ອານັນໄຊ ແລະ ພູຄູນ ຄວ້າແຊ້ມລົດຖີບ ຊີງແຊ໋ມປະເທດລາວ ປະຈຳປີ 2026 ໄປຄອງຢ່າງຍິ່ງໃຫຍ່

ສະຫະພັນກິລາລົດຖີບແຫ່ງຊາດລາວ ປະສົບຜົນສຳເລັດຢ່າງຈົບງາມໃນການຈັດການແຂ່ງຂັນລົດຖີບ ຊີງແຊ໋ມປະເທດລາວ ປະຈຳປີ 2026 ລະຫວ່າງວັນທີ 27-28 ມິຖຸນາ 2026 ທີ່ຜ່ານມາ ໂດຍມີນັກປັ່ນມືດີຈາກທົ່ວປະເທດເຂົ້າຮ່ວມຊີງໄຊຢ່າງຄຶກຄື້ນ ພາຍໃຕ້ສະພາບອາກາດທີ່ຮ້ອນເອົ້າ ແຕ່ເຕັມໄປດ້ວຍຄວາມດຸເດືອດ.

ການແຂ່ງຂັນໃນຄັ້ງນີ້ ມີການຊີງໄຊກັນທັງໝົດ 6 ລາຍການ ໃນ 4 ຮຸ່ນອາຍຸ ໂດຍແບ່ງການແຂ່ງຂັນອອກເປັນ 2 ມື້ ໃນເສັ້ນທາງທີ່ແຕກຕ່າງກັນ ເພື່ອທົດສອບຄວາມສາມາດ ແລະ ສະມັດຖະພາບຂອງນັກກິລາຢ່າງຮອບດ້ານ ໂດຍມື້ທຳອິດ (27 ມິຖຸນາ) ແຂ່ງຂັນຢູ່ເສັ້ນທາງບໍລິເວນບຶງທາດຫຼວງ ນະຄອນຫຼວງວຽງຈັນ ປະກອບມີ 2 ລາຍການຄື: ປະເພດດ່ຽວຊາຍ ໄລຍະໄກ ຮຸ່ນເຍົາວະຊົນ (ໄລຍະທາງ 14 ກິໂລແມັດ, ນັກກິລາ 13 ຄົນ) ແລະ ດ່ຽວຊາຍ ໄລຍະໄກ ຮຸ່ນທົ່ວໄປ (ໄລຍະທາງ 20 ກິໂລແມັດ, ນັກກິລາ 24 ຄົນ). ສ່ວນມື້ທີສອງ (28 ມິຖຸນາ) ເລີ່ມຕົ້ນທີ່ຮ້ານກາເຟສີນຸກ ຈຸດທາງດ່ວນ ລາວ-ຈີນ (ນະຄອນຫຼວງວຽງຈັນ-ວັງວຽງ) ແຂ່ງຂັນ 4 ລາຍການຄື: ຈັບເວລາ ດ່ຽວຊາຍ ເຍົາວະຊົນ, ຈັບເວລາ ດ່ຽວຊາຍ ຮຸ່ນທົ່ວໄປ, ດ່ຽວຍິງ ໄລຍະໄກ ຮຸ່ນທົ່ວໄປ ແລະ ດ່ຽວຊາຍ ຮຸ່ນອາຍຸ 40 ປີຂຶ້ນໄປ.

 ຜົນການແຂ່ງຂັນໃນແຕ່ລະປະເພດ:

1. ປະເພດດ່ຽວຊາຍ ໄລຍະໄກ ຮຸ່ນທົ່ວໄປ (20 ກິໂລແມັດ)

•  ຊະນະເລີດ: ອານັນໄຊ ວິລາກົງ

•  ອັນດັບສອງ: ເຈໂຣມ

•  ອັນດັບສາມ: ວໍລະວັດ ພາໂພ

2. ປະເພດດ່ຽວຊາຍ ໄລຍະໄກ ຮຸ່ນເຍົາວະຊົນ (14 ກິໂລແມັດ)

•  ຊະນະເລີດ: ພູຄູນ ຈັນສີດາ (ບືນເຂົ້າເສັ້ນໄຊຊະນະກັນພຽງສ້ຽວວິນາທີ)

•  ອັນດັບສອງ: ບຸນປະເສີດ ຈັນທະຜາລີ

•  ອັນດັບສາມ: ທະນະວິນ ສີຈັນທາ

3. ປະເພດຈັບເວລາ ດ່ຽວຊາຍ ຮຸ່ນທົ່ວໄປ

•  ຊະນະເລີດ: ຖາວອນ ພົນອາສາ

•  ອັນດັບສອງ: ເທບປະສິດ ພົງສຸວັນ

•  ອັນດັບສາມ: ກອງມະນີ ໄຊຍະລາດ

4. ປະເພດຈັບເວລາ ດ່ຽວຊາຍ ຮຸ່ນເຍົາວະຊົນ

•  ຊະນະເລີດ: ບຸນປະເສີດ ຈັນທະຜາລີ

•  ອັນດັບສອງ: ພູຄູນ ຈັນສີດາ

•  ອັນດັບສາມ: ພູສະຫວັດ ມະຫາທິລາດ

5. ປະເພດດ່ຽວຍິງ ໄລຍະໄກ ຮຸ່ນທົ່ວໄປ

•  ຊະນະເລີດ: ທອງຄູນ ໄທປັນຍາວົງ

•  ອັນດັບສອງ: ໂບຕັນ ວິໄຊ

•  ອັນດັບສາມ: ພູໂຂງ ແພງປາສັກ

6. ປະເພດດ່ຽວຊາຍ ຮຸ່ນອາວຸໂສ (ອາຍຸ 40 ປີຂຶ້ນໄປ)

•  ຊະນະເລີດ: ທ່ານ ລຳເງິນ ວັນນະສຸກ

•  ອັນດັບສອງ: ທ່ານ ພຸດທະສອນ ອິນທະມິດ

•  ອັນດັບສາມ: ທ່ານ ອາທິດ ສົ້ມອົ້ມ

ໃນໂອກາດນີ້, ທ່ານ ປອ ຫົງຄຳ ສຸວັນນະວົງ ປະທານສະຫະພັນລົດຖີບແຫ່ງຊາດລາວ ໄດ້ໃຫ້ສຳພາດວ່າ: “ການຈັດການແຂ່ງຂັນຄັ້ງນີ້ ແມ່ນມີຈຸດປະສົງເພື່ອຍົກລະດັບ ແລະ ພັດທະນາກິລາລົດຖີບຂອງລາວໃຫ້ກ້າວໜ້າ, ມີຄຸນນະພາບທຽບເທົ່າກັບລະດັບພາກພື້ນ ແລະ ສາກົນ. ທີ່ສຳຄັນແມ່ນເພື່ອສົ່ງເສີມ ແລະ ສ້າງນັກກິລາຮຸ່ນເຍົາວະຊົນ ເພື່ອສືບທອດປ່ຽນແທນໃນອະນາຄົດ ຄຽງຄູ່ກັບການສ້າງຄວາມເຂັ້ມແຂງໃຫ້ແກ່ທີມຊາດລາວ ແລະ ສົ່ງເສີມການອອກກຳລັງກາຍເພື່ອສຸຂະພາບ ກໍຄືຄວາມສາມັກຄີຮັກແພງ.”

ພາບ-ຂ່າວໂດຍ: ສົງການ ພັນແພງດີ