“ຕ໋ອງ ທອງຄຳ” ຄວ້າ 2 ຫຼຽນຄຳ ແລະ 1 ຫຼຽນເງິນ ສ້າງປະຫວັດສາດໃຫ້ທັບກິລາຄົນພິການລາວ ແລ່ນ-ລານ ຊີງແຊ໋ມນານາຊາດ ທີ່ປະເທດໄທ

ທ້າວ ຕ໋ອງ ທອງຄຳ ນັກກິລາແລ່ນ-ລານຄົນພິການທີມຊາດລາວ ຄວ້າ 2 ຫຼຽນຄຳ ແລະ 1 ຫຼຽນເງິນ ຈາກປະເພດຊຸກນ້ຳໜັກ, ຊັດຫຼາວ ແລະ ແກວ່ງຈານ ສ້າງຜົນງານຄັ້ງປະຫວັດສາດ ໃຫ້ທັບກິລາຄົນພິການລາວ ໃນການແຂ່ງຂັນກິລາແລ່ນ-ລານຄົນພິການ ຊີງແຊ໋ມນານາຊາດ ທີ່ນະຄອນຣາຊະສີມາ ປະເທດໄທ.

ການແຂ່ງຂັນກິລາແລ່ນ-ລານຄົນພິການນາໆຊາດ ຢູ່ທີ່ ນະຄອນຣາຊະສີມາ ປະເທດໄທ ໃນລະຫວ່າງວັນທີ 21-27 ພະຈິກ 2025 ມີ 7 ປະເທດເຂົ້າຮ່ວມແຂ່ງຂັນ ສະເພາະສປປ ລາວ ແມ່ນສົ່ງເຂົ້າຮ່ວມຈຳນວນ 6 ຄົນ, ຄະນະຄູຝຶກ 2 ຄົນ ແລະ ນັກກິລາ 4 ຄົນ.

ທັບນັກກິລາຄົນພິການລາວ ລົງແຂ່ງຂັນ 8 ລາຍການ ປະເພດແລ່ນ 100 ແມັດຊາຍ, ແລ່ນ 400 ແມັດຊາຍ, ແລ່ນ 1.500 ແມັດຊາຍ, ແລ່ນ 5.000 ແມັດຊາຍ, ຊຸກນ້ຳໜັກ ຊາຍ-ຍິງ ແລະ ແກວ່ງຈານ ຊາຍ-ຍິງ, ຊັດຫຼາວ ຊາຍ ແລະ ເຕັ້ນຍາວຊາຍ.

ສຳລັບຜົນງານຂອງທັບນັກກິລາຄົນພິການລາວ ແມ່ນສາມາດຍາດໄດ້ 2 ຫຼຽນຄຳ ແລະ 6 ຫຼຽນເງິນ, ໃນນັ້ນໄດ້ຈາກທ້າວ ຕ໋ອງ ທອງຄຳ 2 ຫຼຽນຄຳ ຈາກປະເພດຊຸກນ້ຳໜັກ, ຊັດຫຼາວ ແລະ 1 ຫຼຽນເງິນ ຈາກແກວ່ງຈານ.

ສ່ວນທ້າວ ບຸນເພັດ ເທບທິດາ ຍາດໄດ້ 3 ຫຼຽນເງິນ ຈາກປະເພດແລ່ນ100 ແມັດ, 400 ແມັດ ແລະ ເຕັ້ນຍາວ, ທ້າວ ວັນພອນ ສີບຸນເຮືອງ 1 ຫຼຽນເງິນ ແລ່ນ 5.000 ແມັດ ແລະ ນາງ ທອງແດງ ຫອມວົງສະຫວັນ ຍາດໄດ້ 1 ຫຼຽນເງິນ ຈາກແກວ່ງຈານ.

ຂ່າວໂດຍ ສົງການ ພັນແພງດີ