ບ້ານວຽງໄຊ ເມືອງອາດສະພອນ ແຂ່ງຂັນເຮືອຊ່ວງ ປະຈຳປີ ພສ 2566

ບ້ານວຽງໄຊ ເມືອງອາດສະພອນ ແຂວງສະຫວັນນະເຂດ ຈັດງານແຂ່ງຂັນຊ່ວງເຮືອ ປະຈຳປີ ພສ 2566 ຫຼື  ຄສ 2023 ເພື່ອເປັນການສືບສານ ຕາມຮີດສີບສອງຄອງສິບສີ່ ແລະ ປະເພນີອັນດີງາມຂອງຊາດ ຂອງເຜົ່າ ໃນວັນ​ທີ 1 ຕຸລາ 2023 ທີ່ສາຍເຊຈຳພອນ ທ່າວັງຂອງບ້ານວຽງໄຊ ໂດຍການເຂົ້າຮ່ວມຂອງ ທ່ານ ສະຫງວນ ບຸນຮົ່ມໂພສີ ເລຂາຄະນະພັກຮາກຖານ ຫົວໜ້າຈຸດສຸມນາເລົ່າ ທັງເປັນປະທານຈັດງານ ແລະ ທ່ານ ສົມດີ ດອກດາລາ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຫຼື ຖວທ ເມືອງ ພ້ອມດ້ວຍບັນດາການນຳຈາກຂະແໜງການອ້ອມຂ້າງເມືອງ, ​​ອົງ​ການຈັດຕັ້ງ​ບ້ານອ້ອມຂ້າງ ຕະຫຼອດ​ຮອດ​ພໍ່​ແມ່​ປະຊາຊົນ ​ບັນດາເຜົ່າ ເຂົ້າຮ່ວມຊົມ ຮ່ວມເຊຍ ຢ່າງຫຼວງຫຼາຍ.

ທ່ານ ສະຫງວນ ບຸນຮົ່ມໂພສີ ກ່າວວ່າ: ການຈັດງານແຂ່ງຂັນຊ່ວງເຮືອໃນປີນີ້ ແມ່ນເພື່ອສືບສານຕາມຮີດຄອງປະເພນີຂອງທ້ອງຖິ່ນ ທີ່ເຄີຍປະຕິບັດກັນມາໃນແຕ່ລະປີ ແລະ ການຈັດງານ ໄດ້ຢຸດເຊົາໄລຍະໜຶ່ງ ນັບແຕ່ປີ 2019 ເປັນຕົ້ນມາ ເນື່ອງຈາກມີການລະບາດຂອງພະຍາດໂຄວິດ-19, ມາໃນປີນີ້ສະພາບການລະບາດຂອງພະຍາດດັ່ງກ່າວເບົາບາງລົງ ແລະ ຢຸດເຊົາແລ້ວ ຈຶ່ງໄດ້ພ້ອມພາກັນສືບສານງານບຸນປະເພນີຊ່ວງເຮືອຄືນໃໝ່ ເພື່ອເປັນການສືບສານທາງດ້ານວັດທະນະທຳ ຮີດຄອງປະເພນີອັນດີງາມຂອງຊາດໃຫ້ຄົງຢູ່ຈົນຊົ່ວລູກຫຼານ.

ສຳລັບງານບຸນຊ່ວງເຮືອທີ່ບ້ານວຽງໄຊ ໃນປີນີ້ ມີເຮືອເຂົ້າຮ່ວມແຂ່ງຂັນທັງໝົດ 14 ທີມ, ທີມລະ 12 ສີພາຍ, ໃນນັ້ນທີມຍິງ 4 ທີມ. ຜ່ານການແຂ່ງຂັນເປັນເວລາ 1 ​ວັນເຕັມ ຜົນປະກົດວ່າ ປະເພດຊາຍ ຊະນະເລີດ  ເຮືອບ້ານວຽງໄຊ1, ຮອງຊະນະເລີດ ເຮືອບ້ານວຽງໄຊ2, ອັນດັບທີ 4 ເຮືອບ້ານນາຍອນ ແລະ ອັນດັບທີ 4 ເຮືອໜຸ່ມບ້ານວຽງໄຊ. ສ່ວນປະເພດຍິງ ຊະນະເລີດ  ເຮືອບ້ານວຽງໄຊ, ຮອງຊະນະເລີດ ເຮືອບ້ານນາຍອນ, ອັນດັບທີ 3 ເຮືອບ້ານບຶງພະເໜາະ ແລະ ອັນດັບທີ 4 ເຮືອບ້ານຈອມຮາດ.

ຂ່າວ: ຖວທ ເມືອງອາດສະພອນ.