ກຽມຈັດຫຼາຍກິດຈະກຳ ສະຫຼອງວັນສ້າງຕັ້ງກິລາ-ກາຍຍະກຳລາວ ຄົບຮອບ 60 ປີ ໃຫ້ມີບັນຍາກາດຟົດຟື້ນ

ກະຊວງສຶກສາທິການ ແລະ ກິລາ ຫຼື ສສກ ກຽມຈະຈັດກິດຈະກຳຫຼາຍລາຍການ ເປັນຕົ້ນ ແມ່ນເຜີຍແຜ່ມູນເຊື້ອປະຫວັດຄວາມເປັນມາຂອງກິລາ-ກາຍຍະກຳລາວ, ການຮັບຟັງທິດຊີ້ນຳໃນການພັດທະນາກິລາ ຈາກການນຳຂັ້ນສູງ ກໍຄື ຄະນະ ລັດຖະມົນຕີ ສສກ, ການວາງສະແດງຜົນງານ ແລະ ມູນເຊື້ອຂອງບັນດາສະຫະພັນກິລາຕ່າງໆ ທີ່ມີຜົນສຳເລັດໃນໄລຍະຜ່ານມາ ພ້ອມທັງຍ່າງເພື່ອສຸຂະພາບ ແລະ ເຕັ້ນແອໂຣບິກ ທີ່ສະໜາມກິລາສະຖາບັນກິລາ-ກາຍຍະກຳ ໃນວັນທີ 13 ກໍລະກົດ 2026ນີ້.

ທ່ານ ວິລະວັນ ບຸນສຸກໄທ ຄະນະພັກກະຊວງ, ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ທັງເປັນຫົວໜ້າຄະນະຮັບຜິດຊອບຈັດກິດຈະກຳດັ່ງກ່າວ ໃຫ້ຮູ້ວ່າ: ການຈັດງານໃນປີນີ້ແມ່ນມີຄວາມສຳຄັນທາງດ້ານປະຫວັດສາດຂອງກິລາ-ກາຍຍະກຳລາວເຮົາຫຼາຍ ເພາະເປັນການຄົບຮອບ 60 ປີ (13 ກໍລະກົດ 1966 – 13 ກໍລະກົດ 2026) ເປັນໄລຍະທີ່ພວກເຮົາກຳລັງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ Xll ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກກະຊວງສຶກສາທິການ ແລະ ກິລາ. ນອກຈາກນີ້, ຍັງເປັນການຮ່ວມສະເຫຼີມສະຫຼອງວັນເກີດຂອງປະທານ ສຸພານຸວົງ ຄົບຮອບ 117 ປີ ອີກດ້ວຍ.

ກິດຈະກຳຄັ້ງນີ້ ຈະຈັດຂຶ້ນໃນຕອນບ່າຍຂອງວັນທີ 13 ກໍລະກົດ 2026 ທີ່ສະຖາບັນກິລາ-ກາຍຍະກຳແຫ່ງຊາດ ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ ພາຍໃນງານຈະມີກິດຈະກຳທີ່ຫຼາກຫຼາຍ ເຊັ່ນ: ພິທີການເລົ່າມູນເຊື້ອປະຫວັດຄວາມເປັນມາຂອງກິລາ-ກາຍຍະກຳລາວ, ການຮັບຟັງທິດຊີ້ນຳໃນການພັດທະນາກິລາ ຈາກການນຳຂັ້ນສູງ ກໍຄື ຄະນະລັດຖະມົນຕີກະຊວງສຶກສາທິການ ແລະ ກິລາ ແລະ ການວາງສະແດງຜົນງານ ແລະ ມູນເຊື້ອຂອງບັນດາສະຫະພັນກິລາຕ່າງໆ ທີ່ມີຜົນສຳເລັດໃນໄລຍະຜ່ານມາ. ນອກນັ້ນ, ກໍຍັງຈະຈັດກິດຈະກຳຍ່າງເພື່ອສຸຂະພາບ ແລະ ເຕັ້ນແອໂຣບິກ ຢູ່ທີ່ສະໜາມກິລາບານເຕະຂອງສະຖາບັນດັ່ງກ່າວອີກດ້ວຍ.

ພາບ-ຂ່າວໂດຍ: ສົງການ ພັນແພງດີ