ກົມກວດກາ ສສກ ແນະນຳການຈັດຕັ້ງປະຕິບັດຂອບຕິດຕາມ ແລະ ປະເມີນຜົນແຜນພັດທະນາຂະແໜງການສຶກສາ, ວິທະຍາສາດ ແລະ ກິລາ 5 ປີ ຄັ້ງທີ X

ກົມກວດກາ, ກະຊວງສຶກສາທິການ ແລະ ກິລາ ໄດ້ຈັດກອງປະຊຸມແນະນຳການຈັດຕັ້ງປະຕິບັດຂອບຕິດຕາມ ແລະ ປະເມີນຜົນແຜນພັດທະນາຂະແໜງການສຶກສາ, ວິທະຍາສາດ ແລະ ກິລາ 5 ປີ ຄັ້ງທີ X (2026-2030) ຂຶ້ນຢ່າງເປັນທາງການ ໃນລະຫວ່າງວັນທີ 17-19 ມິຖຸນາ 2026 ນີ້ ທີ່ເມືອງແກ້ວອຸດົມ ແຂວງວຽງຈັນ ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ປອ ຈັນທະວົງ ປັນຍາສີລິ ກຳມະການພັກກະຊວງ, ຫົວໜ້າກົມກວດກາ ກະຊວງສຶກສາທິການ ແລະ ກິລາ ແລະ ທ່ານ ປັນຍາ ຈັນທະວົງ ກຳມະການພັກກະຊວງ, ຫົວໜ້າກົມປະກັນຄຸນນະພາບການສຶກສາ, ມີບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ, ທີມງານຕິດຕາມ ແລະ ປະເມີນຜົນຂັ້ນກະຊວງ, ຫົວໜ້າຂະແໜງ, ຮອງຫົວໜ້າຂະແໜງ ແລະ ວິຊາການ ຈາກພະແນກສຶກສາທິການ ແລະ ກິລາ 16 ແຂວງ, ພ້ອມດ້ວຍຜູ້ຕາງໜ້າຈາກຄູ່ຮ່ວມພັດທະນາ ແລະ ແຂກຖືກເຊີນ ຢ່າງພ້ອມພຽງ.

ກອງປະຊຸມຄັ້ງນີ້ ຈັດຂຶ້ນໂດຍສອດຄ່ອງຕາມຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 1249/ສສກ, ລົງວັນທີ 16 ມີນາ 2026 ວ່າດ້ວຍການແຕ່ງຕັ້ງຄະນະຮັບຜິດຊອບ ແລະ ຜູ້ເຂົ້າຮ່ວມກອງປະຊຸມສະຫຼຸບ ແລະ ແນະນໍາການຈັດຕັ້ງປະຕິບັດຂອບຕິດຕາມ ແລະ ປະເມີນຜົນແຜນພັດທະນາຂະແໜງການສຶກສາ, ວິທະຍາສາດ ແລະ ກິລາ 5 ປີ ຄັ້ງທີ X (2026-2030), ໂດຍໄດ້ຮັບການສະໜັບສະໜູນງົບປະມານຈາກ ອົງການອຸຍນິເຊັບ (UNICEF) ປະຈຳ ສປປ ລາວ.

ໃນພິທີເປີດ, ທ່ານ ປອ ຈັນທະວົງ ປັນຍາສີລິ ໄດ້ເນັ້ນໜັກເຖິງຄວາມສຳຄັນຂອງວຽກງານຕິດຕາມ ແລະ ປະເມີນຜົນ (M&E) ວ່າເປັນເຄື່ອງມືອັນສໍາຄັນໃນການຊຸກຍູ້ການຈັດຕັ້ງປະຕິບັດບັນດານະໂຍບາຍ, ຍຸດທະສາດ ແລະ ແຜນວຽກຈຸດສຸມ ຂອງແຜນພັດທະນາຂະແໜງການສຶກສາ ແລະ ກິລາ ໃຫ້ບັນລຸຜົນເປັນຈິງ. ລະບົບດັ່ງກ່າວໄດ້ເລີ່ມຄົ້ນຄວ້າ ແລະ ພັດທະນາມາແຕ່ປີ 2010 (ຄົບຮອບ 16 ປີ ແຫ່ງການສ້າງຕັ້ງຢ່າງເປັນທາງການ) ໂດຍມີພະແນກຕິດຕາມ ແລະ ປະເມີນຜົນ ກົມກວດກາ ເປັນຜູ້ປະສານງານຫຼັກ ຮ່ວມກັບເຄືອຂ່າຍຕິດຕາມ ແລະ ປະເມີນຜົນ ຢູ່ບັນດາຫ້ອງການ, ກົມ, ສະຖາບັນ ແລະ ສູນຕ່າງໆ ທັງຂັ້ນກະຊວງ, ຂັ້ນແຂວງ ແລະ ຂັ້ນເມືອງ.

ຕະຫຼອດໄລຍະເວລາ 3 ວັນຂອງກອງປະຊຸມ, ຜູ້ເຂົ້າຮ່ວມຈະໄດ້ຮ່ວມກັນຄົ້ນຄວ້າ ແລະ ປຶກສາຫາລື 9 ເນື້ອໃນຕົ້ນຕໍ ເປັນຕົ້ນແມ່ນກ່ຽວກັບໂຄງສ້າງ, ເນື້ອໃນຫຼັກ, ຕ່ອງໂສ້ຜົນໄດ້ຮັບ (Results Chain) ແລະ ຕົວຊີ້ບອກຂອງແຜນພັດທະນາ 5 ປີ ຄັ້ງທີ X (2026-2030); ພ້ອມທັງກຳນົດນິຍາມ, ແຫຼ່ງຂໍ້ມູນ, ວິທີການເກັບກຳ ແລະ ຄວາມຖີ່ໃນການລາຍງານຂອງແຕ່ລະຕົວຊີ້ບອກໃນທຸກຂະແໜງການຍ່ອຍ; ສົນທະນາເບື້ອງຕົ້ນກ່ຽວກັບເຄື່ອງມືການລາຍງານຜົນການຕິດຕາມ ແລະ ປະເມີນຜົນ ໃຫ້ແທດເໝາະກັບແຜນພັດທະນາ 5 ປີ 2026-2030; ທົບທວນຄວາມພ້ອມ ແລະ ກຳນົດກົນໄກການປະສານງານ ລະຫວ່າງ ຂັ້ນກະຊວງ, ພະແນກສຶກສາທິການ ແລະ ກິລາແຂວງ (ພສກ) ແລະ ຫ້ອງການສຶກສາທິການ ແລະ ກິລາເມືອງ (ຫສກ) ໃນການຈັດຕັ້ງປະຕິບັດຕົວຈິງ.

ນອກຈາກນີ້, ກອງປະຊຸມຍັງໄດ້ມີການນໍາສະເໜີເຄື່ອງມື ແລະ ການຫັນເປັນດິຈິຕອນ ໃນວຽກງານຕິດຕາມ-ປະເມີນຜົນ ໂດຍສະເພາະແມ່ນການພັດທະນາຮ່າງບົດລາຍງານຫຍໍ້ໃນລະບົບ LESMIS (Lao Education and Sports Management Information System) ແລະ ການເຊື່ອມໂຍງຂໍ້ມູນຮ່ວມກັບລະບົບ EMIS, ຫຼັກການປ້ອນຂໍ້ມູນ ແລະ ການນໍາໃຊ້ໜ້າຕ່າງສະແດງຜົນ (Dashboard) ໂດຍການຮ່ວມມືກັບສູນສະຖິຕິ ແລະ ເຕັກໂນໂລຊີຂໍ້ມູນຂ່າວສານການສຶກສາ ແລະ ກິລາ ແລະ ຊ່ຽວຊານສາກົນ.

ໃນຕອນທ້າຍຂອງກອງປະຊຸມ, ຜູ້ເຂົ້າຮ່ວມຈະໄດ້ຮ່ວມກັນກຳນົດແຜນດຳເນີນງານ (Roadmap) ເພື່ອເລີ່ມຈັດຕັ້ງປະຕິບັດຂອບຕິດຕາມ ແລະ ປະເມີນຜົນ (M&E) ຕົວຈິງ ນັບແຕ່ເດືອນກໍລະກົດ 2026 ຫາ ທ້າຍປີ 2026 ນີ້ ໃຫ້ປະກົດຜົນເປັນຮູບປະທຳ ແລະ ມີປະສິດທິພາບສູງສຸດ.