ເຈົ້າແຂວງຈໍາປາສັກ ໂອ້ລົມຄະນະນັກກິລາ ກ່ອນຈະເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XII
ທ່ານ ປອ ອາລຸນໄຊ ສູນນະລາດ ເຈົ້າແຂວງຈໍາປາສັກ ໄດ້ພົບປະໂອ້ລົມຄະນະນັກກິລາຕົວແທນແຂວງຈຳປາສັກ ທີ່ຈະເຂົ້າຮ່ວມແຂ່ງຂັນໃນງານມະຫະກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ເປັນເຈົ້າພາບ. ຊຶ່ງການໂອ້ລົມຄັ້ງນີ້ ຈັດຂຶ້ນໃນວັນທີ 4 ພະຈິກ 2025 ຢູ່ພະແນກສຶກສາທິການ ແລະ ກິລາແຂວງ ໂດຍມີທ່ານ ບົວທອງ ສຸວັນນະສານ ຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະຮັບຜິດຊອບ, ຄະນະນໍາ, ຄູຝຶກ ແລະ ນັກກິລາ.
ໂອກາດນີ້, ທ່ານເຈົ້າແຂວງຈໍາປາສັກ ໄດ້ຍົກໃຫ້ເຫັນຄວາມໝາຍສໍາຄັນຂອງວຽກງານກິລາ ຕໍ່ກັບການພັດທະນາເສດຖະກິດ-ສັງຄົມ, ກິລາເພື່ອສຸຂະພາບ, ມິດຕະພາບ ແລະ ການພັດທະນາ ທັງເປັນການຄັດເລືອກນັກກິລາແຕ່ລະປະເພດຂອງແຂວງ ໄປເປັນນັກກິລາລະດັບຊາດ, ການເຂົ້າຮ່ວມງານມະຫະກໍາກິລາຄັ້ງນີ້ ຍັງເປັນການເຄື່ອນໄຫວເກັບກໍາບົດຮຽນ, ປະສົບການ ເພື່ອກະກຽມຄວາມພ້ອມຮອບດ້ານຂອງແຂວງຈໍາປາສັກ ໃນການເປັນເຈົ້າພາບຈັດງານມະຫະກໍາກິລາແຫ່ງຊາດ ຄັ້ງທີ XIII.
ພ້ອມນັ້ນ, ທ່ານເຈົ້າແຂວງ ກໍໄດ້ເນັ້ນໜັກໃຫ້ຄະນະນໍາ, ຄູຝຶກ ແລະ ນັກກິລາທຸກຄົນ ຕ້ອງເອົາໃຈໃສ່ດູແລຮັກສາສຸຂະພາບ, ຮັດແໜ້ນຄວາມສາມັກຄີພາຍໃນຄະນະຮັບຜິດຊອບ, ຄູຝຶກ ແລະ ນັກກິລາດ້ວຍກັນ; ໄລຍະເຂົ້າຮ່ວມແຂ່ງຂັນນັກກິລາທຸກສະຫະພັນ ຕ້ອງມີວິໄນ, ມີນໍ້າໃຈເສຍສະຫຼະ, ມີຄວາມອົດທົນ ແລະ ມີຄວາມຮັບຜິດຊອບ ຕໍ່ໜ້າທີ່ຂອງຕົນ, ທຸ້ມເທພະລະກໍາລັງ, ເຕັກນິກສະເພາະຕົວ, ເວລາແຂ່ງຂັນ ກໍເຮັດໃຫ້ສຸດຄວາມສາມາດ, ຮູ້ໄດ້, ຮູ້ເສຍ, ສູ້ດ້ວຍນໍ້າໃຈນັກກິລາ; ຄູຝຶກທຸກສະຫະພັນກິລາ ຕ້ອງເອົາໃຈໃສ່ແນະນໍາເຕັກນິກໃນການແຂ່ງຂັນ ເພື່ອຍາດໃຫ້ໄດ້ຫຼຽນຕ່າງໆຕາມຄາດໝາຍທີ່ວາງໄວ້. ນອກນີ້ ກໍເອົາໃຈໃສ່ປະສານສົມທົບກັບເຈົ້າພາບ ຕົ້ນຕໍແມ່ນສະຖານທີ່ພັກເຊົາ, ຕາຕະລາງການແຂ່ງຂັນ, ສະຖານທີ່ແຂ່ງຂັນກິລາແຕ່ລະປະເພດ ເພື່ອເຮັດໃຫ້ການເຄື່ອນໄຫວມີຄວາມສະດວກວ່ອງໄວ; ການແຂ່ງກິລາທຸກປະເພດ ຕ້ອງມີການໂຄສະນາເຜີຍແຜ່ໃຫ້ກວ້າງຂວາງ ແລະ ເຊີນຊວນຄົນຈໍາປາສັກ ທີ່ອາໄສຢູ່ນະຄອນຫຼວງວຽງຈັນ ໃຫ້ເຂົ້າຮ່ວມຊົມຮ່ວມເຊຍ ເປັນກໍາລັງໃຈໃຫ້ນັກກິລາ ເພື່ອຍາດໃຫ້ໄດ້ໄຊຊະນະ, ຊະນະເລີດ ມາໃຫ້ພໍ່ແມ່ພີ່ນ້ອງຊາວແຂວງຈໍາປາສັກ.
ທ່ານ ຄໍາເຜົ່າ ເມືອງວົງສາ ຮອງຫົວໜ້າພະແນກສຶກສາທິການ ແລະ ກິລາແຂວງ ລາຍງານວ່າ: ການເຂົ້າຮ່ວມງານແຂ່ງຂັນໃນງານກິລາແຫ່ງຊາດ ຄັ້ງທີ XII, ແຂວງຈຳປາສັກ ໄດ້ກຳນົດເອົາ 25 ປະເພດກິລາ ເຂົ້າຮ່ວມການແຂ່ງຂັນ ຄື: ບານເຕະ (ຊາຍ-ຍິງ), ແລ່ນ-ລານ (ຊາຍ-ຍິງ), ລອຍນໍ້າ (ຊາຍ-ຍິງ), ມວຍລາວ, ມວຍສາກົນ ແລະ ມວຍວູຊູ (ຊາຍ-ຍິງ), ເທຄວັນໂດ (ຊາຍ-ຍິງ), ບານສົ່ງໃນຮົ່ມ ແລະ ຫາດຊາຍ (ຊາຍ-ຍິງ ), ເປຕັງ (ຊາຍ-ຍິງ), ໜ້າເກັກ (ຊາຍ-ຍິງ),ໝາກຂ່າງ (ຊາຍ-ຍິງ), ໝາກເສິກ (ຊາຍ-ຍິງ), ກະຕໍ້ ແລະ ຊິນລອນ (ຊາຍ-ຍິງ), ບານບ້ວງ (ຊາຍ-ຍິງ ), ປິ່ງປ່ອງ (ຊາຍ-ຍິງ), ໝາກແລ້ (ຊາຍ-ຍິງ), ລົດຖີບ (ຊາຍ), ຄາຣາເຕໂດ (ຊາຍ-ຍິງ), ເພາະກາຍ (ຊາຍ-ຍິງ), ດອກປີກໄກ່ (ຊາຍ-ຍິງ), ຍິງປືນ (ຊາຍ-ຍິງ), ສະໜຸກເກີ (ຊາຍ), ປັນຈັກສີລັດ (ຊາຍ-ຍິງ), ມວຍປໍ້າ (ຊາຍ-ຍິງ), ຍົກນໍ້າໜັກ (ຊາຍ -ຍິງ ), ຊອບເທັນນິດ (ຊາຍ-ຍິງ) ແລະ ກັອບ (ຊາຍ-ຍິງ ). ມາຮອດປັດຈຸບັນ ສະຫະພັນກິລາຍິງປືນບໍ່ສາມາດເຂົ້າຮ່ວມໄດ້ ຊຶ່ງຍັງແຕ່ 24 ປະເພດກິລາທີ່ຈະໄປເຂົ້າຮ່ວມ.
ສໍາລັບກິລາຄົນພິການກຳນົດເອົາ 5 ປະເພດກິລາ ຄື: ແລ່ນ-ລານ (ຊາຍ-ຍິງ ), ບານບ້ວງ ລໍ້ເລື່ອນ (ຊາຍ-ຍິງ ), ບັອດເຊຍ (ຊາຍ-ຍິງ), ລອຍນໍ້າ (ຊາຍ) ແລະ ຍົກນໍ້າໜັກ (ຊາຍ). ດ້ານຈໍານວນພົນເຂົ້າຮ່ວມ ມີການນໍາຂັ້ນແຂວງ, ກອງເລຂາ ແລະ ກຳມະການເສດຖະກິດ, ກຳມະການເຕັກນິກ-ວິຊາການ, ແພດ, ນັກຂ່າວ, ເຈົ້າໜ້າທີ່, ຄະນະນໍາ, ຄູຝຶກ, ນັກກິລາ ແລະ ພະນັກງານຮັບໃຊ້ ລວມທັງໝົດ 552 ຄົນ, ຍິງ 156 ຄົນ ບວກກັບກິລາຄົນພິການ ມີຈຳນວນພົນເຂົ້າຮ່ວມທັງໝົດ 115 ຄົນ. ຄາດໝາຍສູ້ຊົນໃຫ້ໄດ້ຫຼຽນຄຳ 42 ຫຼຽນ ແລະ ຫຼຽນເງິນ 36 ຫຼຽນ, ໃຫ້ໄດ້ຈັດຢູ່ໃນອັນດັບທີ 4 ຂອງທົ່ວປະເທດ; ກິລາຄົນພິການ ຄາດໝາຍສູ້ຊົນ ໃຫ້ໄດ້ຫຼຽນຄຳ 6 ຫຼຽນ, ຫຼຽນເງິນ 6 ຫຼຽນ ແລະ ຫຼຽນທອງ 5 ຫຼຽນ ໃຫ້ຈັດຢູ່ໃນອັນດັບທີ 6 ຂອງທົ່ວປະເທດ.
* ຂ່າວ-ພາບ: ທູນທອງໃຈ *
