ພຽງມື້ທຳອິດ ນັກກິລາຈູຈິດຊູລາວ ຍາດມາໄດ້ແລ້ວ 1 ຫຼຽນເງິນ ແລະ 2 ຫຼຽນທອງ ລາຍການຊີງແຊ້ມອາຊຽນ 2026 ທີ່ປະເທດກຳປູເຈຍ

ທັບນັກກິລາຈູຈິດຊູທີມຊາດລາວ ປະເດີມສະໜາມລົງສະໜາມແຂ່ງຂັນໃນມື້ທຳອິດ 21 ສິງຫາ 2026 ສາມາດຍາດໄດ້ 1 ຫຼຽນເງິນ ແລະ 2 ຫຼຽນທອງ ໃນການແຂ່ງຂັນກິລາ ຈູຈິດຊູ ຊີງແຊ້ມອາຊຽນ ປະຈຳປີ 2026 ຈັດຂຶ້ນ ລະຫວ່າງວັນທີ 21-23 ສິງຫາ 2026 ທີ່ປະເທດກຳປູເຈຍ ຮັບກຽດເປັນເຈົ້າພາບ.

ການແຂ່ງຂັນກິລາ ຈູຈິດຊູ ຊີງແຊ້ມອາຊຽນ ປະຈຳຈປີ 2026 ມີນັກກິລາໃນຂົງເຂດອາຊຽນເຂົ້າຮ່ວມຊີງໄຊ 8 ຊາດ ບໍ່ມີ 3 ຊາດ ຄື ໄທ, ບຣູໄນ ແລະ ຕີມໍ ເລດເຕ້ ເຂົ້າຮ່ວມແຂ່ງຂັນ ການແຂ່ງຂັນດຳເນີນໃນໄລຍະ 3 ວັນ ມີການຊີງໄຊທັງໝົດ 223 ລາຍການ, ໃນນັ້ນ ທັບນັກກິລາຈູຈິດຊູທີມຊາດລາວ ສົ່ງທັບນັກກິລາເຂົ້າຮ່ວມ 5 ຄົນ ຈາກ 8 ລາຍການ.

ສຳລັບຜົນງານຂອງທັບນັກກິລາຈູຈິດຊູທີມຊາດລາວ ໃນການລົງສະໜາມມື້ທຳອິດ ໃນວັນທີ 21 ສິງຫາ 2026 ຜ່ານມາ ລົງທຳການແຂ່ງຂັນ 5 ລາຍການ ສາມາດຄວ້າໄດ້ 1 ຫຼຽນເງິນ ແລະ 2 ຫຼຽນທອງ ລວມ 3 ຫຼຽນ ໂດຍຜົນງານ 1 ຫຼຽນເງິນ ໄດ້ຈາກ ນາງ ແປງ ແສງມະນີ ຮຸ່ນນ້ຳຫນັກ -57 ກິໂລກຼາມຍິງ ປະເພດຕໍ່ສູ້ ຈິວຈິດຊູ (Jiu-Jitsu) ຫຼື ເນວາຊາ (Ne Waza) ສ່ວນ 2 ຫຼຽນທອງ ໄດ້ຈາກ ນາງ ມາລາ ຈັນທະລັກສາ ຄູ່ກັບ ນາງ ກຸ້ງກິ້ງ ບຸດດາໄຊ ປະເພດ ດູໂອ ຄູ່ຍິງ (Duo Women) ແລະ ປະເພດ ໂຊ ຄູ່ຍິງ (Show Women).

ຂະນະທີ່ ຜົນງານຂອງທ້າວ ຈິນດາວອນ ສີວັນວິໄລ ຮຸ່ນ -69 ກິໂລກຼາມຊາຍ ປະເພດຕໍ່ສູ້ ຈິວຈິດຊູ (Jiu-Jitsu) ຫຼື ເນວາຊາ (Ne Waza) ໄດ້ພຽງອັນດັບທີ 9 ແລະ ທ້າວ ຄຳແກ້ວ ວິໄລພອນ ຮຸ່ນ -62ກິໂລກຼາມຊາຍ ປະເພດຕໍ່ສູ້ ຈິວຈິດຊູ (Jiu-Jitsu) ຫຼື ເນວາຊາ (Ne Waza) ກໍໄດ້ອັນດັບທີ 9 ເຊັ່ນດຽວກັນ. ແນວໃດກໍດີ, ມື້ນີ້ 22 ສິງຫາ 2026 ທັບນັກກິລາຈູຈິດຊູທີມຊາດລາວ ມີຄິວລົງສະໜາມຄັ້ງສຸດທ້າຍ ກໍຍັງມີລຸ້ນຫຼຽນເພີ່ມອີກ 3 ລາຍການ ລາວສູ້…

ຂ່າວໂດຍ ສົງການ ພັນແພງດີ

ພາບຈາກ: ສະຫະພັນຈູຈີດຊູແຫ່ງຊາດລາວ