ວພສ ຈັດແຂ່ງຂັນເຕະບານ ຄູອາຈານ-ນັກສຶກສາ ຕ້ອນຮັບກອງປະຊຸມໃຫຍ່ 3 ຂັ້ນ

ວິທະຍາໄລພະລະສຶກສາ ຫຼື ວພສ ຮ່ວມມືກັບ ສະໂມສອນ ຊຸງຊານ ເອັບຊີ (Sung San FC) ຈາກ ສ. ເກົາຫຼີ ປະຈຳນະຄອນຫຼວງວຽງຈັນ ຈັດການແຂ່ງຂັນກິລາເຕະບານລະດັບນັກສຶກສາ ຮ່ວມກັບ ພະນັກງານ, ຄູອາຈານ ພາຍໃນ ວພສ ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນ ຂອງຄະນະພັກຮາກຖານ ວພສ ແນໃສ່ສະເຫຼີມສະຫຼອງວັນສຳຄັນຕ່າງໆຂອງຊາດ ເວົ້າລວມ, ເວົ້າສະເພາະແມ່ນວັນຊາດທີ 2 ທັນວາ ຄົບຮອບ 48 ປີ ໃຫ້ເປັນຂະບວນການຟົດຟື້ນ.

ກິດຈະກຳແຂ່ງຂັນກິລາເຕະບານ ພາຍໃນວິທະຍາໄລດັ່ງກ່າວ ຈັດຂຶ້ນ ເມື່ອວັນທີ 28 ພະຈິກ 2023 ທີ່ສະໜາມກິລາຂອງ ວພສ ໂດຍໃຫ້ກຽດເຂົ້າຮ່ວມມີທ່ານ ບຸນໂຮມ ສີຣິຜົນ ຮອງຜູ້ອຳນວຍການວິທະຍາໄລພະລະສຶກສາ ແລະ ທ່ານ ຫົງ ອິນ ວອງ (Hong In Woong) ປະທານສະໂມສອນ ຊຸງຊານ ເອັບຊີ ຈາກ ສ ເກົາຫຼີ ປະຈຳ ນະຄອນຫຼວງວຽງຈັນ ພ້ອມດ້ວຍຄະນະອຳນວຍການ, ພະນັກງານ ຄູອາຈານ ແລະ ນ້ອງນັກສຶກສາຢ່າງພ້ອມພຽງ.
ໃນພິທີດັ່ງກ່າວ ກໍໄດ້ມີການຜ່ານຂໍ້ຕົກລົງຂອງວິທະຍາໄລພະລະສຶກສາ ວ່າດ້ວຍການຍ້ອງຍໍໃຫ້ແກ່ຄະນະນຳຂອງສະໂມສອນ ຊຸງຊານ ເອັບຊີ ທີ່ມີຜົນງານໃນການປະກອບສ່ວນຊ່ວຍເຫຼືອດ້ານວັດຖຸ, ອຸປະກອນຮັບໃຊ້ກິລາບານເຕະ ແລະ ຝຶກຊ້ອມກິລາດັ່ງກ່າວໃຫ້ແກ່ນັກສຶກສາພາຍໃນວິທະຍາໄລ. ຫຼັງຈາກນັ້ນ, ກໍໄດ້ມີການແຂ່ງຂັນກິລາເຕະບານຍິງ-ຊາຍ ຈຳນວນ 13 ຄູ່ ຊຶ່ງເປັນການປະສົມກັນລະຫວ່າງນັກສຶກສາ ແລະ ພະນັກງານຄູອາຈານ ທີ່ເຂົ້າຮ່ວມເກືອບ 100 ຄົນ, ໃນນັ້ນ ປະເພດທີມຍິງ ມີ 3 ທີມ ປະກອບມີ ໜ່ວຍພັກວິຊາການ ແລະ ສູນປ້ອງກັນຊາດ-ປ້ອງກັນຄວາມສະຫງົບ, ໜ່ວຍພັກກວດກາ, ປະເມີນຜົນ ແລະ ພາກວິຊາພະລະສຶກສາ ແລະ ໜ່ວຍພັກບໍລິຫານ ແລະ ຄຸ້ມຄອງກິດຈະກຳນັກສຶກສາ ສ່ວນປະເພດທີມຊາຍ ປະກອບມີ 6 ທີມ ພະແນກບໍລິຫານ ແລະ ຈັດຕັ້ງພະນັກງານ, ພະແນກກວດກາ, ຕິດຕາມ, ປະເມີນ ແລະ ປະກັນຄຸນນະພາບ, ສູນສຶກສາປ້ອງກັນຊາດ-ປ້ອງກັນຄວາມສະຫງົບ, ພະແນກຄຸ້ມຄອງ ແລະ ສົ່ງເສີມກິດຈະກຳ, ພະແນກວິຊາການ ແລະ ພັດທະນາວິຊາຊິບຄູ ແລະ ພາກວິຊາຄູພະລະສຶກສາ.

ຜ່ານການແຂ່ງຂັນຜົນປະກົດວ່າແຊ໋ມປະເພດທີມຍິງ ເປັນຂອງໜ່ວຍພັກບໍລິຫານ ແລະ ຄຸ້ມຄອງກິດຈະກຳນັກສຶກສາ ສ່ວນຊະນະເລີດປະເພດທີມຊາຍ ຊະນະເລີດ ແມ່ນທີມພາກວິຊາຄູພະລະສຶກສາ.

ຂ່າວໂດຍ: ສົງການ ພັນແພງດີ