ຊອບເທັນນິສທີມຊາດລາວ ສູ້ເຕັມທີ່ແລ້ວ ແຕ່ກໍຍັງໄປບໍ່ເຖິງດວງດາວ ຢຸດເສັ້ນທາງພຽງຮອບທຳອິດ!

ການແຂ່ງຂັນກິລາຊັອຟເທັນນິສ ໃນງານມະຫະກຳກິລາເອຊຽນເກມ ຄັ້ງທີ 20 ທີ່ເລີ່ມເປີດສາກຂຶ້ນ ໃນວັນທີ 18 ກັນຍາຜ່ານມາ ທີ່ສະໜາມຮີກາຊິຢາມາ ໂຄເອັນ ເທັນນິສ ເຊັນເຕີ, ເມືອງນາໂກຢາ, ປະເທດຍີ່ປຸ່ນ ເຊິ່ງໃນມື້ນີ້ ໄດ້ສົ່ງລົງແຂ່ງຂັນສະເພາະ ໃນປະເພດທີມຊາຍເທົ່ານັ້ນ ໂດຍມີຄະນະໂອແລມປິກລາວ ໄປໃຫ້ກຳລັງໃຈທີ່ຂອບສະໜາມ.

ຜົນງານການແຂ່ງຂັນມີດັ່ງນີ້:

ນັດທີ 1 ເສຍໃຫ້ກັບ ທີມຊາດອິນເດຍ ໄປ 0-3

ນັດທີ 2 ຊະນະ ທີມຊາດມົງໂກລີ ໄປໄດ້ 2-1

ນັດທີ 3 ເສຍໃຫ້ ທີມຊາດໄທເປ 0-3

ຈາກຜົນງານດັ່ງກ່າວ ສົ່ງຜົນໃຫ້ທີມຊາຍລາວຕ້ອງຢຸດເສັ້ນທາງໄວ້ພຽງຮອບແບ່ງກຸ່ມຢ່າງໜ້າເສຍດາຍ.

ເຖິງແນວໃດກໍຕາມ, ອາຈານ ອານັນດາ ຄຳພູມີ ໂຄຊທີມຊອບເທັນນິສ ກໍໃຫ້ສຳພາດວ່າ “ເຖິງແມ່ນວ່າທີມຊາຍຂອງພວກເຮົາຈະຕ້ອງຕົກຮອບໄປຢ່າງໜ້າເສຍດາຍແລ້ວກໍຕາມ ແຕ່ທຸກຄົນກໍ່ໄດ້ລົງສະໜາມສູ້ດ້ວຍຈິດວິນຍານ ແລະ ສະປີຣິດຂອງນັກກິລາຢ່າງເຕັມທີ່ ສ້າງຄວາມປະທັບໃຈ ແລະ ເຫັນໄດ້ເຖິງການພັດທະນາການທີ່ກ້າວກະໂດດໃນເວທີລະດັບສາກົນ ພ້ອມທັງເຊື່ອວ່າຈາກການໄດ້ມາຮ່ວມແຂ່ງຂັນໃນຄັ້ງນີ້ ຈະເຮັດໃຫ້ນັກກິລາພວກເຮົາ ເກັບໄດ້ບົດຮຽນ ແລະ ປະສົບການ ອັນລໍ້າຄ່າທີ່ສຸດ ເພື່ອນຳໄປພັດທະນາຕົນເອງໃນແະນາຄົດ” .

ອາຈານ ອານັນດາ ຄຳພູມີ ຍັງໃຫ້ຮູ້ອີກວ່າ ທີມຊອຟເທັນນິສລາວຍັງມີໂປຣແກຣມລົງແຂ່ງຂັນ ອີກສາມປະເພດຄື :

1. ຄູ່ປະສົມ: ນ ສຸວະນັນ ຮັກໜໍ່ລາດ ຄູ່ກັບ ທ ສະຖາພອນ ສິມມາລາວົງ;

2. ⁠ ຊາຍດຽວ: ທ ແບັກກີ້ ວົງພັກດີ ແລະ ທ້າວ ພັດທະນາ ຫຼວງສີສົມບັດ;

3. ⁠ຍິງດຽວ: ນ ສຸວະນັນ

ກິລາເທັນນິສ ເປັນໜຶ່ງໃນ 15 ປະເພດກິລາທີ່ ສປປ ລາວ ສົ່ງເຂົ້າຮ່ວມແຂ່ງຂັນໃນເອຊຽນເກມ ຄັ້ງທີ 20 ແລະ ເປັນໜຶ່ງໃນ 6 ປະເພດກິລາກຸ້ມຕົນເອງທັງໝົດ (ນອກແຜນ).

S2K ລາຍງານຈາກເມືອງນາໂກຢາ