ວິທະຍາໄລເຕັກນິກ ລາວ-ເຢຍລະມັນ ແລະ ປາກປ່າສັກ ຮ່ວມກັນຈັດກິດຈະກຳແຂ່ງຂັນກິລາມິດຕະພາບ ສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 71 ປີ ຢ່າງຟົດຟື້ນ

ໃນວັນທີ 16 ກໍລະກົດ 2026 ທີ່ເດີ່ນເຕະບານວິກຕໍຣີ ນະຄອນຫຼວງວຽງຈັນ, ວິທະຍາໄລເຕັກນິກ ລາວ-ເຢຍລະມັນ ແລະ ວິທະຍາໄລເຕັກນິກ ປາກປ່າສັກ ໄດ້ຮ່ວມກັນຈັດກິດຈະກຳແຂ່ງຂັນກິລາມິດຕະພາບຢ່າງຟົດຟື້ນ ເພື່ອສ້າງຂະບວນການຕ້ອນຮັບ ແລະ ສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 71 ປີ (20 ກໍລະກົດ 1955 – 20 ກໍລະກົດ 2026)ື​ໃຫ້ກຽດເຂົ້າຮ່ວມຂອງ ​ສະຫາຍ ນາງ ສຸດສາຍໃຈ ດວງສະຫວັນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງສຶກສາທິການ ແລະ ກິລາ, ​ທ່ານ ປອ ສາຍສະໝອນ ງາມສີ ຄະນະໜ່ວຍພັກກົມ, ຮອງຫົວໜ້າກົມອາຊີວະສຶກສາ, ​ທ່ານ ສຸລິຍາ ປ່າໄຊ ເລຂາຄະນະພັກຮາກຖານ, ຜູ້ອຳນວຍການວິທະຍາໄລເຕັກນິກ ລາວ-ເຢຍລະມັນ ແລະ ​ທ່ານ ໂພໄຊ ບູລົມ ເລຂາຄະນະພັກຮາກຖານ, ຜູ້ອຳນວຍການວິທະຍາໄລເຕັກນິກ ປາກປ່າສັກ. ​ນອກນີ້, ຍັງມີຄະນະບໍລິຫານງານສະຫະພັນແມ່ຍິງກະຊວງສຶກສາທິການ ແລະ ກິລາ, ປະທານສະຫະພັນແມ່ຍິງ ພ້ອມດ້ວຍຄະນະພັກ, ເລຂາຊາວໜຸ່ມ, ປະທານສະຫະພັນກຳມະບານ, ຄະນະສາມອົງການຈັດຕັ້ງມະຫາຊົນ ແລະ ສະມາຊິກທັງສອງພາກສ່ວນເຂົ້າຮ່ວມຢ່າງພ້ອມພຽງ.

​ການແຂ່ງຂັນກິລາມິດຕະພາບ ຍິງ-ຊາຍ ຂອງ 3 ອົງການຈັດຕັ້ງມະຫາຊົນ ລະຫວ່າງ ວິທະຍາໄລເຕັກນິກ ລາວ-ເຢຍລະມັນ, ວິທະຍາໄລເຕັກນິກ ປາກປ່າສັກ ແລະ ກົມອາຊີວະສຶກສາ ໃນຄັ້ງນີ້ ຈັດຂຶ້ນເພື່ອແນໃສ່ຮັດແໜ້ນຄວາມສາມັກຄີອັນປ່ຽນແປງບໍ່ໄດ້ລະຫວ່າງສະມາຊິກ 3 ອົງການຈັດຕັ້ງມະຫາຊົນຂອງທັງສອງສະຖາບັນ ແລະ ກົມກອງໃຫ້ມີຄວາມສະໜິດສະໜົມ ແລະ ຮັກແພງກັນຍິ່ງໆຂຶ້ນ, ທັງເປັນການສ້າງຂະບວນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 71 ປີ ໃຫ້ມີເນື້ອໃນເລິກເຊິ່ງ ແລະ ມີບັນຍາກາດເບີກບານມ່ວນຊື່ນ.

​ສຳລັບຜົນການແຂ່ງຂັນໃນຄັ້ງນີ້ ປະກົດວ່າ:

​ປະເພດທີມຍິງ ວິທະຍາໄລເຕັກນິກ ປາກປ່າສັກ ສາມາດໄລ່ຕີສະເໝີ ວິທະຍາໄລເຕັກນິກ ລາວ-ເຢຍລະມັນ ໄປດ້ວຍຄະແນນ 1-1 ປະຕູ.

​ປະເພດທີມຊາຍ ວິທະຍາໄລເຕັກນິກ ລາວ-ເຢຍລະມັນ ເສຍໃຫ້ ວິທະຍາໄລເຕັກນິກ ປາກປ່າສັກ 3-5 ປະຕູ.

​ບັນຍາກາດຕະຫຼອດການແຂ່ງຂັນແມ່ນເຕັມໄປດ້ວຍຄວາມສາມັກຄີ, ມ່ວນຊື່ນ ແລະ ສຽງເຊຍທີ່ດັງສະໜັ່ນຫວັ່ນໄຫວຈາກທັງສອງຝ່າຍ, ເຊິ່ງໄດ້ສ້າງຄວາມປະທັບໃຈໃຫ້ແກ່ຜູ້ເຂົ້າຮ່ວມເປັນຢ່າງຍິ່ງ.