ຈຳປາສັກ ຊະນະ ສຽມລຽບ 4-3 ເຕະບານມິດຕະພາບ ລາວ-ກຳປູເຈຍ ສະຫຼອງວັນສ້າງຕັ້ງກິລາລາວ ຄົບຮອບ 60 ປີ ຢ່າງຟົດຟື້ນ
13/07/2026
ວົງການກິລາແຂວງຈຳປາສັກ ເຕັມໄປດ້ວຍບັນຍາກາດອັນຟົດຟື້ນ ແລະ ປິຕິຊົມຊື່ນ ໃນໂອກາດຈັດການແຂ່ງຂັນເຕະບານມິດຕະພາບນັດພິເສດ (International Friendly Match) ລະຫວ່າງ ທີມ VIP ຂອງ ສປປ ລາວ ແລະ ຣາຊະອານາຈັກ ກຳປູເຈຍ ພາຍໃຕ້ຄຳຂວັນ “ໜຶ່ງເກມການແຂ່ງຂັນ ໜຶ່ງມິດຕະພາບ ໜຶ່ງພາກພື້ນ” (One Game One Friendship One Region) ເພື່ອສືບຕໍ່ຮັດແໜ້ນ, ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ຄວາມສາມັກຄີຮັກແພງຖານບ້ານໃກ້ເຮືອນຄຽງທີ່ດີງາມ ລະຫວ່າງ ສອງຊາດ ລາວ-ກຳປູເຈຍ ເວົ້າລວມ, ເວົ້າສະເພາະແມ່ນ ລະຫວ່າງ ແຂວງຈຳປາສັກ ແລະ ແຂວງສຽມລຽບ ໃຫ້ແໜ້ນແຟ້ນຍິ່ງໆຂຶ້ນ.
ພ້ອມດຽວກັນນັ້ນ, ກິດຈະກຳຄັ້ງນີ້ຍັງເປັນສ່ວນໜຶ່ງຂອງການຮ່ວມສະຫຼອງວັນປະຫວັດສາດອັນສຳຄັນ ຂອງວົງການກິລາແຫ່ງຊາດ ກໍຄື ວັນສ້າງຕັ້ງກິລາ-ກາຍຍະກຳແຫ່ງຊາດ ຄົບຮອບ 60 ປີ (13 ກໍລະກົດ 1966 – 13 ກໍລະກົດ 2026) ເຊິ່ງເປັນການຮ່ວມພົບກັນລະຫວ່າງ ທີມອາວຸໂສ ນາຄາ (Naga Football Club) ຈາກນະຄອນປາກເຊ ແຂວງຈຳປາສັກ ແລະ ທີມອາວຸໂສ ແຂວງສຽມລຽບ ຈາກປະເທດກຳປູເຈຍ.
ການແຂ່ງຂັນນັດພິເສດນີ້ ໄດ້ຈັດຂຶ້ນໃນຕອນເຊົ້າວັນທີ 11 ກໍລະກົດ 2026 ທີ່ສະໜາມກິລາແຂວງຈຳປາສັກ (ຫຼັກ 2), ນະຄອນປາກເຊ, ແຂວງຈຳປາສັກ ໂດຍໃຫ້ກຽດເຂົ້າຮ່ວມ ແລະ ຮ່ວມຊົມຂອງ ທ່ານ ບົວທອງ ສຸວັນນະສານ ອະດີດການນຳແຂວງຈຳປາສັກ ແລະ ທ່ານ ໂສດ ຈູດີ ຮອງປະທານສານປະຊາຊົນແຂວງສຽມລຽບ, ພ້ອມດ້ວຍຄະນະນຳຈາກທັງສອງແຂວງ, ພາກສ່ວນທີ່ກ່ຽວຂ້ອງ ຕະຫຼອດຮອດມວນຊົນ ແລະ ແຟນບານເຂົ້າຮ່ວມຊົມ-ເຊຍຢ່າງຄຶກຄື້ນ ເພື່ອຮ່ວມເປັນສັກຂີພິຍານໃຫ້ແກ່ມິດຕະພາບອັນຍິ່ງໃຫຍ່.
ການແຂ່ງຂັນຄັ້ງນີ້ ບໍ່ພຽງແຕ່ເປັນການສົ່ງເສີມສຸຂະພາບ ແລະ ສ້າງຄວາມມ່ວນຊື່ນເທົ່ານັ້ນ, ແຕ່ຍັງເປັນການຂັບເຄື່ອນ “ການທູດກິລາ” (Sports Diplomacy) ທີ່ເປີດໂອກາດໃຫ້ແກ່ ອະດີດນັກກິລາ, ຜູ້ບໍລິຫານ ແລະ ມວນຊົນທັງສອງປະເທດໄດ້ມີໂອກາດພົບປະ, ແລກປ່ຽນຄຳຄິດຄຳເຫັນ ແລະ ສ້າງຄວາມໃກ້ຊິດຕິດແທດກັນໃຫ້ຫຼາຍຂຶ້ນ. ຄຽງຄູ່ກັນນັ້ນ, ຍັງເປັນການຫວນຄືນມູນເຊື້ອ ແລະ ຜົນງານການເຕີບໃຫຍ່ຂະຫຍາຍຕົວຂອງວົງການກິລາລາວ ຕະຫຼອດໄລຍະ 6 ທົດສະວັດ (60 ປີ) ທີ່ຜ່ານມາ, ທັງເປັນການປຸກລະດົມຂະບວນການກິລາພາຍໃນປະເທດໃຫ້ມີຄວາມຟົດຟື້ນ ແລະ ຕື່ນຕົວຢ່າງຕໍ່ເນື່ອງ.
ສຳລັບຜົນການແຂ່ງຂັນໃນສະໜາມ ປາກົດວ່າ ທັງສອງຝ່າຍໄດ້ເປີດເກມບຸກແລກກັນຢ່າງສຸດມັນ ແລະ ສ້າງຄວາມຕື່ນເຕັ້ນໃຫ້ແກ່ຜູ້ຊົມຕະຫຼອດເກມ, ເຊິ່ງຜົນສຸດທ້າຍແມ່ນ ທີມອາວຸໂສ ນາຄາ (Naga FC) ຈາກນະຄອນປາກເຊ ສາມາດເອົາຊະນະ ທີມອາວຸໂສ ແຂວງສຽມລຽບ ໄປດ້ວຍສະກໍ 4 ປະຕູຕໍ່ 3. ເຖິງຢ່າງໃດກໍດີ, ໄຊຊະນະທີ່ແທ້ຈິງໃນເກມນີ້ ກໍຄືຮອຍຍິ້ມ, ມິດຕະພາບ ແລະ ຄວາມສາມັກຄີອັນອົບອຸ່ນ ລະຫວ່າງ ນັກກິລາ ແລະ ຄະນະຜູ້ແທນທັງສອງຊາດ ລາວ – ກຳປູເຈຍ ທີ່ໄດ້ຮ່ວມກັນຈາລຶກໄວ້ໃນໜ້າປະຫວັດສາດການຮ່ວມມືດ້ານກິລາໃນຄັ້ງນີ້.
