ນະຄອນຫຼວງວຽງຈັນ ສ້າງຜົນງານເດັ່ນ ຄວ້າ 10 ຫຼຽນຄຳ ລອຍນໍ້າ ຊີງແຊ໋ມນານາຊາດ ທີ່ປະເທດໄທ

ຄະນະນັກກິລາລອຍນໍ້າ ສະຫະພັນລອຍນໍ້າ ນະຄອນຫຼວງວຽງຈັນ ສາມາດສ້າງຜົນງານໄດ້ຢ່າງໂດດເດັ່ນ ກວາດ 10 ຫຼຽນຄຳ, 18 ຫຼຽນເງິນ ແລະ 24 ຫຼຽນທອງ ໃນການແຂ່ງຂັນລອຍນ້ຳຊີງແຊ໋ມນານາຊາດ ລາຍການ AOSI Swimming Championship Bangkok 2026 ຈັດຂຶ້ນ ລະຫວ່າງວັນທີ 29-30 ສິງຫາ 2026 ທີ່ນະຄອນຫຼວງບາງກອກ ປະເທດໄທ ເຊິ່ງລາຍການດັ່ງກ່າວ ມີນັກກິລາລອຍນ້ຳເຂົ້າຮ່ວມຫຼາຍກວ່າ 820 ຄົນ ຈາກ 16 ປະເທດ.

ອີງຕາມການລາຍງານຂໍ້ມູນຈາກສະຫະພັນລອຍນໍ້າ ນະຄອນຫຼວງວຽງຈັນ ໃຫ້ຮູ້ວ່າ: ເມື່ອທ້າຍເດືອນສິງຫາ ຜ່ານມາ ໄດ້ສົ່ງນັກກິລາການເຂົ້າຮ່ວມແຂ່ງຂັນລອຍນ້ຳ ຊີງແຊ໋ມນານຊາດ ລາຍການ AOSI Swimming Championship Bangkok ຊຶ່ງເປັນອີກໜຶ່ງເວທີສຳຄັນລະດັບນານາຊາດ ທີ່ມີນັກກິລາລອຍນ້ຳເຂົ້າຮ່ວມກວ່າ 820 ຄົນ ຈາກ 16 ປະເທດ, ໃນນັ້ນ ສະຫະພັນລອຍນ້ຳນະຄອນຫຼວງວຽງຈັນ ໄດ້ນຳພານັກກິລາຕົວແທນຈາກ ສປປ ລາວ ຈຳນວນທັງໝົດ 62 ຄົນ ເຂົ້າຮ່ວມການແຂ່ງຂັນ ຈາກ 3 ສະໂມສອນ ຄື ASW, RSC ແລະ V2A ນຳໂດຍທ່ານ ພູວັນ ພູເລືອງຫົງ ຮອງປະທານສະຫະພັນລອຍນ້ຳນະຄອນຫຼວງວຽງຈັນ ພ້ອມດ້ວຍຄະນະບໍລິຫານງານສະຫະພັນເຂົ້າຮ່ວມແຂ່ງຂັນ ດ້ວຍຄວາມທຸ້ມເທ ຄວາມພາກພຽນ ແລະ ການຝຶກຊ້ອມຢ່າງໜັກ ສາມາດສ້າງຜົນງານໄດ້ຢ່າງໜ້າພາກພູມໃຈ ກວາດ 10 ຫຼຽນຄຳ, 18 ຫຼຽນເງິນ ແລະ 24 ຫຼຽນທອງ ອັນດັບທີ 10 ຂອງການແຂ່ງຂັນ.

ຂ່າວໂດຍ: ສົງການ ພັນແພງດີ