ສາວບານເຕະ ນວ ເຈົ້າຂອງແຊ໋ມຫຼຽນຄຳ 6 ສະໄໝ ກາບໄຫວ້ຂໍພອນຈາກສິ່ງສັກສິດສ້າງຂວັນກຳລັງໃຈ ກຽມປ້ອງກັນແຊ໋ມ “ນະຄອນຫຼວງວຽງຈັນ ເກມ 2025”

ທັບນັກກິລາບານເຕະ ເຈົ້າພາບ ສາວນະຄອນຫຼວງວຽງຈັນ (ນວ) ນຳໂດຍທ່ານ ບຸນມີ ຫຼ່ຽມໄຊຍະຈັກ ຮອງປະທານສະຫະພັນບານເຕະ ນະຄອນຫຼວງວຽງຈັນ ແລະ ທ່ານ ບຸນມີ ໄຊຍະວົງ ຄະນະບໍລິຫານງານສະຫະພັນບານເຕະ ນວ ທັງເປັນຜູ້ຈັດການທີມບານເຕະຍິງ ເຈົ້າພາບ ພ້ອມດ້ວຍຄະນະ ແລະ ນັກກິລາ ໄດ້ໄປກາບໄຫວ້ຂໍພອນຈາກສິ່ງສັກສິດຈາກເຈົ້າແມ່ສີເມືອງ ທີ່ວັດສີເມືອງ, ເຈົ້າໄຊເຊດຖາ ແລະ ພຣະທາດຫຼວງ ໃນຕອນເຊົ້າວັນທີ 11 ພະຈິກ 2025 ເພື່ອຂໍພອນເປັນສີຣິມຸງຄຸນສ້າງຂວັນກຳລັງໃຈໃຫ້ທັບນັກກິລາ ກຽມປ້ອງກັນແຊ໋ມຫຼຽນຄຳສະໄໝທີ 7 ການແຂ່ງຂັນບານເຕະຍິງ ງານມະຫະກຳກິລາແຫ່ງຊາດ ຄັ້ງທີ 12 ຫຼື “ນະຄອນຫຼວງວຽງຈັນ ເກມ 2025” ຈັດຂຶ້ນ ລະຫວ່າງວັນທີ 9-24 ພະຈິກ 2025ນີ້.

ສຳລັບ ການແຂ່ງຂັນບານເຕະຍິງ “ນະຄອນຫຼວງວຽງຈັນ ເກມ 2025” ມີທັງໝົດ 5 ພາກສ່ວນ ເຂົ້າຮ່ວມ ປະກອບມີ ເຈົ້າພາບ ສາວນະຄອນຫຼວງວຽງຈັນ, ແຂວງສະຫວັນນະເຂດ, ແຂວງໄຊຍະບູລີ, ແຂວງສາລະວັນ ແລະ ແຂວງຈຳປາສັກ ຊຶ່ງຈະເລີ່ມແຂ່ງຂັນ ໃນວັນທີ 12 ພະຈິກ 2025.

ສະເພາະຕາຕະລາງແຂ່ງຂັນຂອງ ສາວເຈົ້າພາບ ຈະລົງສະໜາມນັດທຳອິດ ພົບກັບ ແຂວງສະຫວັນນະເຂດ ເວລາ 15:00 ໂມງ ໃນວັນທີ 14 ພະຈິກ 2025 ທີ່ສະໜາມກິລາກາງ ມະຫາວິທະຍາໄລແຫ່ງຊາດ.