ສອງພາກສ່ວນຊຸກຍູ້ເສື້ອ ໃຫ້ກໍາມະການຕັດສິນ ງານແຂ່ງຂັນຊ່ວງເຮືອຈອມແຈ້ງ

ໂຮງຮຽນນານາຊາດວຽງຈັນ (VIS) ປະກອບສ່ວນຊຸກຍູ້ເສື້ອ ຈໍານວນ 10 ຜືນ ມູນຄ່າ 6.900.000 ກີບ ໃຫ້ແກ່ກໍາມະການຕັດສິນ ໃນງານແຂ່ງຂັນກິລາເຮືອຊ່ວງຈອມແຈ້ງ ເມືອງສີສັດຕະນາກ ນະຄອນຫຼວງວຽງຈັນ ນອກຈາກນີ້ ສູນກິລາພີພີໜອງຄາຍ ມອບໃຫ້ 30 ຜືນ ມູນຄ່າ 2.925.000 ກີບ ລວມທັງໝົດ 40 ຜືນ ລວມມູນຄ່າ 9.825.000 ກີບ.
ພິທີມອບ-ຮັບເສື້ອຈາກ VIS ຈໍານວນ 10 ຜືນ ຈັດຂຶ້ນວັນທີ 18 ຕຸລາ 2023 ຢູ່ໂຮງຮຽນນານາຊາດວຽງຈັນ ໂດຍການກ່າວມອບຂອງ ທ່ານ ນາງ ເອວຊາ ໂດໂນຮິວ (Elsa Donohue) ຫົວໜ້າໂຮງຮຽນນານາຊາດວຽງຈັນ ແລະ ກ່າວຮັບຂອງ ທ່ານ ກາລຸນາ ຫົງຄໍາ ຮອງຫົວໜ້າໜ່ວຍງານກິລາ-ກາຍະກໍາ ແລະ ສິລະປະ ຫ້ອງການສຶກສາທິການ ແລະ ກີລາ ເມືອງສີສັດຕະນາກ ມີພະນັກງານວິຊາການກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ນອກຈາກນີ້ ໃນວັນທີ 17 ຕຸລາ 2023 ຢູ່ສູນກິລາພີພີໜອງຄາຍ ທ່ານ ອາພາກອນ ຕຸຍານັນ ຜູ້ຈັດການສູນກິລາພີພີໜອງຄາຍ ຍັງໄດ້ມອບໃຫ້ 30 ຜືນ ໃຫ່ແກ່ກໍາມະການຕັດສິນງານແຂ່ງຂັນກິລາເຮືອຊ່ວງຈອມແຈ້ງ ແລະ ຮັບແມ່ນທ່ານ ວິຊຽນ ໂລວັນ ຫົວໜ້າໜ່ວຍງານກີລາ-ກາຍະກໍາ ແລະ ສິລະປະ ຫ້ອງການສຶກສາທິການ ແລະ ກີລາ ເມືອງສີສັດຕະນາກ ທັງເປັນຄະນະຮັບຜິດຊອບຈັດການແຂ່ງຂັນຊ່ວງເຮືອຈອມແຈ້ງ.
ສໍາລັບການແຂ່ງຂັນກິລາຊ່ວງເຮືອ ປະຈໍາປີ 2023 ທີ່ທ່ານໍ້າຂອງໜ້າວັດຈອມແຈ້ງ ບ້ານຈອມແຈ້ງ ເມືອງສີສັດຕະນາກ ນະຄອນຫຼວງວຽງຈັນ ມາຮອດປັດຈຸບັນມີເຮືອທີ່ແຈ້ງເຈດຈໍານົງສະໝັກເຂົ້າຮ່ວມແຂ່ງ ຂັນແລ້ວໄດ້ຈໍານວນ 9 ລໍາ ແລະ ຄາດວ່າຮອດວັນທີ 20 ຕຸລາ 2023 ຊຶ່ງເປັນມື້ປິດຮັບສະໝັກ ຈະມີເຮືອເຂົ້າຮ່ວມຫຼາຍກວ່າ 10 ລໍາ ໂດຍໃນເວລາ 09:00 ໂມງ ຂອງວັນທີ 20 ຕຸລານີ້ ຈະມີການປະຊຸມຈັບສະຫຼາກ ແລະ ເຜີຍແຜ່ກົດລະບຽບແຂ່ງຂັນ ຢູ່ສະຖານທີ່ວັດຈອມແຈ້ງ ທີມເຮືອຊ່ວງບ້ານໃດສົນໃຈກໍສາ ມາດ ໂທຕິດຕໍ່ພົວພັນທີ່ເບີ 020 2265 5662 ແລະ 020 5593 6885 ໃນໂມງລັດຖະການ.

ສໍາລັບຄ່າສະໝັກເຮືອແຕ່ລະລໍາທີ່ເຂົ້າຮ່ວມແຂ່ງຂັນແມ່ນ 300.000 ກີບ/ລໍາ ຄ່າລາກແກ່ເຮືອເຂົ້າຮ່ວມແຂ່ງຂັນ 500.000 ກີບ/ລໍາ ສ່ວນປະເພດເງິນລາງວັນ ອັນດັບ 1 ຈະໄດ້ຮັບຂັນໂລ້ 1 ໜ່ວຍ+ເງິນລາງວັນ 5 ລ້ານກີບ, ອັນດັບ 2 ຈະໄດ້ຮັບຂັນໂລ້ 1 ໜ່ວຍ+ເງິນລາງວັນ 3 ລ້ານກີບ, ອັນດັບ 3 ຈະໄດ້ຮັບຂັນໂລ້ 1 ໜ່ວຍ+ເງິນລາງວັນ 2 ລ້ານກີບ ແລະ ອັນດັບ 4 ຈະໄດ້ຮັບເງິນລາງວັນ 1 ລ້ານກີບ.

ຂ່າວໂດຍ: ລູກນ້ຳເຊ ອິນທະດາລິນ