“ພີທີພີ” ທີມນ້ອງໃໝ່ ປະເດີມໄຊ 2-0 ເຊັດ ເກັບ 3 ແຕ້ມທຳອິດ ການແຂ່ງຂັນກະຕໍ້ ຊີງແຊ້ມທົ່ວປະເທດ ຄັ້ງທີ 1 ປີ 2026

ການແຂ່ງຂັນກິລາກະຕໍ້ ຊີງແຊ້ມທົ່ວປະເທດ ຄັ້ງທີ 1 ຊີງຂັນທ່ານຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ປະຈຳປີ 2026 ເລີ່ມຂຶ້ນຢ່າງເປັນທາງການໃນຕອນເຊົ້າວັນທີ 31 ກໍລະກົດ 2026 ນີ້ ທີ່ສະໜາມກິລາໃນຮົ່ມ ບູໂດເຊັນເຕີ ນະຄອນຫຼວງວຽງຈັນ ເຊິ່ງໄຮໄລ້ທີ່ໜ້າຕິດຕາມໃນຮອບຄັດເລືອກ ປະເພດທີມດ່ຽວຊາຍ ຮຸ່ນທົ່ວໄປ ສະໂມສອນ ພີທີພີ ເພັດພະຈັນ ປະເສີດ ຈຳກັດຜູ້ດຽວ ທີມນ້ອງໃໝ່ຂອງລາຍການ ໂຊຟອມໄດ້ຢ່າງຮ້ອນແຮງ ແລະ ແຂງແກ່ນ ດ້ວຍການເອົາຊະນະ ສະໂມສອນ ຄຸນນະພາບ ໄປຢ່າງຂາດຂັ້ນ 2-0 ເຊັດ.

ເກມນີ້ ທີມນ້ອງໃໝ່ຢ່າງ ສະໂມສອນ ພີທີພີ ເພັດພະຈັນ ປະເສີດ ຈຳກັດຜູ້ດຽວ ຫຼິ້ນໄດ້ຢ່າງໝັ້ນໃຈ, ວາງແຜນເກມບຸກ ແລະ ເກມຮັບໄດ້ຢ່າງຮອບຄອບ ໂດຍເຊັດທີ 1 ເປີດສາກມາ ພີທີພີ ເພັດພະຈັນ ປະເສີດ ອາໄສຈັງຫວະການເສີບທີ່ແນ່ນອນ ແລະ ການຟາດໜ້າຕາໜ່າງທີ່ເດັດຂາດ ອອກນຳ ແລະ ປິດເຊັດໄປໄດ້ກ່ອນດ້ວຍຄະແນນ 15-7. ສ່ວນເຊັດທີ 2 ຍັງຄົງຫຼິ້ນໄດ້ດີ ແລະ ປັບເກມໄດ້ຢ່າງຕໍ່ເນື່ອງ ຄຸມຈັງຫວະເກມໄວ້ໄດ້ທັງໝົດ ກ່ອນຈະປິດເກມໄປຢ່າງງົດງາມດ້ວຍຄະແນນ 15-6 ລວມເປັນ 2-0 ເຊັດ ປະເດີມຄວ້າ 3 ຄະແນນທຳອິດໄດ້ຢ່າງງົດງາມ.

ຫຼັງຈາກປະເດີມ 3 ແຕ້ມທຳອິດໄດ້ສຳເລັດ, ສະໂມສອນ ພີທີພີ ເພັດພະຈັນ ປະເສີດ ມີຕາຕະລາງລົງສະໜາມຕໍ່ທັນທີໃນນັດທີ 2 ຕອນບ່າຍຂອງມື້ນີ້ (31 ກໍລະກົດ 2026) ໂດຍຈະພົບກັບ ສະໂມສອນ 194 ເພື່ອລຸ້ນເກັບໄຊຊະນະຢ່າງຕໍ່ເນື່ອງໃນຮອບຄັດເລືອກ.