ປະສານໃຈ ຄອງແຊ໋ມເຕະບານ ການກຸສົນ ເຊື່ອມສາຍສຳພັນສອງຊາດ ລາວ-ໄທ

ສະໂມສອນ ປະສານໃຈ ໄລ່ເອົາຊະນະ ສະໂມສອນ ໜອງຄາຍ ຢູໄນເຕັດ ໄປແບບຫວຸດຫວິດ 1-0 ຄວ້າແຊ໋ມ ການແຂ່ງຂັນເຕະບານ ລາຍການ ດິວິຊັນ l ເພື່ອການກຸສົນເຊື່ອມສາສຳພັນ ມິດຕະພາບ ລາວ-ໄທ, ໄທ-ລາວ ປະຈຳປີ 2023 ຮຸ່ນອາຍຸ 40 ປີຂຶ້ນໄປ ຂະນະທີ່ ແຊ໋ມລາຍການດິວິຊັນ ll ກໍຕົກເປັນຂອງສະໂມສອນ ພີທີ ໂອໂຕ ຈາກສປປ ລາວ ເຊັ່ນກັນ.

ການແຂ່ງຂັນເຕະບານ ລາຍການດັ່ງກ່າວ ໄດ້ຈັດຂຶ້ນເມື່ອວັນທີ 14-15 ຕຸລາ 2023 ທີ່ສະໜາມກາງແຂວງໜອງຄາຍ ປະເທດໄທ ລາຍການນີ້ ມີ 8 ສະໂມສອນ ເຂົ້າຮ່ວມຊີງໄຊ, ໃນນັ້ນຈາກ ສປປ ລາວ ມີ ສອງສະໂມສອນ ກໍຄື ສະໂມສອນ ປະສານໃຈ ແລະ ສະໂມສອນ ພີທີ ໂອໂຕ ລາຍການດັ່ງກ່າວ ແບ່ງອອກເປັນສອງສາຍ ແຕ່ລະສາຍແຂ່ງຂັນເກັບຄະແນນ ໄລ່ປະຕູໄດ້ເສຍ ຄັດເລືອກເອົາອັນດັບທີ 1 ຂອງສອງກຸ່ມ ໄປຊີງຊະນະເລີດກັນ ໃນລະດັບລາຍການດິວິຊັນ 1 ແລະ ອັນດັບທີ 2 ໄປຊີງຊະນະເລີດ ໃນລາຍການດິວິຊັນ 2.

ສຳລັບກຸ່ມ ເອ ປະກອບມີ ເຈົ້າຖິ່ນ ໜອງຄາຍ ຢູໄນເຕັດ, ພີທີ ໂອໂຕ, ບີເຄ ໄທແລນ, ນາຂ່າຖ່ອນ ເອັບຊີ ສ່ວນ ກຸ່ມ ບີ ປະກອບມີ ປະສານໃຈ, ເສືອເຖົ້າ, ຣາຊະພັດ ອຸດອນ ແລະ ຈິຣາ ຈາກໄທ ປະສມກັບ ສະໂມສອນເມືອງລາວ ເອັບຊີ ຜ່ານການແຂ່ງຂັນຜົນປະກົດວ່າ: ຄູ່ຊີງຊະນະເລີດ ລາຍການດິວິຊັນ 1 ສະໂມສອນ ປະສານໃຈ ສາມາດໄລ່ເອົາຊະນະ ສະໂມສອນ ໜອງຄາຍ ຢູໄນເຕັດ ເຈົ້າຖິ່ນ ໄປແບບຫວຸດຫວິດ 1-0 ປະຕູ ຄວ້າແຊ໋ມໄປຄອງ ສ່ວນຄູ່ຊີງຊະນະເລີດ ລາຍການ ດິວິຊັນ 2 ກໍເປັນ ສະໂມສອນ ພີທີ ໂອໂຕ ຈາກ ລາວເຊັ່ນກັນ ໄລ່ເອົາຊະນະ ສະໂມສອນ ເສືອເຖົ້າ ໄປແບບຫວຸດຫວິດ 2-1 ປະຕູ ຄອງແຊ໋ມລາຍການດັ່ງກ່າວ.

ໂດຍ: ສົງການ ພັນແພງດີ