ບໍລິສັດ ວຽງຈັນ ວິສະວະກຳໄຟຟ້າ ມອບອຸປະກອນກິລາ ໃຫ້ກະຊວງສຶກສາທິການ ແລະ ກິລາ

ບໍລິສັດວຽງຈັນ ວິສະວະກຳໄຟຟ້າ ມອບອຸປະກອນກິລາ ໃຫ້ກະຊວງສຶກສາທິການ ແລະ ກິລາ ເພື່ອປະກອບສ່ວນຊຸກຍູ້ວຽກງານການສຶກສາ, ວິທະຍາສາດ ແລະ ກິລາ ໂດຍສະເພາະແມ່ນບັນດາໂຮງຮຽນທີ່ຢູ່ເຂດຫ່າງໄກສອກຫຼີກໃນຂອບເຂດທົ່ວປະເທດໄດ້ນຳໃຊ້.

ໃນວັນທີ 31 ມັງກອນ 2024 ທີ່ສໍານັກກະຊວງສຶກສາທິການ ແລະ ກິລາ ໄດ້ມີພິທີມອບອຸປະກອນກິລາ ໂດຍເປັນກຽດມອບຂອງ ທ່ານ ບຸນແຖວ ພົມມະໄຊສີ ປະທານກຸ່ມບໍລິສັດ ວຽງຈັນ ວິສະວະກຳໄຟຟ້າ ແລະ ຮັບໂດຍ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ມີພະນັກງານ ແລະ ຕາງໜ້າຜູ້ຮັບຜິດຊອບວຽກງານເຂົ້າຮ່ວມເປັນສັກຂີພິຍານ.
ສໍາລັບອຸປະກອນກິລາທີ່ນໍາມາມອບນັ້ນແມ່ນເປັນປະເພດບານເຕະ ຈໍານວນ 100 ໜ່ວຍ ເພື່ອເປັນສ່ວນໜຶ່ງໃນການປະກອບສ່ວນຊຸກຍູ້ວຽກງານການສຶກສາ, ວິທະຍາສາດ ແລະ ກິລາ ໂດຍສະເພາະແມ່ນບັນດາໂຮງຮຽນທີ່ຢູ່ເຂດຫ່າງໄກສອກຫຼີກໃນຂອບເຂດທົ່ວປະເທດໄດ້ນຳໃຊ້.

ໂອກາດນີ້, ທ່ານລັດຖະມົນຕີກະຊວງສຶກສາທິການ ແລະ ກິລາ ກໍສະແດງຄວາມດີໃຈ ແລະ ຂອບໃຈຢ່າງຍິ່ງທີ່ທາງບໍລິສັດດັ່ງກ່າວ ມີນຳໃຈນຳເອົາອຸປະກອນກິລາໂດຍສະເພາະແມ່ນບານເຕະ, ເພື່ອນຳໄປມອບໃຫ້ບັນດາໂຮງຮຽນຕ່າງໆ ທີ່ຢູ່ເຂດຫ່າງໄກໃນຂອບເຂດທົ່ວປະເທດ ໂດຍສະເພາະແມ່ນບັນດານ້ອງໆນັກຮຽນຈະໄດ້ຫັນມາຫຼິ້ນກິລາມີສຸຂະພາບແຂງແຮງ ແລະ ຫ່າງໄກຈາກຢາເສບຕິດ.

ຂ່າວໂດຍ: ບົວລະພາ ອິນສີມະນີ