ມສ ໂພນທອງ ຄວ້າແຊ໋ມເຕະບານນັກຮຽນມັດທະຍົມສຶກສາຕອນຕົ້ນ ຊີງຂັນເຈົ້າແຂວງຈຳປາສັກ

ການແຂ່ງຂັນກິລາເຕະບານລະດັບນັກຮຽນມັດທະຍົມສຶກສາຕອນຕົ້ນ ຊີງຂັນທ່ານເຈົ້າແຂວງຈໍາປາສັກ ປະຈຳປີ 2023 ສຳເລັດລົງຢ່າງຈົບງາມ ໃນວັນທີ 3 ພະຈິກ 2023 ພາຍຫຼັງດໍາເນີນການແຂ່ງຂັນມາແຕ່ວັນທີ 23 ຕຸລາ 2023 ທີ່ສະໜາມກິລາແຂວງ ໂດຍພາຍໃຕ້ການເປັນປະທານຂອງ ທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ, ປະທານຄະນະກວດກາພັກລັດແຂວງ, ຮອງປະທານສະຫະພັນກິລາບານເຕະແຂວງ, ມີ ທ່ານ ເພັດສາຄອນ ຄໍສີສະຫວັດ ຮອງຫົວໜ້າພະແນດອຸດສະຫະກຳ ແລະ ການຄ້າ, ຄະນະບໍລິຫານງານສະຫະພັນກິລາບານເຕະແຂວງ ແລະ ທ່ານ ວຽງຄໍາ ສີລິປັນຍາ ຮອງຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍບັນດາຜູ້ຕາງໜ້າຈາກພະແນກການ-ກົມກອງອ້ອມຂ້າງແຂວງ, ຄະນະຈັດການແຂ່ງຂັນ, ຄະນະກໍາມະການ, ຄະນະຄູຝຶກ-ນັກກິລາ ແລະ ແຟນບານເຂົ້າຮ່ວມຫຼາຍກວ່າ 1.000 ຄົນ ຢ່າງເປັນຂະບວນຟົດຟື້ນ.

ຜ່ານການແຂ່ງຂັນຜົນປະກົດວ່າ: ທີມໂຮງຮຽນມັດທະຍົມສົມບູນ ຫຼື ມສ ໂພນທອງ ສາມາດຄວ້າລາງວັນຊະນະເລີດ ໄດ້ຮັບຂັນ 1 ໜ່ວຍ ພ້ອມເງິນສົດ 5.000.000 ກີບ, ຮອງຊະນະເລີດ ທີມໂຮງຮຽນມັດທະຍົມຕອນຕົ້ນສະໜາມໄຊ ໄດ້ຮັບເງິນລາງວັນ 3.000.000 ກີບ ແລະ ອັນດັບທີ 3 ທີມເມືອງໂພນທອງ ໄດ້ຮັບເງິນລາງວັນ 1.500.000 ກີບ. ຂະນະທີ່ ທ້າວ ສຸກສະຫວັນ ຄໍາຈັນ ນັກກິລາທີມໂຮງຮຽນມັດທະຍົມສົມບູນໂພນທອງ ໄດ້ຮັບລາງວັນນັກກິລາຍິງປະຕູສູງສຸດ ຈໍານວນ 7 ປະຕູ ພ້ອມຮັບເງິນລາງວັນ 500.000 ກີບ.
ສຳລັບການແຂ່ງຂັນກິລາເຕະບານນັກຮຽນມັດທະຍົມສຶກສາຕົ້ນ ຊີງຂັນທ່ານເຈົ້າແຂວງຈໍາປາສັກ ປະຈໍາປີ 2023 ແມ່ນການຈັດຕັ້ງປະຕິບັດຕາມແຜນການເຄື່ອນໄຫວຂອງສະຫະພັນກິລາບານເຕະແຫ່ງຊາດລາວ ຊຶ່ງເປັນຜູ້ສະໜອງທຶນສົມທົົບກັບສະພັນກິລາບານເຕະແຂວງຈໍາປາສັກ ຈັດການແຂ່ງຂັນກິລາເຕະບານລະດັບນັກຮຽນມັດທະຍົມສຶກສາ ຕອນຕົ້ນ ແນໃສເພື່ອການພັດທະນາກິລາບານເຕະ ແລະ ສ້າງໄດ້ນັກກິລາບານເຕະເຍົາວະຊົນ ຮຸ່ນສືບທອດ ເພື່ອຄັດເລືອກນັກກິລາມາຮັບໃຊ້ທີມກິລາບານເຕະຂອງແຂວງ, ຕໍ່ຍອດໄປສູ່ລະດັບຊາດ ແລະ ສາກົນໃນຕໍ່ໜ້າ.

ພາບ-ຂ່າວ: ສຕຂ ຈຳປາສັກ