ສະຫະພັນກິລາກະຕໍ້ແຂວງຈຳປາສັກ ຈັດແຂ່ງຂັນກິລາກະຕໍ້ມິດຕະພາບ ລາວ-ໄທ ຮຸ່ນອາວຸໂສ ເພື່ອຮັດແໜ້ນຄວາມສາມັກຄີ

ເພື່ອເປັນການສົ່ງເສີມການຮ່ວມມື ແລະ ສ້າງສາຍສຳພັນອັນດີງາມທາງດ້ານກິລາລະຫວ່າງສອງຊາດ ລາວ-ໄທ, ໃນວັນທີ 6 ມິຖຸນາ 2026 ທີ່ຜ່ານມາ, ສະຫະພັນກິລາກະຕໍ້ແຂວງຈຳປາສັກ ໄດ້ຈັດງານແຂ່ງຂັນກິລາກະຕໍ້ມິດຕະພາບ ລາວ-ໄທ ຂຶ້ນຢ່າງເປັນທາງການ ທີ່ສະໜາມກິລາກະຕໍ້ແຂວງຈຳປາສັກ ໂດຍເນັ້ນໃສ່ການຮັດແໜ້ນຄວາມສາມັກຄີລະຫວ່າງ ແຂວງຈຳປາສັກ (ສປປ ລາວ) ແລະ ແຂວງອຸບົນຣາຊະທານີ (ຣາຊະອານາຈັກໄທ).

ການແຂ່ງຂັນໃນຄັ້ງນີ້ ເປັນການພົບປະສັນທະວະໄມຕີໃນຮຸ່ນອາວຸໂສ ໂດຍມີສະໂມສອນກິລາກະຕໍ້ຊື່ດັງເຂົ້າຮ່ວມການຊີງໄຊທັງໝົດ 3 ສະໂມສອນ ຄື: ສະໂມສອນ ໂຮງເບຍ ປາກເຊ, ສະໂມສອນ ສີອຳພອນ (ຕົວແທນຈາກຝ່າຍລາວ) ແລະ ສະໂມສອນ ຈັງຫວັດອຸບົນ (ຕົວແທນຈາກຝ່າຍໄທ). ບັນຍາກາດພາຍໃນງານເຕັມໄປດ້ວຍຄວາມຄຶກຄື້ນ, ມ່ວນຊື່ນ ແລະ ອົບອຸ່ນ ໂດຍນັກກິລາອາວຸໂສຈາກທັງສອງປະເທດຕ່າງກໍໄດ້ສະແດງທັກສະ, ເຕັກນິກ ແລະ ໄຫວພິບໃນການຫຼິ້ນກິລາກະຕໍ້ກັນຢ່າງສຸດຄວາມສາມາດ ທ່າມກາງສຽງເຊຍຂອງຜູ້ເຂົ້າຊົມ.

ຫຼັງຈາກການແຂ່ງຂັນທີ່ເຕັມໄປດ້ວຍຄວາມຕື່ນເຕັ້ນ ແລະ ມິດຕະພາບອັນດີງາມ. ຜົນການແຂ່ງຂັນປະກົດວ່າ ສະໂມສອນ ຈັງຫວັດອຸບົນ ຈາກປະເທດໄທ ສາມາດສະແດງຟອມອັນໂດດເດັ່ນຄວ້າອັນດັບທີ 1 ໄປຄອງ, ຕາມມາດ້ວຍອັນດັບທີ 2 ສະໂມສອນ ໂຮງເບຍ ປາກເຊ ແລະ ອັນດັບທີ 3 ສະໂມສອນ ສີອຳພອນ.

ຈຸດປະສົງສຳຄັນຂອງການຈັດງານໃນຄັ້ງນີ້ ແມ່ນເພື່ອເປັນເວທີໃນການແລກປ່ຽນບົດຮຽນ, ເຕັກນິກການຫຼິ້ນ ແລະ ປະສົບການເຊິ່ງກັນແລະກັນ ເພື່ອນຳໄປໝູນໃຊ້ເຂົ້າໃນການພັດທະນາວົງການກິລາກະຕໍ້ຂອງແຕ່ລະພາກສ່ວນ ໃຫ້ມີການເຕີບໃຫຍ່ຂະຫຍາຍຕົວ ແລະ ກ້າວໜ້າຂຶ້ນໄປເລື້ອຍໆ ໃຫ້ທຽບເທົ່າກັບລະດັບພາກພື້ນ ແລະ ສາກົນ ໃນຕໍ່ໜ້າ.

ນອກຈາກການພັດທະນາທາງດ້ານທັກສະກິລາແລ້ວ, ກິດຈະກຳດັ່ງກ່າວຍັງເປັນຂົວຕໍ່ອັນສຳຄັນໃນການຮັດແໜ້ນຄວາມສາມັກຄີຮັກແພງ, ຄວາມສະໜິດສະໜົມ ແລະ ເສີມສ້າງຈິດໃຈແຫ່ງການຊ່ວຍເຫຼືອເກື້ອກູນເຊິ່ງກັນແລະກັນ ລະຫວ່າງນັກກິລາ ແລະ ປະຊາຊົນຂອງທັງສອງປະເທດ ລາວ-ໄທ ໃຫ້ມີຄວາມແໜ້ນແຟ້ນ ແລະ ຍືນຍົງຕະຫຼອດໄປ.