ຄະນະນຳ ສຕລ ເນັ້ນໃຫ້ນັກກິລາທີມຊາດລາວ ຮຸ່ນອາຍຸບໍ່ເກີນ 17 ປີ ໂຟກັດນັດທີ່ຈະພົບກັບ ທີມຊາດມາເລເຊຍ

ໃນຄໍ່າຄືນຂອງວັນທີ 20 ເມສາ 2026 ທີ່ໂຮງແຮມໃນປະເທດອິນໂດເນເຊຍ, ທ່ານ ຄໍາແພງ ວົງຂັນຕີ ຮອງປະທານ ສະຫະພັນບານເຕະແຫ່ງຊາດລາວ (ສຕລ) ແລະ ທ່ານ ຄໍລະເດດ ພອນພະຈັນ ຄະນະບໍລິຫານງານ ສຕລ ທັງເປັນຮອງຫົວໜ້າຄະນະ ທີມຊາດລາວ ຮຸ່ນອາຍຸບໍ່ເກີນ 17 ປີ ໄດ້ເດີນທາງມາຮອດປະເທດອິນໂດເນເຊຍ ເພື່ອສືບຕໍ່ນໍາພາ ທີມຊາດລາວ ລົງແຂ່ງຂັນບານເຕະເຍົາວະຊົນຮຸ່ນອາຍຸບໍ່ເກີນ 17 ປີ ຊີງແຊ໋ມອາຊຽນ ປະຈໍາປີ 2026 (ASEAN U17 Boys’ Championship 2026) ຮອບ 4 ທີມສຸດທ້າຍ ທີ່ຈະພົບກັບ ທີມຊາດມາເລເຊຍ ໃນວັນທີ 22 ເມສາ 2026 ເວລາ 15:30 ໂມງທີ່ສະໜາມ Gelora Delta.

ໂອກາດດັ່ງກ່າວ, ທ່ານ ຄໍາແພງ ວົງຂັນຕີ ໄດ້ຍ້ອງຍໍຊົມເຊີຍ ຄະນະຄູຝຶກ ແລະ ນັກກິລາ ທີມຊາດລາວ ຮຸ່ນອາຍຸບໍ່ເກີນ 17 ປີ ທີ່ທຸ້ມເທເຫື່ອແຮງສະຕິປັນຍາ ສຸມໃສ່ການໃນການແຂ່ງຂັນ ຈົນສາມາດຜ່ານເຂົ້າຮອບ 4 ທີມສຸດທ້າຍ ແນ່ນອນເປົ້າໝາຍຕໍ່ໄປຄືຜ່ານເຂົ້າຮອບຊີງຊະນະເລີດໃຫ້ໄດ້. ດັ່ງນັ້ນ ຮຽກຮ້ອງນັກກິລາທຸກຄົນຟັງຄວາມຄູຝຶກ ຄືກັບພໍ່ກັບແມ່ພວກເຮົາ ແລະ ໃຫ້ມີຈິດໃຈສູ້ເພື່ອປະເທດຊາດ ຕັ້ງໃຈໃສ່ນັດທີ່ຈະພົບກັບ ມາເລເຊຍ ຂໍໃຫ້ໄດ້ຜົນສໍາເລັດກັບຄືນເມື່ອບ້ານເຮົາ.

ຂະດຽວກັນ, ທ່ານ ຄໍລະເດດ ພອນພະຈັນ ຮອງຫົວໜ້າຄະນະ ທີມຊາດລາວ ຮຸ່ນອາຍຸບໍ່ເກີນ 17 ປີ ກ່າວວ່າ: ຊົມເຊີຍຜົນສໍາເລັດໃນ 3 ນັດທີ່ຜ່ານມາ ຈົນສາມາດຜ່ານເຂົ້າຮອບສຸດທ້າຍໄດ້ ແລະ ເປັນຜົນງານທີ່ຊາວລາວພູມໃຈທີ່ສຸດ. ແນ່ນອນເຮົາຍັງມີການແຂ່ງຂັນຮອບ 4 ທີມທີ່ຈະພົບກັບ ມາເລເຊຍ ຂໍໃຫ້ທຸກຄົນໂຟກັດ ແລະ ສຸມຈິດສຸມໃຈ ພ້ອມເຮັດທຸກຢ່າງເພື່ອໃຫ້ໄດ້ຮັບໄຊຊະນະ ແລະ ຜ່ານເຂົ້າຮອບຊີງຊະນະເລີດໃຫ້ໄດ້.