ສ່ວຍສາອາກອນ ນວ ຊະນະ ສຳນັກກະຊວງ ສສກ 8-5 ເຕະບານ ນັດພິເສດ ສະຫຼອງເປີດສົກຮຽນໃໝ່

ທີມຊາວໜຸ່ມສຳນັກກະຊວງສຶກສາທິການ ແລະ ກິລາ ຫຼື ສສກ ຮ່ວມກັບ ທີມເຕະບານຊາວໜຸ່ມ ສ່ວຍສາອາກອນ ນະຄອນຫຼວງວຽງຈັນ (ນວ) ຈັດການແຂ່ງຂັນກິລາເຕະບານ ນັດພິເສດ ມິດຕະພາບ ເພື່ອສ້າງຂະບວນການສະເຫຼີມສະຫຼອງວັນເປີດສົກຮຽນໃໝ່ ສົກຮຽນ 2023-2024 ໃນທົ່ວປະເທດ ເວົ້າລວມ, ເວົ້າສະເພາະແມ່ນໃນນະຄອນຫຼວງວຽງຈັນ ພ້ອມທັງເປັນການຮັດແໜ້ນຄວາມສາມັກຄີມິດຕະພາບຄວາມຮັກແພງລະຫວ່າງພະນັກງານຂອງທັງສອງພາກສ່ວນໃຫ້ນັບມື້ແໜ້ນແຟ້ນຂຶ້ນເລື້ອຍໆ.

ການແຂ່ງຂັນເຕະບານ ນັດພິເສດ ມິດຕະພາບ ລະຫວ່າງ ຊາວໜຸ່ມສຳນັກກະຊວງ ສສກ ພົບກັບ ທີມເຕະບານຊາວໜຸ່ມ ສ່ວຍສາອາກອນ ນວ ໃນຄັ້ງນີ້ ຈັດຂຶ້ນ ເມື່ອວັນທີ 13 ກັນຍາ 2023 ທີ່ສະໜາມກິລາເຈົ້າອານຸວົງ ໂດຍການນຳພາທີມສຳນັກກະຊວງສຶກສາທິການ ແລະ ກິລາຂອງ ທ່ານ ອຳໄພວັນ ກວ້າງມະນີວັນ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ສ່ວນທີມສ່ວຍສາອາກກກອນ ນວ ແມ່ນນຳທີມໂດຍ ທ່ານ ວິໄນ ທິບດາລາ ຮອງຫົວໜ້າສ່ວຍສາອາກອນ ປະຈຳ ນະຄອນຫຼວງວຽງຈັນ ມີບັນດາສະມາຊິກທັງສອງພາກສ່ວນເຂົ້າຮ່ວມຢ່າງເປັນຂະບວນການຄຶກຄື້ນ ເບີກບານ ແລະ ມ່ວນຊື່ນ.

ຜ່ານການແຂ່ງຂັນຄູ່ດັ່ງກ່າວ ຕະຫຼອດໄລຍະ 90 ນາທີ ຜົນປະກົດວ່າ ເປັນຝ່າຍທາງທີມສ່ວຍສາອາກອນ ນວ ທີ່ຫຼິ້ນບານໄດ້ດີກວ່າ ເປັນຝ່າຍເອົາຊະນະ ທີມຊາວໜຸ່ມ ສຳນັກກະຊວງ ສສກ ໄປແບບສຸດມ່ວນ 8-5 ປະຕູ.

ຂ່າວໂດຍ: ສົງການ ພັນແພງດີ