ເຕະບານເຍົາວະຊົນ 3 ຮຸ່ນ ລາຍການ ຣາດາ ຊຸບເປີ ຄັບ 2023 ສະຫຼອງ 7 ຕຸລາ ຈະເປີດສາກກາງເດືອນຕຸລານີ້

ການແຂ່ງຂັນເຕະບານລະດັບເຍົາວະຊົນ 3 ຮຸ່ນ ລາຍການ ຣາດາ ຊຸບເປີ ຄັບ ຄັ້ງທີ 1 ປະຈຳປີ 2023 ຫຼື  Radar Super Cup 2023 ເພື່ອສ້າງຂະບວນການສະເຫຼີມສະຫຼອງວັນຄູແຫ່ງຊາດ ຄົບຮອບ 29 ປີ (7 ຕຸລາ 1994-7 ຕຸລາ 2023) ຈະເປີດສາກຂື້ນລະຫວ່າງວັນທີ 14-15 ຕຸລານີ້ ທີ່ສະໜາມກິລາ ສູນຈຳໜ່າຍລົດ ຍີ່ຫໍ້ ມັດສະດາ (Mazda) ເຂດສີໄຄ ເມືອງສີໂຄດຕະບອງ ນະຄອນຫຼວງວຽງຈັນ ຊິງເງິນລາງວັນລວມ 30 ລ້ານກີບ.

ການແຂ່ງຂັນລາຍການດັ່ງກ່າວ ນອກຈາກຈະຈັດຂຶ້ນ ເພື່ອສ້າງຂະບວນການສະເຫຼີມສະຫຼອງວັນຄູແຫ່ງຊາດ 7 ຕຸລາ 2023 ກໍຍັງເປັນການສົ່ງເສີມນັກກິລາເຍົາວະຊົນຂອງບັນດາສະໂມສອນຕ່າງໆ ພາຍໃນນະຄອນຫຼວງວຽງຈັນ ແລະ ຕ່າງແຂວງໃຫ້ມີການພັດທະນາຢ່າງຕໍ່ເນື່ອງ ສາມາດກ້າວຂຶ້ນໄປເປັນນັກກິລາລະດັບຊາດ ກໍຄື ຕິດທີມຊາດ ໃນອະນາຄົດ ໃຫ້ນັບມື້ເຕີບໃຫຍ່ຂະຫຍາຍຕົວຢ່າງກວ້າງຂວາງ ລາຍການນີ້ ໃນເບື້ອງຕົ້ນ ມີບັນດາສະໂມສອນແຈ້ງເຈດຈຳນົງຂົ້າຮ່ວມແຂ່ງຂັນແລ້ວ ຮຸ່ນລະ 8 ທີມ ກໍຄື ຮຸ່ນ 10 ປີ ມີ 8 ທີມ, ຮຸ່ນ 12 ປີ ມີ 8 ທີມ ແລະ ຮຸ່ນ 14 ປີ ມີ 8 ທີມ, ໃນນັ້ນ ທີມໜຶ່ງຈະຕ້ອງມີນັກກິລາ ໃນຈຳນວນ 15 ຄົນ ສຳລັບເງື່ອນໄຂນັກກິລາ ສະເພາະຮຸ່ນອາຍຸ 10 ປີ ຈະຕ້ອງເກີດໃນປີ 2013 ຫຼື 2014 ສ່ວນຮຸ່ນອາຍຸ 12 ປີຈະຕ້ອງເກີດປີ 2012 ແລະ 2011 ແລະ ຮຸ່ນອາຍຸ 14 ປີຈະຕ້ອງເກີດໃນປີ 2009 ແລະ ປີ 2010 ຊຶ່ງຄ່າສະໝັກຖືກທີມລະ 2 ລ້ານກີບ, ໃນນັ້ນ ທີມແຊ໋ມຈະໄດ້ຮັບຫຼຽນລາງວັນ, ຂັນແຊ໋ມ ແລະ ເງິນສົດທີມລະ 5 ລ້ານກີນ, ອັນດັບທີ 2 ຈະໄດ້ຮັບເງິນລາງວັນທີມລະ 3 ລ້ານກີບ, ອັນດັບທີ 3 ຈະໄດ້ຮັບເງິນລາງວັນທີມລະ 2 ລ້ານກີບ ແລະ ອັນດັບທີ 4 ກໍຈະໄດ້ຮັບເງິນລາງວັນທີມລະ 1 ລ້ານກີບ.

ສຳລັບຮຸ່ນ 10 ປີ 8 ທີມເຂົ້າຮ່ວມ ປະກອບມີ ມັດສະດາ ທີມ ເອ, ມັດສະດາ ທີມ ບີ, ມັດສະດາ ທີມ ຊີ, ເດັກພວນ ຊຽງຂວາງ, ວຽງຈັນ ເອັບທີ, ວອນທະບິງ ຫຼວງພະບາງ, ສະປີດ ເອັບຊີ ແລະ ພີເອັມທີ ເອັບຊີ; ຮຸ່ນອາຍຸ 12 ປີ ປະກອບມີ ມັດສະດາ, ເດັກພວນ ຊຽງຂວາງ, ມາດເຕີ ເຊເວັນ, ວຽງຈັນ ເອັບທີ ທີມ ເອ, ວຽງຈັນ ເອັບທີ ທີມ ບີ, ວອນທະບິງ ຫຼວງພະບາງ, ຈຳປາຮັກ, ຄຳໄສ ເອັບຊີ ແລະ ປາກຊັນ ເອັບຊີ; ຮຸ່ນອາຍຸ 14 ປີ ປະກອບມີ ມັດສະດາ ທີມ ເອ, ມັດສະດາ ທີມ ບີ, ວຽງຈັນ ເອັບທີ, ນິນຈາ ເອັບຊີ, ວອນທະບິງ ຫຼວງພະບາງ, ຈຳປາຮັກ ເອັບຊີ, ປາກຊັນ ເອັບຊີ ແລະ ຊູເປີ ສະຕາ ເອັບຊີ (Super Star FC).

ຂ່າວໂດຍ ສົງການ ພັນແພງດີ