ບໍລິສັດ ເອັນພີ ມອບເຄື່ອງກິລາ 44 ຊຸດ ໃຫ້ກົມຕຳຫຼວດສືບສວນ-ສອບສວນ ຈັດກິດຈະກຳກິລາສະຫຼອງວັນຊາດ ຄົບຮອບ 48 ປີ

ບໍລິສັດ ເອັນພີ ທີ່ປຶກສາ ຈຳກັດ ຜູ້ດຽວ ໃຫ້ການສະໜັບສະໜູນມອບເຄື່ອງນຸ່ງກິລາ ຈຳນວນ 44 ຊຸດ ລວມມູນຄ່າ 7 ລ້ານກວ່າກີບ ໃຫ້ແກ່ກົມຕຳຫຼວດ ສືບສວນ-ສອບສວນ ກະຊວງປ້ອງກັນຄວາມສະຫງົບ ຫຼື ປກສ ເພື່ອຄວາມສະດວກໃນການຈັດກິດຈະກຳຮ່ວມກັບບັນດາພາກສ່ວນທັງພາກລັດ-ພາກເອກະຊົນ ເນື່ອງໃນໂອກາດສ້າງຂະບວນການສະເຫຼີມສະຫຼອງວັນຊາດ ຄົບຮອບ 48 ປີ (2 ທັນວາ 1975-2 ທັນວາ 2023) ທີ່ຈະໝູນວຽນມາບັນຈົບຄົບຮອບອີກວາລະໜຶ່ງໃນມໍ່ໆນີ້.

ພິທີມອບ-ຮັບເສື້ອກິລາໃນຄັ້ງນີ້ ໄດ້ມີຂຶ້ນໃນຕອນແລງວັນທີ 22 ພະຈິກ 2023 ທີ່ສະໜາມກິລາຫຍ້າທຽມ ເບ ສະຫວັນ ເອັບຊີ ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ເປັນກຽດມອບໂດຍທ່ານ ນາງ ພັນນາລີ ແກ້ວສະກຸນວຽງ ປະທານບໍລິສັດ ເອັນພີ ທີ່ປຶກສາ ຈຳກັດ ຜູ້ດຽວ ແລະ ກ່າວຮັບແມ່ນທ່ານ ພັທ ສິງແກ້ວ ວົງພະຈັນ ຮອງຫົວໜ້າກົມຕຳຫຼວດສືບສວນ-ສອບສວນ ກະຊວງປ້ອງກັນຄວາມສະຫງົບ, ມີທ່ານ ບຸນມີ ຫຼ່ຽມໄຊຍະຈັກ ປະທານສະຫະພັນບານເຕະຄົນພິການຕາແຫ່ງຊາດລາວ ທັງເປັນເຈົ້າຂອງສະໜາມຫຍ້າທຽມ ເບ ສະຫວັນ ເອັບຊີ ພ້ອມດ້ວຍຄະນະ ແລະ ບັນດາພະນັກງານ ກໍຄື ສະມາຊິກນັກກິລາບານເຕະຂອງສອງພາກສ່ວນດັ່ງກ່າວເຂົ້າຮ່ວມເປັນສັກຂີພິຍານ.

ພາຍຫຼັງພິທີມອບ-ຮັບສຳເລັດແລ້ວ ໃນບັນຍາກາດດັ່ງກ່າວ ກໍໄດ້ມີການແຂ່ງຂັນກິລາເຕະບານນັດພິເສດ ມິດຕະພາບ ລະຫວ່າງ ທີມ ເບ ສະຫວັນ ເອັບຊີ ພົບກັບ ທີມກົມຕຳຫຼວດ ສືບສວນ-ສອບສວນ ເພື່ອສ້າງຂະບວນການຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 48 ປີ ພ້ອມທັງເປັນການຮັດແໜ້ນຄວາມສາມັກຄີໃຫ້ແກ່ນັກກິລາຂອງທັງສອງທີມດ້ວຍກັນໃຫ້ນັບມື້ກວ້າງຂວາງຂຶ້ນເລື້ອຍໆ ຜ່ານການແຂ່ງຂັນຜົນປະກົດວ່າ ທັງສອງທີມບໍ່ສາມາດເອົາຊະນະກັນໄດ້ ສະເໝີກັນໄປແບບສຸດມ່ວນ 2-2 ປະຕູ.

ຂ່າວໂດຍ: ສົງການ ພັນແພງດີ