ທັບນັກກິລາຄົນພິການລາວ ຖືກຕ້ອນຮັບຢ່າງສົມກຽດ ຫຼັງສ້າງຜົນງານບັນລຸຄາດໝາຍ ໃນ ອາຊຽນພາຣາ ເກມ 2025

ຂະບວນທັບນັກກິລາຄົນພິການລາວ ໄດ້ເດີນທາງເຖິງບ້ານເກີດເມືອງນອນເປັນທີ່ຮຽບຮ້ອຍແລ້ວ ໃນຕອນບ່າຍວັນທີ 27 ມັງກອນ 2026 ທີ່ຂົວມິດຕະພາບ ລາວ-ໄທ ແຫ່ງທີ 1 ນະຄອນຫຼວງວຽງຈັນ ພາຍຫຼັງສ້າງຜົນງານໄດ້ເປັນປະຫວັດສາດໜ້າໃໝ່ ຍາດໄດ້ 18 ຫຼຽນ, ໃນນັ້ນແບ່ງເປັນ 2 ຫຼຽນຄຳ, 5 ຫຼຽນເງິນ ແລະ 11 ຫຼຽນທອງ ຈັດຢູ່ອັນດັບທີ 9 ໃນງານມະຫະກຳກິລາຄົນພິການອາຊຽນ ຄັ້ງທີ 13 ຫຼື ອາຊຽນພາຣາ ເກມ 2025 (ASEAN ParaGames 2025) ລະຫວ່າງວັນທີ 20-26 ມັງກອນ 2026 ທີ່ນະຄອນຣາຊະສີມາ ປະເທດໄທ ນຳໂດຍທ່ານ ນາງ ຂັນທະລີ ສີຣິພົງພັນ ປະທານຄະນະກຳມະການພາຣາແລມປິກແຫ່ງຊາດລາວ (ຄພລ), ຊຶ່ງໃຫ້ກຽດຕ້ອນຮັບຢ່າງອົບອຸ່ນໂດຍ ທ່ານ ປອ ນາງ ດາລາວອນ ກິດຕິພັນ ຮອງລັດຖະມົນຕີກະຊວງສຶກສາທິການ ແລະ ກິລາ ທັງເປັນຮອງປະທານ ຄພລ, ມີທ່ານຫົວໜ້າກົມ, ຮອງຫົວໜ້າກົມ ບັນດາທ່ານຄະນະບໍລິຫານງານ ຄພລ ຜູ້ໃຫ້ການສະໜັບສະໜູນ ພ້ອມດ້ວຍຄູຝຶກ ແລະ ນັກກິລາຄົນພິການ ຕະຫຼອດຮອດມວນຊົນຊາວລາວຮ່ວມສະແດງຄວາມຍິນດີ.

ການແຂ່ງຂັນກິລາຄົນພິການອາຊຽນ ຄັ້ງທີ 13 ປີນີ້ ມີນັກກິລາຈາກ 10 ຊາດອາຊຽນເຂົ້າຮ່ວມ 1.166 ຄົນ ໃນນັ້ນ ສປປ ລາວ ສົ່ງນັກກິລາເຂົ້າຮ່ວມທັງໝົດ 160 ກວ່າຄົນ ຈາກ 12 ປະເພດກິລາ. ຜ່ານການແຂ່ງຂັນຜົນປາກົດວ່າ: ສປປ ລາວ ຍາດໄດ້ 2 ຫຼຽນຄຳ, 5 ຫຼຽນເງິນ ແລະ 11 ຫຼຽນທອງ ລວມ 18 ຫຼຽນ ຈັດຢູ່ອັນດັບທີ 9 ຂອງຕາຕະລາງ ສ່ວນເຈົ້າຫຼຽນຄຳ ເປັນຂອງເຈົ້າພາບ ໄທ ຍາດໄດ້ 175 ຫຼຽນຄຳ, 155 ຫຼຽນເງິນ ແລະ 157 ຫຼຽນທອງ, ອັນດັບທີ 2 ອິນໂດເນເຊຍ ຍາດໄດ້ 135 ຫຼຽນຄຳ, 143 ຫຼຽນເງິນ ແລະ 114 ຫຼຽນທອງ ແລະ ອັນດັບທີ 3 ມາເລເຊຍ ຍາດໄດ້ 64 ຫຼຽນຄຳ 64 ຫຼຽນເງິນ ແລະ 73 ຫຼຽນທອງ.

ສຳລັບງານມະຫະກຳກິລາຄົນພິການອາຊຽນ ຄັ້ງທີ 14 ແມ່ນປະເທດມາເລເຊຍ ຮັບກຽດເປັນເຈົ້າພາບ ໃນປີ 2027

ຂ່າວໂດຍ: ສົງການ ພັນແພງດີ