ເປີດແຂ່ງຂັນ ເທຄວັນໂດ ຊີງແຊ້ມປະເທດລາວ ຄັ້ງທີ 10 ປະຈຳປີ 2026 ມີຊີງໄຊ 135 ລາຍການ

ເປີດການແຂ່ງຂັນເທຄວັນໂດ ຊີງແຊ້ມທົ່ວປະເທດ ຊີງຂັນທ່ານເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ ຄັ້ງທີ 10 ປະຈຳປີ 2026 ໃນວັນທີ 5 ກັນຍາ 2026 ທີ່ສູນການຄ້າ ພາກຊັນ ນະຄອນຫຼວງວຽງຈັນ ໃຫ້ກຽດເຂົ້າຮ່ວມມີທ່ານ ອີຈອງເຮີບ ເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ, ທ່ານ ແສງພອນ ພົນອາມາດ ຮອງປະທານ-ເລຂາທິການຄະນະກຳມະການໂອແລມປິກແຫ່ງຊາດລາວ, ທ່ານ ປະສາດໄຊ ພິລາພັນເດດ ປະທານສະຫະພັນເທຄວັນໂດແຫ່ງຊາດລາວ ແລະ ທ່ານ ບຸນມາ ທຳມະວົງ ຮອງຫົວໜ້າກົມກິລາລະດັບສູງ ພ້ອມດ້ວຍຄະນະບໍລິຫານງານສະຫະພັນ, ສະຫະພັນແຂວງ/ນະຄອນຫຼວງ ແລະ ບັນດາສະໂມສອນ ອ້ອມຂ້າງສູນກາງເຂົ້າຮ່ວມ.

ການແຂ່ງຂັນເທຄວັນໂດ ຊີງແຊ້ມປະເທດລາວ ປີນີ້ ມີນັກກິລາຫຼາຍກວ່າ 450 ຄົນ ຈາກ 20 ກວ່າພາກສ່ວນ ທີ່ມາຈາກໃນຂອບເຂດທົ່ວປະເທດເຂົ້າຮ່ວມ ແລະ ມີການຊີງໄຊ 135 ລາຍການ ຈາກປະເພດຕໍ່ສູ້ປ້ອງກັນຕົວ, ປະເພດຟ້ອນ ແລະ ປະເພດປະກອບອຸປະກອນ ຂະນະທີ່ຜົນງານເຄື່ອນໄຫວນັກກິລາສະໂມສອນໃດຈະສາມາດກວາດຫຼຽນຄຳ ແລະ ຂັນຊະນະເລີດ ລາຍການດັ່ງກ່າວ ໄດ້ຫຼາຍທີ່ສຸດ ຈະຂໍລາຍງານໃຫ້ທ່ານຊາບຕື່ມອີກ.

ການແຂ່ງຂັນກິລາເທຄວັນໂດໃນຄັ້ງນີ້ ແມ່ນຈະດຳເນີນເປັນເວລາ 2 ວັນ ລະຫວ່າງວັນທີ 5-6 ກັນຍາ 2026 ຈຶ່ງຈະສຳເລັດ.

ພາບ-ຂ່າວ ໂດຍ ສົງການ ພັນແພງດີ