າວິທະຍາສາດການສຶກສາ ຮ່ວມກັບບໍລິສັດ ລັດວິສາຫະກິດ ໂຮງພິມສຶກສາ ໃນນັດຊີງຊະນະເລີດ 4-3 ປະຕູ ສ່ວນ ທີມຍິງ ແຊ໋ມເປັນຂອງສະຖາບັນຄົ້ນຄວ້າວິທະຍາສາດການສຶກສາ ແລະ ບໍລິສັດ ລັດວິສາຫະກິດ ໂຮງພິມສຶກສາ ຊະນະຈຸດໂທດ ກົມອາຊີວະສຶກສາ ຮ່ວມກັບ ຫ້ອງການກະຊວງ ສສກ 3-0 ປະຕູ ໃນເກມສະເໝີກັນ 1-1 ປະຕູ.

ຂ່າວໂດຍ: ສົງການ ພັນແພງດີ