ແຂວງຈຳປາສັກ ຈັດແຂ່ງຂັນກິລາບານບ້ວງ 3 ລາຍການ ຊີງເງິນລາງວັນລວມ 25 ລ້ານກວ່າກີບ ສະຫຼອງວັນທີ 1 ມິຖຸນາ ຢ່າງຟົດຟື້ນ

ສະຫະພັນກິລາບານບ້ວງແຂວງຈຳປາສັກ ໄດ້ຈັດງານແຂ່ງຂັນກິລາບານບ້ວງມິດຕະພາບລາຍການພິເສດ ຊີງເງິນລາງວັນລວມສູງເຖິງ 25 ລ້ານກວ່າກີບ ເພື່ອເປັນການສ້າງຂະບວນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ (ວັນທີ 1 ມິຖຸນາ 2026) ທີ່ຈະມາເຖິງນີ້ ໃຫ້ບັນຍາກາດໃຫ້ຟົດຟື້ນ, ເບີກບານມ່ວນຊື່ນ ແລະ ເຕັມໄປດ້ວຍຄວາມໝາຍຄວາມສຳຄັນຢ່າງເລິກເຊິ່ງ.

ກິດຈະກຳແຂ່ງຂັນກິລາບານບ້ວງໃນຄັ້ງນີ້ ໄດ້ມີຂຶ້ນໃນວັນທີ 30 ມິຖຸນາ 2026 ທີ່ສະໜາມກິລາບານບ້ວງແຂວງ, ໃຫ້ກຽດເຂົ້າຮ່ວມ ແລະ ມອບລາງວັນໂດຍ ທ່ານ ໂພໄຊ ວົງຄຳຊາວ ຮອງຫົວໜ້າພະແນກສຶກສາທິການ ແລະ ກິລາ ແຂວງຈຳປາສັກ, ພ້ອມດ້ວຍຄະນະບໍລິຫານງານສະຫະພັນກິລາບານບ້ວງແຂວງ, ຄູຝຶກ, ນັກກິລາ ແລະ ກອງເຊຍເຂົ້າຮ່ວມຢ່າງຄຶກຄື້ນ.

ການແຂ່ງຂັນໃນຄັ້ງນີ້ ມີທີມເຂົ້າຮ່ວມຊີງໄຊທັງໝົດ 6 ທີມ ໂດຍແບ່ງອອກເປັນ 3 ລາຍການແຂ່ງຂັນ ຄື: ທີມຊາຍ ຮຸ່ນທົ່ວໄປ ມີ 2 ທີມ, ທີມຍິງ ຮຸ່ນທົ່ວໄປ ມີ 2 ທີມ ແລະ ທີມຊາຍ ຮຸ່ນເຍົາວະຊົນ ມີ 2 ທີມ. ເຊິ່ງບັນຍາກາດຕະຫຼອດການແຂ່ງຂັນແມ່ນເຕັມໄປດ້ວຍຄວາມຟົດຟື້ນ ແລະ ສຽງເຊຍທີ່ດັງສະໜັ່ນທົ່ວສະໜາມ. ນັກກິລາທຸກຄົນ ໂດຍສະເພາະແມ່ນຮຸ່ນເຍົາວະຊົນ ໄດ້ມີໂອກາດສະແດງທັກສະ, ພອນສະຫວັນ ແລະ ຄວາມສາມາດທາງດ້ານກິລາບານບ້ວງຢ່າງເຕັມຂີດຄວາມສາມາດ ພາຍໃຕ້ສະປີຣິດຂອງການແຂ່ງຂັນກິລາ ຮູ້ໄດ້, ຮູ້ເສຍ ແລະ ຮູ້ໃຫ້ອະໄພເຊິ່ງກັນ ແລະ ກັນ.

ນອກຈາກການສ້າງຂະບວນການຂ່ຳນັບຮັບຕ້ອນວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດແລ້ວ, ການແຂ່ງຂັນຄັ້ງນີ້ ຍັງເປັນການທົດສອບລະບົບການຈັດການແຂ່ງຂັນໃຫ້ມີມາດຕະຖານສູງຂຶ້ນ ແລະ ທີ່ສຳຄັນແມ່ນເປັນເວທີຄັດເລືອກເອົານັກກິລາທີ່ມີຄວາມສາມາດ ແລະ ພອນສະຫວັນໂດດເດັ່ນ ທັງໃນຮຸ່ນເຍົາວະຊົນ ແລະ ຮຸ່ນທົ່ວໄປ ເພື່ອເປັນການກະກຽມຄວາມພ້ອມຮອບດ້ານກຽມຕາງໜ້າແຂວງສົ່ງເຂົ້າຮ່ວມແຂ່ງຂັນລາຍການຕ່າງໆທັງລະດັບເມືອງ, ລະດັບແຂວງ ແລະ ລະດັບຊາດ ໃນອະນາດຄົດ ເວົ້າລວມ, ເວົ້າສະເພາະແມ່ນກຽມຄວາມພ້ອມແຕ່ຫົວທີກຽມເຂົ້າຮ່ວມງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 8 ທີ່ແຂວງເຊກອງ ຮັບກຽດເປັນເຈົ້າພາບ ໃນປີ 2027 ແລະ ງານມະຫາກຳກິລາແຫ່ງຊາດ ຄັ້ງທີ 13 ທີ່ແຂວງຈຳປາສັກ ຈະເປັນເຈົ້າພາບ ໃນປີ 2028 ອີກດ້ວຍ.