ທັບນັກກິລາລາວ 26 ຄົນ ພ້ອມຮ່ວມຊີງໄຊ ງານກິລາຊາວໜຸ່ມອາຊີ ຄັ້ງທີ 3 ທີ່ປະເທດບາເຣນ

ທັບນັກກິລາລາວ 7 ປະເພດກິລາ ປະກອບມີ ກິລາຢູໂດ, ຈູຈິດຊູ, ອີ-ສະປອດ, ປິ່ງປ່ອງ, ແລ່ນ-ລານ, ລອຍນໍ້າ ແລະ ກິລາດອກປີກໄກ່ ພ້ອມຈະອອກເດີນທາງເຂົ້າຮ່ວມການແຂ່ງຂັນງານມະຫາກຳກິລາຊາວໜຸ່ມອາຊີ ຄັ້ງທີ 3 ໃນລະຫວ່າງວັນທີ 22-31 ຕຸລາ 2025 ຈະຈັດຂຶ້ນທີ່ປະເທດບາເຣນ  ຮັບກຽດເປັນເຈົ້າພາບ.

ເມື່ອວັນທີ 16 ຕຸລາ 2025 ທີ່ຫ້ອງປະຊຸມຄະນະກຳມະການໂອແລມປິກແຫ່ງຊາດລາວ ຫຼື ຄອລ ໄດ້ມີພິທີໂອ້ລົມ ຄະນະນັກກິລາຊາວໜຸ່ມລາວ ທີ່ຈະເດີນທາງເຂົ້າຮ່ວມງານມະຫາກຳກິລາຊາວໜຸ່ມອາຊີ ຄັ້ງທີ 3 ໃນລະຫວ່າງວັນທີ 22-31 ຕຸລາ 2025 ທີ່ປະເທດບາເຣນ  ຮັບກຽດເປັນເຈົ້າພາບ, ໂດຍໃຫ້ກຽດເຂົ້າຮ່ວມໂອ້ລົມຂອງ ທ່ານ ສີຈັນ ຈິດຕະປັນຍາ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ ແລະ ທ່ານ ແສງພອນ ພົນອາມາດ ຮອງປະທານ-ເລຂາທິການ ຄອລ ໃຫ້ການຊີ້ນຳ ແລະ ກຳລັງໃຈແກ່ນັກກິລາ.

ທ່ານ ສີຈັນ ຈິດຕະປັນຍາ ກໍໄດ້ເນັ້ນໜັກໃຫ້ທັບນັກກິລາລາວ 26 ຄົນ ໃນ 7 ປະເພດກິລາ ເພີ່ມທະວີຄວາມເອົາໃຈໃສ່ໃນການເຂົ້າຮ່ວມແຂ່ງຂັນໃນງານຄັ້ງນີ້ ເຖິງວ່າພວກເຮົາຈະພົບກັບອຸປະສັກໃດໆກໍຕາມ ເພາະງານກິລາລະດັບອາຊີ ແນ່ນອນເລີຍວ່າລ້ວນແລ້ວແຕ່ມີນັກກິລາລະດັບໂລກຈຳນວນຫຼາຍຄົນ ສະນັ້ນ ຂໍໃຫ້ທຸກຄົນຈົ່ງພະຍາຍາມສ້າງຜົນງານໃຫ້ອອກມາດີທີ່ສຸດ ເພື່ອເກັບກ່ຽວປະສົບການ ກຽມເຂົ້າຮ່ວມງານກິລາຊີເກມ ຄັ້ງທີ 34 ທີ່ປະເທດໄທ ຮັບກຽດເປັນເຈົ້າພາບ ໃນເດືອນທັນວານີ້.

ໃນການເຂົ້າຮ່ວມແຂ່ງຂັນໃນງານຄັ້ງນີ້ ຄະນະນັກກິລາຊາວໜຸ່ມລາວ ໄດ້ສົ່ງເຂົ້າຮ່ວມທັງໝົດ 26 ຄົນ, ໃນນັ້ນ ປະກອບມີ ຫົວໜ້າຄະນະນັກກິລາ ແລະ ກອງເລຂາ 4 ຄົນ, ນັກກິລາ 14 ຄົນ, ຍິງ 7 ຄົນ ແລະ ຄູຝຶກອີກ 8 ຄົນ ຈາກ 7 ປະເພດກິລາ ຄື: ຢູໂດ, ຈູຈິດຊູ, ອີ-ສະປອດ, ປິ່ງປ່ອງ, ແລ່ນ-ລານ, ລອຍນໍ້າ ແລະ ດອກປີກໄກ່.

ຂ່າວໂດຍ: ສົງການ ພັນແພງດີ