ປິດສາກຢ່າງງົດງາມ! ການແຂ່ງຂັນກິລາເປຕັງ ຊີງຂັນປະທານຄະນະກຳມະການປົກຄອງແຂວງຈຳປາສັກ ຕ້ອນຮັບວັນສ້າງຕັ້ງກິລາລາວ ຄົບຮອບ 60 ປີ

​ໃນວັນທີ 10 ກໍລະກົດ 2026 ທີ່ຜ່ານມານີ້, ທີ່ສະໜາມກິລາເປຕັງແຂວງຈຳປາສັກ (ຫຼັກ 2), ສະຫະພັນກິລາເປຕັງແຂວງຈຳປາສັກ ຮ່ວມກັບ ຮ້ານຂາຍເຄື່ອງກິລາດີພີ ສະປອດ (DP Sports) ຕົວແທນຈຳໜ່າຍເຄື່ອງກິລາຄົບວົງຈອນ ປະຈຳນະຄອນປາກເຊ ໄດ້ຮ່ວມກັນຈັດການແຂ່ງຂັນກິລາເປຕັງ ປະເພດຄູ່ຮຸ່ນທົ່ວໄປ ຊີງຂັນທ່ານປະທານຄະນະກຳມະການປົກຄອງແຂວງຈຳປາສັກ ປະຈຳປີ 2026 ຢ່າງເປັນທາງການ.

​ການຈັດການແຂ່ງຂັນໃນຄັ້ງນີ້ ແມ່ນເພື່ອເປັນການຊຸກຍູ້ ແລະ ສົ່ງເສີມການພັດທະນາກິລາເປຕັງພາຍໃນແຂວງໃຫ້ມີຄວາມເຂັ້ມແຂງ, ທັງເປັນການສ້າງຂະບວນການຂໍ່ານັບຮັບຕ້ອນ ແລະ ສະເຫຼີມສະຫຼອງວັນສ້າງຕັ້ງກິລາ-ກາຍະກຳແຫ່ງຊາດ ຄົບຮອບ 60 ປີ (13 ກໍລະກົດ 1966 – 13 ກໍລະກົດ 2026) ໃຫ້ມີບັນຍາກາດຟົດຟື້ນມ່ວນຊື່ນ ແລະ ສ້າງຄວາມສາມັກຄີຮັກແພງລະຫວ່າງນັກກິລາເປຕັງດ້ວຍກັນ.

​ການແຂ່ງຂັນຄັ້ງນີ້ ໄດ້ຮັບຄວາມສົນໃຈຢ່າງຫຼວງຫຼາຍ ໂດຍມີທີມນັກກິລາເປຕັງເຂົ້າຮ່ວມຊີງໄຊທັງໝົດເຖິງ 50 ທີມ. ຕະຫຼອດການແຂ່ງຂັນ 1 ວັນເຕັມ, ນັກກິລາແຕ່ລະທີມຕ່າງກໍໄດ້ສະແດງຄວາມສາມາດ, ໄຫວພິບ ແລະ ເຕັກນິກການໂຍນໝາກບຸ້ນຢ່າງສຸດສີມື ທ່າມກາງສຽງເຊຍຂອງກອງເຊຍຢ່າງຄຶກຄື້ນ.

​ຜ່ານການແຂ່ງຂັນອັນຂຸ້ນຂ້ຽວ, ຜົນການແຂ່ງຂັນປະກົດວ່າ:

​ລາງວັນຊະນະເລີດ: ໄດ້ແກ່ ທີມເທອອກແບບ 1 ຄວ້າຂັນລາງວັນຊະນະເລີດ ປະທານຄະນະກຳມະການປົກຄອງແຂວງຈຳປາສັກ ໄປຄອງໄດ້ຢ່າງສົມກຽດ, ​ລາງວັນຮອງຊະນະເລີດ ໄດ້ແກ່ ທີມເທອອກແບບ 2, ​ອັນດັບທີ 3 ໄດ້ແກ່ ສະໂມສອນ ອົງສ້ອຍ ແລະ ​ອັນດັບທີ 4 ໄດ້ແກ່ ທີມນາຍຮ້ອຍໂທນ.

​ໃຫ້ກຽດເຂົ້າຮ່ວມໃນພິທີປິດ ແລະ ມອບຂັນລາງວັນໃນຄັ້ງນີ້ໂດຍ ທ່ານ ສົມບູນ ເຮືອງວົງສາ ຮອງປະທານຄະນະກຳມະການປົກຄອງແຂວງຈຳປາສັກ ແລະ ທ່ານ ສິດທິພົງ ໄຊຍະມົງຄຸນ ປະທານສະຫະພັນກິລາເປຕັງແຂວງຈຳປາສັກ, ພ້ອມດ້ວຍຄະນະຮັບຜິດຊອບຈັດງານ, ຕົວແທນຈາກຮ້ານ DP Sports, ຄູຝຶກ, ນັກກິລາ ແລະ ມວນຊົນຊາວແຂວງຈຳປາສັກເຂົ້າຮ່ວມຢ່າງພ້ອມພຽງ.

​ການຈັດງານໃນຄັ້ງນີ້ ຖືເປັນຂີດໝາຍອັນສຳຄັນໃນການຮຽກຮ້ອງໃຫ້ທຸກພາກສ່ວນ ເຫັນໄດ້ເຖິງຄວາມສຳຄັນຂອງວົງການກິລາເປຕັງແຂວງຈຳປາສັກ ແລະ ຮ່ວມກັນພັດທະນານັກກິລາຮຸ່ນໃໝ່ ເພື່ອກ້າວໄປສູ່ລະດັບຊາດ ແລະ ສາກົນໃນອະນາຄົດ.